پێشنيوهڕۆى ئهمڕۆ پێنجشهممه 2026/5/14 بە ئامادەبوونی بەڕێز نێچیرڤان بارزانی، سەرۆکی هەرێمی کوردستان و فهرماندهى گشتيى هێزهكانى پێشمهرگه، ڕێوڕەسمی دەرچوونی خولی (سییەم)ی پێگەیاندن لە کۆلێژی سەربازیی دوو لە زاخۆ بەڕێوەچوو.
لەو ڕێوڕەسمەدا، كه بهڕێزان وهزيرى كاروبارى پێشمهرگه و ژمارهيهك له پلهدارانى پێشمهرگه ئامادهى بوون، (٣٥٩) ئەفسەری گەنجی هەرێمی کوردستان کە خاوەنی بڕوانامەی بەکالۆریۆسن، دوای بەکۆتاهێنانی (٩) مانگ خوێندنی سەربازی، ئەکادیمی و پراکتیکی، بڕوانامەی دەرچوونیان پێبەخشرا و چوونە ناو ڕێزەکانی وەزارەتی کاروباری پێشمەرگە.
لە کۆتایی ڕێوڕەسمەکەدا، سەرۆک نێچیرڤان بارزانی گوتارێکی پێشکەش کرد و تێیدا وێڕای پیرۆزبایی لە دەرچووان و خێزانەکانیان، تیشکی خستە سەر پێگەی یاسایی و نیشتمانیی پێشمەرگە و بارودۆخی سیاسیی عێراق و پێشهاتهكانى ناوچەکە. ئهمه دهقهكهيهتى:
دەرچوویێن هێژا، پێشمەرگەیێن قەهرەمان، ئامادەبوویێن خۆشتڤى،
ڕۆژ باش،
هوين ههمى گهلهك بخێر هاتن، سەرچاڤا، بۆ ڕێورەسمێن دەرچوونا خولا (سيهێ) یا پێگەهاندنێ ل کۆلێژا سهربازی یا دویێ ل زاخۆ. ئەڤ دیمەنە جهێ شانازیيا مە و هەمی گەلێ کوردستانێيه.
گهلهك خۆشحالم كو ئەڤرۆ پێكڤه شاهدێن دەرچوونا (359) ئەفسەرێن گەنجێن ههرێما كوردستانێينه. وان پشتى (9) ههيڤا، خويندنا خۆ یا سهربازى، ئەکادیمی و پراکتیکی ب دوماهی ئینا و ئێدى دێ بنه بهشهك ژ هێزێن وهزارهتا كاروبارێن پێشمهرگهى.
جهێ سهربلنديێ و دەستخۆشیێیە، کو پشتی بدوماهی ئینانا خويندنا زانکۆیى و بهدهستڤهئينانا بهكهلۆيۆرسێ، هوين خۆبهخشانه، ب حەز و ڤيانا خۆ هاتنە ناڤ ڕێزێن خويندنا سهربازى؛ داکو ببنە ئەفسەر د ڕێزێن پێشمەرگاتيێدا.
ئەڤە نیشانهيێ دلسۆزی و وەفاداری و بهرههڤييا هەوەیە بۆ خزمەتکرن و پاراستنا کوردستانێ. ئەڤرۆ د ڤێ ئاهەنگێدا ئهم ههمى دگەل مالباتێن ههوە پشکدارين و ئهم ههمى ڤێكرا ب وە سهربلندين.
ژ دل، ئو ب گهرمى پیرۆزباهیێ ل هەوە و ل مالباتێن وە یێن هێژا دکەم. ل وان و ل هەوە و ل مه ههميا پیرۆز بیت. هیڤیا سەرکەفتنێ ل ژيانێ بۆ هەوە دخوازم.
