تەرمێک لە زێی گەورە دۆزرایەوە

وتەبێژی بەرێوەبەرایەتی بەرگریی شارستانیی هەولێر رایەگەیاند، کە تەرمیێک لەنێو ئاوی زێی گەورە لە سنوری قەزای خەبات دۆزرایەوە.

موقەدەم شاخەوان سەعید، وتەبێژی بەرێوەبەرایەتی بەرگریی شارستانیی هەولێر، بە ئاژانسی ھەواڵی زاگرۆسی راگەیاند: پاشنیوەڕۆی ئەمڕۆ کاتژمێر۱۲:۲٠ خولەک تیمی ژێرئاو کەوتنی قەزای خەباتی سەر بە بەڕێوبەرایەتیمان ئاگادار کرانەوە لە بونی تەرمی ئافرەتێک لەنێو ئاوی زێی گەورە لە سنوری قەزای خەبات.

هەروەها موقەدەم شاخەوان سەعید، وتەبێژی بەرێوەبەرایەتی بەرگریی شارستانیی هەولێر ئەوەشی بۆ ئاژانسی ھەواڵی زاگرۆس خستەروو، کە دەستبەجێ تیمەکانمان گەیشتنە شوێنی ڕووداوو توانرا تەرمەکە دەربهێنرێتەوە و تەرمەکەی ڕەوانەی پزیشکی دادی کراوە.

رێباز یونس

لە هەریر .. بە ئامادەبوونی وەزیری کار و پارێزگاری هەولێر، سەنتەرێکی چارەسەری ئۆتیزم لە قەزاكە کرایەوە

ئەمڕۆ پێنجشەممە2026.4.2، لە چوارچێوەی گرنگیدانی حکومەتی هەرێمی کوردستان بە کەرتی کۆمەڵایەتی و بەبۆنەی ڕۆژی جیهانیی ئۆتیزم، بە ئامادەبوونی کوێستان محەمەد، وەزیری کار و کاروباری کۆمەڵایەتی و ئومێد خۆشناو، پارێزگاری هەولێر و شێخ حەسەن عەلائەدین، بەڕێوەبەری جێبەجێکاری دەزگای ڕوانگە، سەنتەری ئۆتیزمی ڕوانگە لە قەزای هەریر کرایەوە.

لە ڕێوڕەسمەکەدا، کە زەکیە محمەد ساڵح، بریکاری وەزارەتی کار و یوسف چاوشین، بەڕێوەبەری گشتیی چاودێری و گەشەپێدانی کۆمەڵایەتی هەولێر و شێروان جەلال، قائیمقامی قەزای هەریر و ژمارەیەکی دیکە لە بەرپرسانی حزبی و حکومی ناوچەکە ئامادەی بوون، دوای کردنەوەی سەنتەرەکە و بەسەرکردنەوەی بەشە جیاوازەکانی، پارێزگاری هەولێر لە وتەیەکدا وێڕای دەستخۆشی لە دەزگای ڕوانگە بۆ دروستکردنی سەنتەرەکە، پیرۆزبایی لە دانیشتووانی ناوچەکە کرد.

هەروەها جەختی لە گرنگیی ئەم جۆرە پڕۆژانە کردەوە و ڕایگەیاند: “کردنەوەی ئەم سەنتەرە هەنگاوێکی گرنگە بۆ خزمەتکردنی ئەو منداڵانەی پێویستیان بە چاودێریی تایبەت هەیە، تاوەکو لە ناوچەکەی خۆیاندا و بەبێ ماندووبوون خزمەتگوزارییە پەروەردەیی و تەندروستییەکانیان پێ بگات.”

ئەم سەنتەرە نوێیە بەپێی ستانداردە سەردەمییەکان لەلایەن دەزگای ڕوانگە بە ئامانجی ژینگەیەکی لەبار بۆ گەشەپێدانی تواناکانی تووشبووانی ئۆتیزم دروستکراوە و هاوکارێکی سەرەکی دەبێت بۆ سوککردنی ئەرکی خێزانەکانیان لە دەڤەرەکەدا.

ئەم هەنگاوە لە کاتێکدایە کە حکومەتی هەرێم کار دەکات بۆ ئەوەی خزمەتگوزارییە تایبەتەکان تەنها لە سەنتەری شارە گەورەکاندا کورت نەبنەوە و بگەنە قەزا و ناحیەکان، بە مەبەستی دابینکردنی یەکسانی لە دەستڕاگەیشتن بە مافە سەرەتاییەکانی ئەو چینە ئازیزەی کۆمەڵگە.

