کیمیچ؛هەمووتان بە ڕەنگی سوور وەرن

جۆشوا کیمیچی ئەستێرەی یانەی بایرن میونخ پێش یاری یانەکەی بەرامبەر یانەی ڕیاڵ مەدرید داوایەک ئاڕاستەی هاندەرانی یانەکەی دەکات بۆ کاتی ڕووبەڕوو بوونەوەی ئەمشەو.

کیمیچ دەڵێت؛داوا لەهاندەرانەی یانەکەم دەکەم بۆ یاریەکەی ئەمشەو دێنە یاریگاوە درێسی سوور بپۆشن،دەمانەوێت یاریگا هەموو ڕەنگی سوور بێت،ئێمە خەریکە دەگەینە کۆتاییەکانی ئامانجەکەمان لەم وەرزەدا و بەیەکەوە خەون بە سەرکەوتن دەبینین.

لەلایەکی دیکەوە ڤێنسیت کۆمپانی بەلجیکی و ڕاهێنەری یانەی بایرن میونخ داوایەکی دیکە ئاڕاستەی هاندەران دەکات و دەڵێت؛پێش ئەوەی بێنە یاریگاوە چاو و هەنگوین بخۆت بۆ ئەوەی دەنگتان سەلامەت بمێنێتەوە و ئێمە پێویستیمان بەدەنگی ئێوە هەیە بۆ یاریەکەی ئەمشەومان.

“سەرکار ڕێبوار”

ماسکێرانۆ دەستی لە پۆستی راهێنەرایەتی ئینتەر میامی کێشایەوە

یانەی ئینتەر میامی ئەمریکی بە فەرمی رۆیشتنی خافێر ماسکێرانۆی ڕاهێنەری ئەرجەنتینی راگەیاند، کە بەهۆی کاری تایبەتەوە بڕیاری داوە لە پۆستەکەی بکشێتەوە.

ماسکێرانۆ لە پەیامێکی ماڵئاواییدا سوپاسی یانە و یاریزانەکانی کرد بۆ ئەو متمانەیەی پێیان بەخشیبوو و رایگەیاند کە ئەو ساتە مێژووییانەی لەگەڵ یانەکەدا بەسەری بردون هەرگیز لەبیر ناچن.

خۆرخی ماس، خاوەنی یانەکە، ستایشی کارەکانی ماسکێرانۆی کرد و وتی: خافێر نەک تەنیا وەک راهێنەر، بەڵکو وەک بەشێکی دانەبڕاو لە مێژووی ئەم یانەیە دەمێنێتەوە، ئەو نموونەی دڵسۆزی و کارکردنی بەردەوام بوو.

ماسکێرانۆ لە یەکەم وەرزی راهێنەرایەتیدا، ئینتەر میامی بەرەو لووتکە برد و توانی دوو نازناوی گەورە بەدەستبهێنێت، کە گرنگترینیان یەکەمین نازناوی خولی ئەمریکی بوو لە مێژووی یانەکەدا.

لە ژێر سەرپەرشتی ئەودا، تیپەکە ژمارەیەکی پێوانەیی تۆمارکرد و توانی 101 گۆڵ لە وەرزەکەدا بکات، هەروەها لەسەر ئاستی جیهانی، ئینتەر میامی بووە یەکەم تیپی ئەمریکی کە بگاتە قۆناغی یەکلاکردنەوەی جامی جیهانی یانەکان و یەکەم یانەی کیشوەری کۆنکاکافیش بوو کە لە یارییەکی فەرمیدا شکۆ بە یانەیەکی ئەوروپی بشکێنێت.

رافینیا سزا دەدرێت

دوای کرانە دەرەوەی یانەی بەرشەلۆنە لە چامپیۆنز لیگ لەسەر دەستی ئەتلەتیکۆ مەدرید، رافینیای ئەستێرەی بەڕازیلی بەهۆی هەڵسوکەوتەکانییەوە بووە جێی باسی میدیاکان و تووشی رەخنە بووەوە.