دەرچوویێن هێژا،
ژ ڕۆژا كو پێشمەرگە ههيه و هەتا ئەڤرۆ، پێشمەرگاتى جهێ شانازیێ و سەرفرازيێ و بەرپرسیاریەتييەکا مەزن بوویە. پێشمەرگاتى و پێشمهرگهبوون، ئەرکەکێ گەلەک پیرۆزە و پشکەکا گرنگ يا ناسناما نيشتمانی و نەتەوەیی یا کوردستانێيه. ئەڤە بەردەوامییا خەباتا دوير و درێژە بۆ پاراستنا گەلێ کوردستانێ ب ههمى پێكهاتێن خۆڤه.
لەوما دەرچوونا هەوە یا ئەڤرۆ و سەرکەفتنا هەوە د خويندنێدا، نە دويماهییا ڕێكێیە. نەخێر، دڤێت بزانن: ئەوا ئەڤرۆ هوین دەستپێ دکەن، دەستپێکا خزمەت و ئەرکێن هەوە یێن نويیە دگەل دهزگههێن حکوومەتى بۆ خزمەتكرنا کوردستانێ.
ئهڤرۆ باوەرناما هەوە بتنێ دەستکەفتەکێ ئەکادیمی نیيه، بەلکى پەیمانەکا شەرەفێ و سیمبۆلا دلسۆزی و وەفاداریيا ههوهيه بۆ كوردستانێ. ئەمانەتەکێ مەزنه بۆ خزمەتکرنا گەل و وەلاتێ خۆ، ههروهسا نیشانا ئامادهيى و بەرهەڤییا هەوەيە بۆ هەر قوربانيیەکێ د ڕێكا سهرفرازييا وهلاتيدا.
پێشمەرگەی ب درێژاهییا دیرۆکا بزاڤا ڕزگاریخوازا گەلێ کوردستانێ، قوربانیێن گەلەک مەزن داینە. خوینا خۆ دايه و ب گیانێ بهرخودانێ، بەرەڤانی ل ئاخا کوردستانێ و گەلێ خۆ کریە. دیرۆکا پێشمەرگەی یا پڕە ژ قههرەمان و قوربانیێن مەزن بۆ ئازادیێ و بۆ سەرفرازییا کوردستانێ.
دەمێ کو (داعش) مەزنترین ڕێکخستنا تیرۆرستی ل جیهانێ؛ هێرش کریە سەر عێراقێ و کوردستانێ، پێشمەرگە بوون کو ب سهرۆكاتيا جهنابێ سهرۆك مهسعوود بارزانى، ب گیان و خوینا خۆ، داعش ل بەرۆكێن شەڕی تێکشکاند و نەهێلا کوردستان بکەڤیتە دەستێ وان تیرۆرستا. ژبهر هندێ، هەتا کورد و کوردستانى بمینن، پێشمەرگە دێ ههر مینين ئیلهامبهخش بۆ گەلێ کوردستانێ و دێ ههر مينن پارێزەر و سیمبۆلێ بەرهڤانى و خۆڕاگريا مللهتێ مه.
د ڤێ هەلکەفتێدا، جارەکا دی سپاس و پێزانینا هەرێما کوردستانێ پێشكێشى هێزێن هەڤپەیمانییا نێڤدەولەتی ب سهرۆكاتييا ئهمهريكا دکەم کو د شەڕێ دژی داعشێدا؛ پشتەڤانییا پێشمەرگەی کرین.
هاریکاریا وان بۆ پێشمەرگهيان و بۆ سوپایێ عێراقێ، پشتەڤانییەکا ستراتیژی و ئێكلاكهر بوو. سپاس پێزانين بۆ هاريكارى و پشتەڤانییا وان یا بەردەوام بۆ پرۆسا چاکسازیێ ل وەزارەتا کاروبارێن پێشمەرگەى.