هۆکاری پچڕانی کارەبا لە بەشێکی گەڕەک و دەوروبەری هەولێر ئاشکرا بوو

سەرچاوەیەک لە وەزارەتی کارەبا بۆ ئاژانسی هەواڵی زاگرۆس راگەیاند: پچڕانی کارەبا لە بەشێکی گەڕەکەکانی هەولێر و دەوروبەری، بەهۆی هەبوونی کێشەی تەکنیکییە لە فیدەر و بگۆڕەکان، لە ماوەیەکی کەمدا کارەبا دەگەڕێتەوە دوخی ئاسایی خۆی.

یەکێتی ژیانی ڕۆژانەی خەڵکی کردووەتە دۆزەخ

زیرەک کەمال

لە زۆنی سەوز و سلێمانیدا، کاتێک گوێت لە وشەکانی “خزمەتگوزاری، داهاتی ناوخۆ، یان چاکسازیی ئیداری” دەبێت، بزانە کە دەسەڵاتدارانی ئەم ناوچەیە خەریکی شاردنەوەی باجێکی نوێ یان دزینی داهاتێکی گەورەن! لێرە، وێرانبوونی ژێرخان بە ڕێکەوت ڕوو نادات و گیرفانی خەڵکیش بە ڕێکەوت بەتاڵ نابێت؛ بەڵکو “برسیکردن و سەپاندنی فشاری دەروونی و ئابووری” خۆی لە خۆیدا گەورەترین ستراتیژی و شێوازی حوکمڕانیی یەکێتیی نیشتمانییە. ئەوان فێربوون کە باشترین ڕێگە بۆ کۆنترۆڵکردنی شارێک کە هەمیشە پێشەنگی ناڕەزایەتی بووە، “خنکاندنیەتی لەناو قەیرانی خزمەتگوزاری و نەبوونی پارەدا”. بۆیە دەبینین هیچ شتێک لێرە لە بەرژەوەندیی هاوڵاتی نییە، لە وێرانبوونی شەقامەکانەوە بگرە تا دەگاتە نەبوونی دەرمان و پارە لە بانکەکاندا!

با سەیری قەیرانی ژیانی ڕۆژانە بکەین لەم زۆنەدا. بۆچی هەموو جارێک کە باس لە مووچە دەکرێت، بانکەکانی سلێمانی پارەیان تێدا نییە و داهاتی ناوخۆ دیار نامێنێت؟ ئایا لەبەر ئەوەیە کە سلێمانی و دەروازەکانی پارەیان تێدا نییە؟ نەخێر، ڕۆژانە ملیۆنان دۆلار لە دەروازەکانی باشماخ و پەروێزخان و قاچاخچێتییەوە دەڕژێتە گیرفانی کۆمپانیا حیزبییەکان و بەرپرسانی یەکێتییەوە، بەڵام هاوڵاتی دەبێت باجەکەی بدات چونکە “بەتاڵکردنەوەی بانکەکان و بردنی داهات” باشترین چەکە بۆ ئەوەی خەڵک تەنها بیر لە پەیداکردنی بژێوییەکەی بکاتەوە، نەک بیر لە گۆڕانکاریی سیاسی و وەستانەوە دژی گەندەڵییەکانی دەسەڵات. کاتێک تۆ مووچەی خانەنشینێک دەدزیت و دەرمانی نەخۆشخانەکان دەبڕیت، ئیتر چاوەڕێی چی دەکەیت جگە لە دروستکردنی کۆمەڵگایەکی نائومێد و ماندوو؟