سەرەڕای ئەوەی بەهۆی پێکانەوە یاری نەکرد، بەڵام رافینیا لە دوای یارییەکە توڕەیی خۆی بەسەر ناوبژیواندا رشت و بە رۆژنامەی مارکای وت: ئەم یارییە دزرا، ناوبژیوان زۆر خراپ بوو و ئەو بڕیارانەی دران بە هیچ جۆرێک جێگەی بڕوا نەبوون.

هەروەها رەخنەی لە شێوازی یاریکردنی ئەتلەتیکۆ گرت و وتی کە ئەوان چەندین هەڵەیان کرد و کارتی زەردیان وەرنەگرت، ئەمەش وای کردووە گومان هەبێت کە ترسێکی راستەقینە لە سەرکەوتنی بەرشەلۆنە هەبووبێت.

ئەم هەڵوێستەی رافینیا تەنیا لە قسەدا نەمایەوە، بەڵکو لە کاتی ماڵئاواییکردن لە هاندەرانی بەڕشەلۆنە، رووی کردە هاندەرانی ئەتلەتیکۆ و بە ئاماژەی دەست سووکایەتی پێ کردن و پێی وتن: بۆ دەرەوە، بەو واتایەی کە لە قۆناغی داهاتوودا دەردەکرێن.

لە ئێستادا یەکێتی تۆپی پێی ئەوروپا خەریکی لێکۆڵینەوەیە لەو لێدوان و ئاماژانەی رافینیا، و بەپێی رۆژنامەی ئاس، ئەگەری هەیە هاوشێوەی نێیمار بۆ چەند یارییەک رابگیرێت، ئەمەش بەشداریی ئەو یاریزانە لە وەرزی داهاتووی چامپیۆنز لیگ دەخاتە ژێر مەترسییەکی گەورەوە.

مباپێ پەیامێک بۆ ئێکێتێکی دەنێرێت

کیلیان مباپێ ئەستێرەی یانەی ڕیاڵ مەدرید پێش یاری ئەمشەوی یانەکەی بەرامبەر بایرن میونخ،لەکەمپی مەشق و ڕاهێنانەکانی یانەکەی پەیامێکی هاوسۆزی بۆ هۆگۆ ئێکێتێکێ هاونیشتیمانی دەنێرێت.

پەیامەکەی مباپێ بۆ ئێکێتێکێ دانانی ستۆریەکی ساتی تووش بوونی یاریزانەکە بوو بە پێکانەکەی و بەدانانی ئیمۆجی دڵتەنگی و نزا کردن بۆ چاکبوونەوەی یاریزانەکە دڵتەنگی خۆی دەربڕی بۆ ئەو پێکانە سەختەی دووچاری بووە.

ئێکێتێکێ شەوی ڕابردوو لەیاری لیڤەرپوڵ بەرامبەر پاریس سانجێرمان دووچاری پێکانێکی سەخت بوو،کە بەپێی زانیاریەکان بێت تاکو مانگی 9ی ئەمساڵ لەیاریگاکان دادەبڕێت،وە بەو شێوەیەش ئەم وەرزەی کۆتایی هاتووە و ناتوانێت لەگەڵ فەڕەنسا بەشداری مۆندیال بکات.

“سەرکار ڕێبوار”

ئەمشەو قۆناغی کۆتایی پاڵەوانیەتی عێراق بۆ یاریە ئەلیکترۆنیەکان بەڕێوەدەچێت و 13 تیمی کوردی بەشدارن

ئەمشەو لە کاتژمێر 7:00 بەکاتی هەرێمی کوردستان پاڵەوانیەتی نیشتیمانی یاریە ئەلیکترۆنیەکانی عێراق بۆ یاری پەبجی مۆبایل بەڕێوەدەچێت،کە لەکۆی 16 تیم 13 تیمیان کوردین،ئەمەش بۆ یەکەمین جارە لەمێژوودا ئەم ژمارە زۆرە لەتیمی کوردی سەربکەون بۆ قۆناغی کۆتایی پاڵەوانیەتیەکە.