هەروەسا پێويسته ئاماژێ بدهينه گرنگییا هەماهەنگی و هەڤکارییا ناڤبەرا پێشمەرگەى و هێزێن سوپایێ عێراقێ بۆ بهرهنگاربوونا تیرۆرێ. کارێ هەڤپشکێ هەردولا پێویستە بۆ پاراستنا ئاسایش و ئارامیێ بتایبەتی ل دەڤەرێن ماددێ (140)، چونكى ب باوهرييا مه داعش هێشتا مەترسی و گەفە ل سەر ئاسایش و تهناهييا عێراقێ و ڤێ دەڤەرێ.
د ڤێ ڕۆژێدا، د ڤێ ههلكهفتێدا، سەرێ ڕێزێ بۆ خوینا شەهیدێن خۆ دچەمینین، چ پێشمهرگه، چ یێن سوپایێ عێراقێ، چ حەشدا شەعبی، کو گیانێ خۆ کرينە قوربانی بۆ پاراستنا وهلاتى.
ئامادەبوویێن هێژا،
د ڤێ هەلکەفتێدا پێويسته بێژين كو: پرۆسا ئێکگرتنا هێزێن پێشمەرگەی وهكى پێویست بڕێڤە ناچیت و ئەو پێشکەفتنا کو پێويست بوو، ههتا نها نەبوويه.
گەلێ کوردستانێ ب سالايە لهيڤييا ئێکگرتنا پێشمەرگەیه. دۆستێن مەيێن هەڤپەیمانییا نێڤدەولەتی، پشتەڤانی و پلان و هاریکارییا پێشکێش دکەن، چاڤەڕێنه كو ئهم ئیرادەیهكا سیاسی یا دروست يا بهێز نيشان بدهين. بهلێ مخابن ههتا نۆكه نههاتيه كرن و ڤێ ئێكێ زيانهكا مهزن گههاندييه ناڤێ ههرێما كوردستانێ.
ژ هەمیێ گرنگتر، ئەڤ دەرچوویێن گەنج و دلسۆزێن ئەڤرۆ ئهم دبینین، هەژی وێ چەندێنە بچنە ناڤ هێزەکا نيشتمانى یا ئێکگرتی. ئهڤ ڕهوشه هيچ نه يا باشه و ئهم قهت ژێ ڕازى نينه.
دگەل هندێ ژی، ديسا دبێژم: ئێكگرتنا پێشمهرگهى پێويستييهكا چارهنڤيسسازه بۆ ههرێما كوردستانێ و پێدڤييه سهركهڤيت. ئەم ل سەرۆکاتیا هەرێما کوردستانێ و حكوومهتا ههرێمێ دێ بهردهوام بين، دێ ئهركێ خۆ بينين بۆ هندێ ئهڤ كاره بێته ئهنجامدان و ئهڤ پرۆسهيه سهركهڤيت. بۆ ڤێ چهندێ دگەل دۆستێن مە ل هەڤپەیمانییا نێڤدەولەتی دێ بەردەوام بین.
پێشمەرگە بهشهكه ژ سیستەمێ بەرهڤانيێ یێ عێراقێ. ئهڤ كۆلێژه بخۆژى ل زاخۆ وهكى كۆلێژهكا سهر ب وهزارهتا بهڕهڤانيێ يا عێراقێ، نيشانا ڤێ چهندێيه. ژبهر هندێ دڤێت عێراق هەمی ئهرك و پێگيرى یێن خۆیێن یاسایی و دهستوورى بەرامبەر پێشمەرگەی بجى بینیت و هاریکاری و پشتەڤانی و چەک و تەقەمەنییا بۆ پێشمەرگەی دابین بکەت.
پێشمەرگە نە مەترسیيە، بەلکى پارێزەرێ وهلاتييه و بهرێ ژى ل شهڕێ ئازادييا عێراقێ، ل پاراستنا ئاسايشا بهغدا و ل شهڕێ دژى داعشێ، ئهڤه ب ڕۆنى پێشمهرگهى يا سهلماندى كو پارێزهرێ وهلاتييه.