هەمان سیاسەت لە ململانێی نێوان هەولێر و سلێمانیشدا جێبەجێ دەکرێت. یەکێتی هەمیشە بانگەشەی ئەوە دەکات کە حکومەتی هەولێر سزای دارایی سلێمانی دەدات، بەڵام خۆی لە ژێرەوە شەریکی تەواوی ئەم دۆخەیە! ئەوان ئەم ململانێیە بەکاردهێنن نەک وەک بەرگریکردن لە مافی سلێمانی، بەڵکو وەک دەرفەتێک بۆ “پەردەپۆشکردنی دزینی داهاتی ناوخۆ” و درێژەدان بە تاڵانکارییەکانیان بەبێ ئەوەی هیچ کەسێک بوێرێت لێپرسینەوە لە کۆمپانیاکانیان بکات. کاتێک تۆ شارەکەت کردووەتە بارمتەی ململانێی سیاسی و ئابووریی خۆت، بۆچی پەلە بکەیت لە چارەسەر؟ ئەوان شارەکە وێران دەکەن، خەڵک دەچەوسێننەوە، و پاشان خۆیان وەک قوربانی و بەرگریکار لە مافی سلێمانی بەسەر میللەتدا دەفرۆشنەوە.

تەنانەت کاتێک باس لە “ئازادی و ڕادەربڕین” دەکرێت، ئەم دەسەڵاتە بە ناوی پاراستنی ئاسایشەوە، هێزی چەکدار و دەمامکدار دەڕێژێتە سەر شەقامەکان تەنها بۆ ئەوەی ڕاستییەکانی داڕمانی حوکمڕانییەکەی لەناو ترس و تۆقاندندا بزر بکات. کێشەی نەبوونی ئاو، خراپیی کارەبا، و زیادکردنی باج لەسەر کاسبکاران بە مەبەست دەسەپێنرێن، تا خەڵک بێهیوا ببێت و قبوڵی بکات کە ئەم شارە تاپۆی چەند خێزانێکە و ئێمەش تەنها کرێنشینین تێیدا.

پێوایە”ئامانجی سەرەکیی دەسەڵاتی ستەمکار ئەوەیە کە وا لە خەڵک بکات بڕوا بکەن کە خراپترین دۆخ، باشترین چارەسەرە بۆیان.” ئەمڕۆ یەکێتی لە زۆنی سەوزدا بە زەبری “فشاری ئابووری و دەروونی” دەیەوێت ڕاستییەکانی گەندەڵی بشارێتەوە و کەرامەتی خەڵکی ناوچەکە بشکێنێت.

مووچە لە نێوان چەکووشی بەغدا و سندانی هەولێردا!

پێشڕەو محموود ئیسماعیل

ئەگەر مووچە مافێکی بنەڕەتی بێت بۆ ماندووبوونی فەرمانبەر، ئەوا لە عێراق و هەرێمی کوردستان بووەتە کەرەستەیەکی سیاسیی قێزەون بۆ چۆکدادان و مامەڵەکردن بە کەرامەتی نەتەوەیەکەوە. خەڵکی کوردستان ئەمڕۆ بوونەتە قوربانیی یارییەکی دوو سەرە لە نێوان دوو دەسەڵاتی تا سەر ئێسقان گەندەڵدا: لە لایەک حکومەتی بەغدا کە دەیەوێت بە چەکی برسیکردن ئیرادەی هەرێم بشکێنێت، وە لە لایەکی تریشەوە حکومەتی هەرێم کە لەبری بەرگریکردن لە مافی خەڵکەکەی، قوتی فەرمانبەرانی کردووەتە بارمتەی مانەوەی کۆمپانیاکانی!

بەغدا، بە عەقڵیەتێکی مەرکەزی و شۆڤێنیانەوە، ساڵانێکە یاری بە دەروون و بژێویی فەرمانبەرانی کورد دەکات. ئەوان هەرکاتێک بیانەوێت بە پاساوی “نەبوونی لیستی دروست” یان “داهاتی ناوخۆ”، پارەی مووچە دەبڕن یان دوایدەخەن، وەک ئەوەی فەرمانبەری کورد هاوڵاتیی پلە دوو بێت. بەڵام ئازارە گەورەکە ئەوە نییە کە دوژمن یان نەیارێک سزات دەدات؛ ئازارەکە ئەوەیە کاتێک ئەو نوێنەر و سەرکردە کوردانەی کە بە ناوی تۆوە چوونەتە بەغدا بۆ ئەوەی بەرگری لە مافەکانت بکەن، خۆیان دەبنە بەشێک لەم گەمەیە. ئەوان لەبری ئەوەی مێزەکە بەسەر حکومەتی عێراقدا هەڵگێڕنەوە بۆ وەرگرتنی مووچەی مامۆستایەک، لەسەر مێزەکە دادەنیشن بۆ ڕێککەوتن لەسەر تەندەرات و پشکی حیزبەکانیان لە نەوت و دەروازەکاندا!