پاڵەوانیەتیەکە لەلایەن کۆمپانیای پەبجی ڕاستەوخۆ کراوەتەوە،تیمە کوردیەکانیش ئەمساڵ پشکی شێریان هەیە لە کورسیەکانی پێشەوەی ڕیزبەندی،کە ئەمساڵ 4 تیم دەتوانن بلیتی پاڵەوانیەتیەکانی دەرەوەی عێراق بەدەست بێنن لەڕێی ئەم کۆتاییەوە،کە لەماوەی 4 ساڵی ڕابردوودا تیمە کوردیەکان پلەی یەکەمینیان لەم پاڵەوانیەتیە بەدەستهێناوە و بوونەتە پاڵەوان لەسەر ئاستی عێراق.

براوەی یەکەمی پاڵەوانیەتیەکە دەبێتە خاوەنی 5 ملیۆن دیناری عێراقی و سەردەکەوێت بۆ پاڵەوانیەتی جیهانی پەبجی،کە ئەویش لە جاکارتای مالیزیا بەڕێوەدەچێت.

“سەرکار ڕێبوار”

نرخی نەوت ئاستی 100 دۆلاریان تێپەڕاند

ئەمڕۆ دووشەممە، لەگەڵ کردنەوەی بازاڕەکانی ئاسیا، نرخی نەوت بەرزبوونەوەیەکی خێرای بەخۆیەوە بینی و جارێکی دیکە سنووری 100 دۆلاری تێپەڕاند. ئەم هەڵکشانە دوای زنجیرەیەک گۆڕانکاری سیاسی و ئابووری دێت کە کاریگەری ڕاستەوخۆیان لەسەر بازاڕ هەبووە. ​ نەوتی برێنتی دەریای باکوور تەنیا لە مامەڵەکانی ئەمڕۆدا نزیکەی 6 دۆلار و 71 سەنت چۆتە سەر نرخەکەی، بەمەش نرخی هەر بەرمیلێک گەیشتە 101 دۆلار و 91 سەنت. ​ هاوکات نەوتی سووکی تەکساسی ئەمریکاش بازدانێکی گەورەتری تۆمارکرد و 7 دۆلار و 60 سەنت گرانتر بوو، لە ئێستادا بە 104 دۆلار و 16 سەنت مامەڵەی پێوەدەکرێت. ​ هۆکاری سەرەکی ئەم ناسەقامگیرییەی نرخەکان دەگەڕێتەوە بۆ شکستهێنانی دانوستاندنەکانی پاکستان. لە کاردانەوەی ئەمەشدا، دۆناڵد ترەمپ ڕایگەیاند کە کەشتییە جەنگییەکانی ئەمریکا تەنگەی هورمز بەڕووی کەشتییەکانی ئێراندا دادەخەن، ئەمەش ترسی کەمبوونەوەی خستنەڕووی نەوتی لە بازاڕە جیهانییەکاندا دروستکردووە.

هەناردەی نەوتی کوردستان لە رێگەی بەندەری جەیهانی تورکی بۆ یه‌ك مانگ گه‌یشته‌ یەک ملیۆن و 271 هەزار و 200 بەرمیل نه‌وت

وەزارەتی نەوتی عێراق رایگەیاند، داهاتی هەناردەی نەوت بۆ مانگی ئادار، نزیکەی دوو ملیار دۆلار بووە، کە بەراورد بە مانگی شوبات نزیکەی پێنج ملیار دۆلار کەمی کردووە و رێژه‌ی هه‌نارده‌ی نه‌وت له‌رێگای كوردستانیشه‌وه‌ ئاشكرا ده‌كات.