ئامادەبوویێن هێژا،
دەڤەرا مە ئەڤرۆ د ڕهوشهكا گران و ئالۆزدا دەرباز دبیت. گرژیێن هەرێمی، کاریگەرییا خۆ لسەر هەميا کریە. ئەم ل هەرێما کوردستانێ تهئكيدێ لسەر هەلویستێ خۆ یێ جێگیر دکەین کو ئەم دگەل چارەسەرى یێن ئاشتیانەينه بۆ هەمی کێشە و ناكۆكييا. مه نهڤێت عێراق و هەرێما کوردستانێ ب چ ڕەنگەکێ ببيته بهشهك ژ ڤان كێشه و ئالۆزيا.
د ڤێ چارچۆڤێدا، ئەم ب گەشبینی چاڤەڕێی کارکرنێينه دگەل حکوومەتا بهێت ل بەغدا و دگەل سەرۆکوەزیرێ دهستنيشانكرى ڕێزدار (عهلى زهيدى)، ب گیانێ ههڤپشكييا نيشتمانى یا ڕاستەقینە و لهسهر بنهمايێ دهستوورێ عێراقێ ئەم ئامادهينه پێکڤە کار بکەین بۆ خزمەتکرنا هەمی عێراقێ، ب شێوەیەکێ کو سيستهمێ فيدرالى و مافێن دەستووری يێن ههرێما كوردستانێ و یێن هەميا، بهێنە پاراستن و تهناهى و گەشەپێدان و ئاڤەدانی، بۆ هەمی عێراقێ بێ جوداهى بێنه مسۆگهركرن.
هەرێما کوردستانێ يا فيدرالى پشکەکا گرنگا عێراقێيه. پاشەڕۆژا عێراقێ و يا ههرێما کوردستانێ پێکڤە گرێدایيە. سەرکەفتنا مە ئێکە، تهحهددى و چارهنڤيسێ مە ژى، هەڤپشکن. بهێزييا بهغدا، ئانكو بهێزييا ههرێما كوردستانێ، بهێزييا ههرێما كوردستانێ، هێزهكه بۆ بهغدا.
ژبهر هندێ کارێ هەڤپشک یێ لسەر بنەمایێ دەستووری و ڕێزگرتنا دولایەنە و ههڤپشكييا نيشتمانى، بتنێ ڕێكە بۆ ئاڤاکرنا عێراقەکا بهێز و تهنا کو خزمەتا هەمی وەلاتیێن خۆ بکەت. ئەم د ئیرادەیا خۆدا جددینە بۆ چارەسەریا ههمى كێشه و ناكۆكييا لسهر بنهمايێ دهستوورى.
دەرچوویێن خۆشتڤى،
ژبیر نەکەن: کۆلێژا سهربازى پەروەردەکرن و پێگەهاندنا هەوە، گرتیە سهر ملێ خۆ، داکو وەک فەرماندەیێن خودان شیان، ئهرك و بهرپرسياريهتييا خۆ بجى بينن. داكو دگهل پاراستنا کوردستانێ، بەرەڤانیێ ل دادپەروەریێ و مرۆڤایەتیێ بکەن. بنەما و بەهایێن بلندێن نيشتمانی و قوربانیدان و دیسپلین، بنەمایێن سەرەکینە؛ کو پێویستە هەردەم د هزر و دلێ هەوەدا بن.
هوين پێشمهرگه، سوپايێ ههمى كوردستانێنه ب ههمى پێكهاتێن خۆڤه. ڕۆلێ هەوە بتنێ د مەیدانێن شەڕیدا نیيە. ڕۆلێ ههوه نه بتنێ فێربوونا هونهر و تهكنيكێن سهربازييه، بەلکى دڤێت ئەرکێ هەوە بەرفرەهتر بيت بۆ ئاڤاکرنا جڤاکێ تهنا و ئارام. بۆ ڕهتكرنا تونڕهويێ، دهمارگيريێ و تيرۆرێ.