لە ناوخۆی هەرێمیشدا (پارتی و یەکێتی) ڕۆڵی پاڵەوانی درۆینە دەگێڕن. ئەوان کە بە دەیان ساڵە داهاتی نەوت، دەروازە سنوورییەکان، و باجی ناوخۆیان قۆرخ کردووە، ئامادە نین یەک دۆلار لە قازانجی کۆمپانیا زەبەلاحەکانیان کەم بکەنەوە بۆ دانەوەی قەرزی مووچەخۆران. لەبری ئەوە، مووچەی خەڵکیان کردووەتە بارمتەی پڕۆژە قۆرخکارییەکانی وەک “هەژماری من”، تەنها بۆ ئەوەی ئەو بڕە پارە کەمەش کە لە بەغداوە دێت، بخەنە ناو بانکە حیزبییەکانی خۆیانەوە و سوودی لێ ببینن. فەرمانبەرێک کە بە مانگ چاوەڕێی مووچەکەیەتی، لە کۆتاییدا دەبێت لە نۆرەی ئەی تی ئێمێکی حیزبیدا بێڕێزیی پێ بکرێت!

دەڵێم: “خراپترین فۆڕمی نادادپەروەری ئەوەیە کە دەسەڵاتداران وا خۆیان نیشان بدەن کە دادپەروەرن، لە کاتێکدا لە پشتی پەردەوە سەرقاڵی دزینی مافی گەلن.” ئەمڕۆ بەغدا و هەولێر هەردووکیان وا خۆیان نیشان دەدەن کە خەمی مووچەخۆرانیانە، بەڵام لە واقیعیدا هەردووکیان سەرقاڵی دزینی مووچە و شکاندنی شکۆی فەرمانبەرن.!

ئۆپۆزسیۆن پاشکۆی دەسەڵاتی گەندەڵ!

ڕێباز عوسمان محمد

لە هەرێمی کوردستاندا، تەنها پارتی و یەکێتی نین کە بوونەتە هۆکاری وێرانکردنی ژیانی خەڵک، بەڵکو ئەو حیزبانەی کە خۆیان ناوناوە “ئۆپۆزسیۆن”، بە بێدەنگییە ترسنۆکانەکەیان بوونەتە شەپۆلێکی تری ئەم کارەساتە. زیاتر لە ساڵێکە هەڵبژاردنی پەرلەمانی کوردستان کراوە، بەڵام بەهۆی ململانێی پارتی و یەکێتی لەسەر دابەشکردنی پۆستە ئەمنی و داراییەکان، پەرلەمان ئیفلیج کراوە و حکومەت پێکناهێنرێت. لە ناوەڕاستی ئەم قەیرانە گەورەیەدا، کە تێیدا خەڵک بێمووچەیە و دامەزراوەکان لەکار کەوتوون، حیزبەکانی ئۆپۆزسیۆن وەک مردوویان لێهاتووە؛ نە بەیاننامەیەکی توند دەردەکەن، نە خەڵک دەهێننە سەر شەقام، و نە دەوێرن تەنانەت فشاریش دروست بکەن. ئەمە ئیتر ئۆپۆزسیۆن نییە، ئەمە ڕێکەوتنێکی بێدەنگە بۆ پاراستنی بەرژەوەندییەکان لەژێر سێبەری دەسەڵاتدا!
شکستی ئۆپۆزسیۆنی کوردی تەنها لەم ڕۆژانەدا دەرنەکەوتووە، بەڵکو مێژوویەکی درێژی هەیە لە دۆڕان و بێئیرادەیی. کاتێک پارتی و یەکێتی بۆ زیاتر لە ساڵێک هەڵبژاردنەکانیان لە کاتی خۆی (ساڵی ٢٠٢٢) دواخست، ئۆپۆزسیۆن بەتەواوی نادیار بوو و جگە لە چەند بەیاننامەیەکی شەرمنانە، هیچ کاردانەوەیەکی ئەوتۆی نەبوو. ئەگەر ئەم حیزبانە خاوەنی پاڵپشتییەکی ڕاستەقینەی جەماوەری بوونایە، دەیانتوانی خەڵک بهێننە سەر شەقام و بەغدا و دەسەڵاتی کوردی ناچار بە هەڵوێست بکەن، بەڵام لەبری ئەوە، چاوەڕێی دەستی پارتی و یەکێتی دەکەن تا بزانن کەی مۆڵەتیان پێدەدەن قسە بکەن. ئەم ترسنۆکییە وای کردووە کە دەنگدەری ناڕازی متمانەی بە هەموویان نەمێنێت و لە هەڵبژاردنەکاندا بایکۆت بکات، چونکە دەزانن ئەم ئۆپۆزسیۆنە تەنها بۆ وەرگرتنی مووچە و ئیمتیازاتی پەرلەمان دروست بووە نەک بۆ گۆڕینی سیستەم.
هۆکاری سەرەکیی ئەم بێدەنگییە ئەوەیە کە بەشێک لەم حیزبە “ناڕازییانە” لەژێرەوە خەریکی مامەڵەن بۆ ئەوەی ببنە بەشێک لە حکومەتە نوێیەکە یان لانیکەم پارچەیەک لە کێکەکەیان بەرکەوێت. بۆ نموونە، پارتی بە ئاشکرا هەڕەشە دەکات کە ئەگەر یەکێتی ڕازی نەبێت، ئەوا دەچێت لەگەڵ حیزبەکانی تردا حکومەت پێکدەهێنێت. ئەمەش وای کردووە هەندێک لە حیزبەکانی دەرەوەی دەسەڵات و بێدەنگی هەڵبژێرن، نەوەک هەڵوێستێکی توند وایان لێ بکات لە دابەشکردنی پۆستەکان بێبەش ببن! ئەمەیە ئەو کارەساتەی کە کۆمەڵگەی کوردی تێیکەوتووە؛ کاتێک ئۆپۆزسیۆنیش دەبێتە بازرگان و بەدوای پشکی خۆیدا دەگەڕێت لەناو سیستەمێکی وێراندا، ئیتر کێبەرگری لەم میللەتە دەکات؟ک