کۆمپانیای بەبازاڕکردنی نەوتی عێراق ‘سۆمۆ’ لە راگەیەندراوێکدا کۆی گشتی هەناردە و داهاتی نەوتی عێراقی بۆ مانگی ئادار ئاشکرا کرد و رایگەیاند، هەناردەی نەوتی خاوی عێراق بۆ مانگی ئادار 18 ملیۆن و 604 هەزار و 951 بەرمیل بووە، داهاتەکەشی زیاتر لە یەک ملیار و 957 ملیۆن و 121 هەزار دۆلار بووە.

بەگوێرەی ئاماری سۆمۆ کۆی قەبارەی نەوتی خاو لە کێڵگە نەوتییەکانی ناوەڕاست و باشووری عێراق، کە لە مانگی رابردوودا هەناردە کراوە، گەیشتووەتە 14 ملیۆن و 561 هەزار و 534 بەرمیل بووە.

ئاماژه‌ی به‌وه‌شداوه‌ هەناردەی نەوتی هەرێمی کوردستان لە رێگەی بەندەری جەیهانی تورکی یەک ملیۆن و 271 هەزار و 200 بەرمیل بووە، هەروەها هەناردەی نەوتی کەرکووکیش لەرێگەی بەندەری جەیهان دوو ملیۆن و 772 هەزار و 217 هەزار بەرمیل بووە.

ئەمە لەکاتێکدایە تەنیا هەناردەی نەوتی هەرێمی کوردستان لە مانگی شوباتدا پێنج ملیۆن و 551 هەزار و 610 بەرمیل بووە.

نرخی بەرمیلێک نەوت لەبازاڕەکانی جیهاندا بۆ خوار 98 دۆلار دابەزی

​ئەمڕۆ سێشەممە نرخی نەوت لە بازاڕە نێودەوڵەتییەکاندا ڕووی لە دابەزین کرد، ئەوەش بەهۆی کاریگەریی هەواڵەکانی پەیوەست بە ئەگەری بەردەوامبوونی گفتوگۆکانی نێوان ئەمریکا و ئێران بۆ گەیشتن بە ڕێککەوتن و درێژکردنەوەی ئاگربەست.

لەگەڵ کردنەوەی بازاڕەکانی ئاسیا، نرخی بەرمیلێک نەوتی برێنتی دەریای باکوور بۆ گرێبەستەکانی مانگی حوزەیران بە ڕێژەی 1.88٪ دابەزی و گەیشتە 97 دۆلار و 49 سەنت.

هاوکات نرخی نەوتی سووکی تەکساسی ئەمریکاش بۆ ڕادەستکردنی لە مانگی داهاتوودا، دابەزینێکی زیاتری تۆمار کرد و بە ڕێژەی 2٪ نرخەکەی شکا، بە شێوەیەک کە هەر بەرمیلێک بە 96 دۆلار و 91 سەنت مامەڵەی پێوەکرا.

​ئەم گۆڕانکارییانە لە نرخدا لە کاتێکدایە کە جەی دی ڤانس، جێگری سەرۆکی ئەمریکا، دوای تەواوبوونی دانوستاندنەکانی پاکستان و گەڕانەوەی بۆ وڵاتەکەی، ڕایگەیاند کە هەنگاوەکانی داهاتوو لە پرۆسەی گفتوگۆکاندا بە تەواوی بەستراوەتەوە بە هەڵوێستی کۆتایی ئێرانەوە.

ئاماژەکان بۆ ئەوە دەچن کە بازاڕی وزە بە هەستیارییەوە چاودێری ئاراستەی دیپلۆماسی نێوان واشنتن و تاران دەکات، چونکە هەر ڕێککەوتنێکی ئەگەری دەبێتە هۆی کەمبوونەوەی گرژییەکان و کاریگەری ڕاستەوخۆی لەسەر هاوسەنگی خواست و خستنەڕوو لە جیهاندا دەبێت.