بەرپرسیاریەتييا پاراستنا بەهایێن ئازادى، ئاشتى، دیموکراسی، مافێن مرۆڤی و جڤاكا مهدهنى يا ڤهكرى، پێكڤهژيانێ و قهبوولكرنا ئێكودو، لسەر ملێن هەوەیە. ببنە سهركرده و ببنه نموونە، بۆ پاراستنا دادپەروەریێ و بەرەڤانیکرنێ ل مافێن هەمی وەلاتیێن هەرێما کوردستانێ و عێراقێ.
باوهرييا مه ههميا ب هەوە دهێت کو هوین دێ شێن بەرەنگاری تهحهدييا ببن و د ئەرکێن خۆدا سەرکەڤن، داکو ب باشترین شێوە خزمەتا وهلاتێ خۆ بکەن. ببنە هێزا نيشتمانی یا کوردستانێ د چارچۆڤێ وەزارەتا کاروبارێن پێشمەرگەيدا. چ جارا نەبنە بهشهك و لایەنەکێ کێشە و ململانێ یێن سیاسی.
ل دوماهیێ،
ب گهرمى سپاسى و دهستخۆشيێ پێشكێشى ڕێزداران ڕاگر و مامۆستا و بەرپرس و ڕێڤەبەرێن کۆلێژا سهربازى يا زاخۆ دکەم. کار و خزمەت و دلسۆزییا وان؛ جهێ پێزانینەکا مەزنە.
ئەرکێ وان؛ يێ پیرۆز و ڕۆڵێ وان گەلەکێ گرنگە بۆ باشترکرن و پێشڤهبرنا ئەرکێن پێشمەرگەی و پێگەهاندنا نڤشهكێ نوى ژ پارێزەرێن وهلاتى، کو لسەر زانستێن سهربازى و ڤيانا نيشتمانى پەروەردە بووینە. سپاسيا ههوه ههميا دكهم، دهستخۆشيێ ل ههوه ههميا دكهم، ل ڕاگرێ كۆڵێژێ و ههمى ئهفسهرێن وه.
سلاڤ و ڕێز بۆ گيانێ پاقژێ هەمی شەهیدێن كوردستانێ، یێن كو خەبات کرین و گیانێ خۆ بۆ کوردستانێ كريه قوربان دا ئهم ئهڤرۆ پێكڤه ڤێ ئاههنگێ بگێڕين. سلاڤ بۆ شەهیدێن زیندی، بۆ هەمی وا قههرەمانێن کو د ئەرکێ پاراستنا کوردستانێدا، بریندار بووین. ژ ڤێرێ، سلاڤ و ڕێزێن من قهبوول بكهن، دهسێ وان ماچى دكهم. هيڤييا ساخبوونێ ب ئانههييا خودێ بۆ وان ههميا دخوازم.
جارەکا دی ب گەرمی و ژ دل پیرۆزباهیێ ل هەوە ههميا دکەم دهرچوويێن هێژا. هیڤیا سەرکەفتن و سهرفرازيێ بۆ هەوە ههميا دخوازم. هيڤى دكهم خودێ هاريكارێ ههوه بيت دڤێ ژيانا وه دهستپێ كرى. ب ئانههييا خودێ ههوه ببينم ب خۆشى و سهلامهتى و سهركهفتن.
دڤێت سپاسييا ئيدارا سهربخۆ يا زاخۆ ژى بكهين كو هاريكاريا كۆلێژێ كريه و ئهم وان پێشكهفتنان ژى دبينين يێن كو ل باژێرێ زاخۆ ئهنجام داى. هيڤيا ئهمه ئهوه ههمى لا بهردهوام و سهرفراز و سهركهفتى بن. كوردستان ههر ئاڤهدان بيت و هوين ژى پارێزهرێن كوردستانێ سهرفراز و سهركهفتى بن.
زۆر سپاس.