تۆماس مولەر ناوی پێنج پالێوراوی براوەی مۆندیالی ئاشکرا کرد

تۆماس مولەری ئەستێرەی پێشووی ئەڵمانیا و یانەی بایرن میونشن لە لێدوانێکیدا لەکاتی ئاهەنگی کۆمپانیای ماجنتا باسی لە مۆندیالی 2026 و هەڵبژاردە پاڵێوراوەکان کرد.

مولەر وتی؛بە دڵنیاییەوە هەڵبژاردەی ئیسپانیا پاڵێوراوی یەکەمە کە بتوانێت نازناوی مۆندیالی ئەمساڵ بەدەستبهێنێت بەهۆی ئەوەی ئاستێکی نایابیان هەیە و خاوەنی بیرۆکەیەکی جوانن لە تۆپی پێدا.

وتیشی، لەبەرئەوە دەڵێم ئیسپانیا چونکە یاریزانەکانی ئەو هەڵبژاردەیە لاون و هەمیشە دەتوانن بەهرە تاکەکەسیەکانیان رێکبخەن و هاوسەنگی ناو یاریگا رابگرن بەو شێوەیەی کە خۆیان دەیانەوێت.

دەشڵێت، جگە لە ئیسپانیا هەڵبژاردەی فەرەنساش یەکێکە لە بژاردە بەهێزەکان چونکە خاوەنی پێکهاتەکەی زۆر بەهێزە و یاریزانی بەهرەمەندی زۆر نایابی تیادایە.

مولەر دەڵێت، دەتوانم سێ هەڵبژاردەی تریش وەک پاڵێوراو بۆ بردنەوەی نازناوی مۆدنیال دیاری بکەم ئەوانیش پۆرتوگال و ئەرجەنتین و ئەڵمانیان کە بەو شێوەیەش بێت هیچ کام لە بەرازیل و ئینگلتەرا پاڵێوراو نین بە بۆچوونی یاریزانە ئەڵمانیەکە.