نرخی ئۆنسەیەک زیو بەرزبووەوە و گەیشتەوە 77 دۆلار

ئەمڕۆ سێشەممە 14-4-2026 نرخی زیو لە بازاڕەکانی جیهاندا بەرزبوونەوەی بەخۆوە بینی و نرخی ئۆنسەیەک زیو 1.49 دۆلار زیادی کرد و گەیشتە 77 دۆلار، بەمەش لە ئێستادا نرخی 1 کیلۆگرام زیو بە 2,475 دۆلار مامەڵەی پێوە دەکرێت.

ئەم گۆڕانکارییە لە نرخەکاندا لە کاتێکدایە کە ڕاپۆرتە میدیاییەکان باس لە ئەنجامدانی گەڕی دووەمی دانوستاندنی ڕاستەوخۆ لە نێوان ئەمریکا و ئێران دەکەن بە مەبەستی گەیشتن بە ڕێککەوتنی کۆتایی بۆ ئاگربەست.

شارەزایان ئاماژە بەوە دەکەن کە سەرەڕای ئەم بەرزبوونەوەیە هێشتا نرخی زیو بە ڕێژەی 20% بیست لە سەد کەمترە بەراورد بەو نرخەی لە سەرەتای دەستپێکردنی شەڕی ئێراندا تۆماری کردبوو.

وەزارەتی نەوتی عێراق پلانی نوێ بۆ هەناردەکردنی نەوت دادەڕێژێت

وەزارەتی نەوتی عێراق، ئەمڕۆ داڕشتنی پلانی جێگرەوەی بۆ دەستەبەرکردنی هەناردەی نەوت ڕاگەیاند؛ هاوکات جەختی کردەوە کە لێکتێگەیشتنی بەردەوام هەیە بۆ دوورخستنەوەی عێراق لە شوێنەوارەکانی گەمارۆدانی گەرووی هورمز. سائیب بەزوون، وتەبێژی وەزارەتی نەوت ڕایگەیاند: “سیاسەتی وەزارەت بریتییە لە لەدەستنەدانی هیچ دەرفەتێک بۆ هەناردەکردنی نەوت،” ئاماژەی بەوەش کرد کە “وەزارەت لە لێکتێگەیشتندایە بۆ کردنەوە و چالاککردنی ئەو دەروازە و ڕێڕەوانەی لەبەردەستدان.” ئەوەشی خستە ڕوو کە “وەزارەت بەردەوامە لە چالاککردنی دەروازە لاوەکییەکان، لەوانە هێڵی جیهان و هێڵی نیشتمانی کە توانای گواستنەوەی ملیۆنێک و 600 هەزار بەرمیلی هەیە،” ڕوونیشیکردەوە کە “لە ئێستادا نەوتی ڕەش لە ڕێگەی (بانیاس)ی سووریاوە هەناردە دەکرێت، جگە لە هەبوونی لێکتێگەیشتن بۆ گەڕانەوەی هێڵی سعوودیە کە لە ساڵی 1991ـەوە وازی لێ هێنراوە.” بەزوون جەختی کردەوە لەسەر “بوونی لێکتێگەیشتن لەگەڵ هەردوو لایەنی ئەمریکی و ئێرانی بۆ خۆلادان لەو گەمارۆیەی خراوەتە سەر گەرووی هورمز، هەروەها لەگەڵ سەرجەم لایەنەکان بۆ گەرەنتییکردنی هەناردەکردن،” ئاماژەی بەوەش کرد کە “وەزارەت دەستبەرداری هیچ هەوڵێک نابێت چونکە ئەمە پەیوەندی بە ئابووریی نیشتمانییەوە هەیە، بەوپێیەی دەوڵەتی عێراق لە ئابوورییەکەیدا بە ڕێژەی زیاتر لە 90% پشت بە هەناردەکردنی نەوت دەبەستێت.”