حەشدی شەعبی وەک مۆتەکەی هەمیشەیی

ڕێبەر ئەنوەر عبدوڵا

بیرمە کاتێک داعش هات و وڵاتی خەڵتانی خوێن کرد، فەتوایەک دەرچوو بۆ دروستکردنی هێزێکی چەکداریی فریاگوزاری. خەڵکێکی زۆر ئومێدیان پێ بوو کە ئەمانە تەنها بۆ قۆناغێکی کاتین و دەبنە قەڵغانێک بۆ پاراستنی ژیانمان. وەلێ هەر زوو تێگەیشتین ئەمانە نەهاتوون بگەڕێنەوە ماڵەکانیان، بەڵکو هاتوون تا غەنیمە و خاکی ئەم وڵاتە داگیر بکەن! ئای کە چۆن مێژوو خۆی دووبارە دەکاتەوە؛ ڕزگارمان بوو لە تارمایی تیرۆر، بەڵام کەوتینە ژێر دەستی دەیان گرووپی چەکداری کە بوونەتە میراتگری هەمان ئەو ستەمەی ساڵانێکە دەمانچەوسێنێتەوە.

ئێستا کە سەیری ئەم عێراقە و ناوچە دابڕێنراوەکان دەکەم، دەبینم حەشدی شەعبی لە هێزێکی کاتییەوە بووەتە دەسەڵاتێکی هەمیشەیی. ئەوان بوونەتە دەوڵەتێک لە ناو دەوڵەتدا؛ ئابووریی خۆیان هەیە، دەروازە سنوورییەکان دەدۆشن، و بڕیاری سیاسی لە پەرلەمان و حکومەتدا دەسەپێنن. کێ دەتوانێت لێپرسینەوەیان لێ بکات؟ هیچ کەس! چونکە ئەمانیش ڕێک وەک دەسەڵاتدارە نەوت‌دزەکانی خۆمان، چەک و دامەزراوەیان تەنها بۆ پڕکردنی گیرفانی خۆیان و سەرکردەکانیان دەوێت.

لەولاشەوە، لەبری ئەوەی ئەم سیاسییە کوردانەی خۆمان قەڵغانێک بن بۆ خەڵکی ئەو ناوچانە، هەر خەریکی سپیکردنەوەی پارەن لە بانقەکانی دنیا، خەریکی کڕینی ڤێلا و ئاپارتمانی گرانبەهان لە دەرەوە. ئەوان خەریکی شەڕی ناوخۆیی و دابەشکردنی پارەی قاچاخچێتین، لە کاتێکدا هێزەکانی حەشدی شەعبی وەک مۆتەکە باڵیان بەسەر نیوەی خاکی کوردستان و ناوچە جێناکۆکەکاندا کێشاوە و ڕۆژانە سوکایەتی بە کەرامەتی تاک بە تاکی ئەم میللەتە دەکەن. ئەم داڕووتانەوەیەی ژێرخانی ئەم وڵاتە، بەرهەمی خیانەت و بێباکی ئەو دزانەیە کە بە ناوی شۆڕشگێڕییەوە میللەتیان فرۆشت و وڵاتیان ڕادەستی میلیشیاکان کرد!

ئای کە غەدری ئەم هێزە چەکدارانە و دەسەڵاتدارانی ناوخۆ چەند بە سوێ و بەئازارە! ئەگەر سەردەمی بەعس خەڵک بە کێبڵ شین و مۆر کرابێتەوە، ئێستا فیشەکی زیندووی ئەم میلیشیایانە و هێزە ئەمنییە حیزبییەکانە کە لەهەمبەر خەڵکی سیڤیل و گەنجە ناڕازییەکاندا بەکاری دێنن. هەر دەنگێکی ئازاد بپرسێت ئەم سامانە چی لێهات؟ یان لەسەر شەقامەکان دەیڕفێنن و خەڵتانی خوێنی دەکەن، یان لە زیندانە تاریکەکانیاندا دەیڕزێنن. ئەوان بوونەتە سوپایەکی داگیرکەر کە بە ناوی پیرۆزییەوە گیرفانی خەڵک دەبڕن و سەروەریی وڵات پێشێل دەکەن.

بەڵام پرسیارەکە لەوەدایە: ئەم دۆخە بە کوێ دەگات؟ ئایا چاوەڕێ دەکەن تا سەر ئەم میلیشیاگەری و تاڵانکارییە بەردەوام بێت؟

ئیدی کاتی ئەوە هاتووە بیر بکەنەوە؛ ئەو چەک و تفاقە زۆرەی کۆتانکردووەتەوە، ئەو پارە کەڵەکەبووەی لە دزینی نەوت و دەروازەکان دەستتان کەوتووە، لە ڕۆژی توڕەیی خەڵکدا بە پولێکە. زۆرێک لەو گەنجە هەژارانەی کردووتانن بە چەکدار، لە نێو دڵیاندا زۆر ناهەقی بەرچاوی خۆیان لەبەرچاوە و تەنها بژێوی ناچاری کردوون. ڕێک وەک چۆن چیرۆکی سەرانی ڕژێمی پێشوو بوونە کەلاکێک لەسەر شەقامەکان و تفێک کەم بوو بدرێت بە ڕووی لاشە بێگیانەکانیاندا، مێژوو بۆ ئێوەی بازرگانی چەک و خوێنیش هەمان چارەنووسی هەڵگرتووە. ژیرێتییەکە لەوەدایە بزانن گەلی چەوساوە، تا سەر لە ئاست ئەم داگیرکارییەدا بێدەنگ نابێت!

فەرمی.. گریزمان پەیوەندی بە خولی ئەمریکییەوە کرد و بوو بە یاریزانی ئۆرلاندا ستی

یانەی ئۆرلاندا ستی ئەمریکی بە شێوەیەکی فەرمی یەکێک لە گەورەترین گرێبەستە مێژووییەکانی راگەیاند ئەویش گواستنەوەی ئەستێرەی فەڕەنسی و گۆڵکاری مێژوویی ئەتلەتیکۆ مەدرید، ئەنتوان گریزمانە بۆ ڕیزەکانی.

ئەم هەنگاوە ستراتیژییە وەک وەرچەرخانێکی گەورە لە مێژووی یانەکە و خولی ئەمریکیدا دەبینرێت، پاڵەوانی مۆندیالی 2018 بڕیارە لە مانگی تەمموزی داهاتووەوە گەشتە نوێیەکەی لە مەیدانەکانی ئەمریکا دەست پێ بکات، کە چاوەڕوان دەکرێت ببێتە هێزێکی تەکنیکی و جەماوەری گەورە بۆ یانە نوێیەکەی.

کارگێڕی یانە ئەمریکییەکە توانییان گریزمان قایل بکەن بە واژۆکردنی گرێبەستێک کە تا کۆتایی وەرزی 2027 بۆ 2028 بەردەوام دەبێت، لەگەڵ هەبوونی بڕگەیەک لە گرێبەستەکەیدا کە ڕێگە دەدات بۆ ساڵێکی تریش و تا ساڵی 2029 درێژ بکرێتەوە.

گریزمان کە بە درێسی ژمارە 10ەوە دەبینرێت، دەبێتە یەکێک لە دیارترین ڕوخسارەکانی خولەکە لە تەنیشت ئەستێرەکانی وەک مێسی و سوارێز.

فلیک داوای یاریزانی دیکە دەکات

دیڤینسا سێنتراڵی ئیسپانی بڵاویکردەوە هانسی فلیکی راهێنەری بەرشەلۆنە لە ئێستاوە پلانەکانی خۆی دیاریکردووە بەمەبەستی گواستنەوەی چەند یاریزانێک بۆ وەرزی داهاتوو.

ئەو پێگەیە دوپاتیکردووەتەوە کە راهێنەرە ئەڵمانیەکە لەکاتی کۆبونەوەی لەگەڵ کارگێڕی یانەکەیدا لیستێکی پێنج یاریزانی پێشکەش کردوون تا لەم هاوینەدا پەلکێشیان بکەن.

ئاماژەی بەوەشداوە، لە هێڵی بەرگری فلیک داوای ئیمزاکردنی گرێبەستی لەگەڵ سێ یاریزان کردووە کە ئەوانیش ئەلیساندرۆ باستۆنی و دینزێل دومفرێسی یاریزانانی ئینتەر میلان و ڤان دی ڤینی تۆتنهامن.

راشیگەیاندووە، جگە لەوەش فلیک داوای ئیمزاکردنی گرێبەستی لەگەڵ پیدرۆ نیتۆی ئەستێرەی چێڵسی و هەڵبژاردەی پۆرتوگال کردووە بەهۆی ئەوەی دەتوانێت لە چەندین پێگەی جیاواز یارییبکات.

کۆتا یاریزانیش کە راهێنەرە ئەڵمانیەکە داوای کردووە ڤیکتۆر ئۆسیمینی هێرشىەری نەیجیریە تا لە وەرزی داهاتوودا وەک هێرشبەری سەرە ڕمی سەرەکی پشتی پێببەستێت.