دوو یانەی ئەڵمانی بە ئاگرێک دەسوتێن

دوای ڕووداوەکانی یاری کۆتایی جامی ئەڵمانیا،کە لەنێوان بایرن میونخ و شتوتگارتەوە بەڕێوەچوو،لەیاریەکەدا هاندەرانی هەردوو یانە بەتوند و تیژی زۆرەوە هاتنە نێو یاریگا و هوتافی ناشرینیان دژی یەکێتی تۆپی پێی ئەڵمانیا دەگوتەوە.

بەپێی زانیاریەکان هاندەران لەم کارەدا مەبەستیان ڕەخنە گرتن بووە لە گرانی بلیتەکان و پێیانوایە ئیتر تۆپی لەو وڵاتە بۆتە موڵکی کەسی دەوڵەمەند و سەرمایەدارەکان وە لەسەر ئەم ئاژاوەی یاریەکەش ماوەی چەند خولەکێک ناوبژیوان یاریەکەی وەستاند.

لای خۆیانەوە یەکێتی تۆپی پێی ئەڵمانیا دەستی کردوە بەلێکۆڵینەوەی ورد بەردەوامە بۆ ڕووداوەکانی ئەو یاریە و هەڕەشەی سزای توند هەیە لەسەر هەردوو یانە،کە ڕەنگە بۆ چەند یاریەکی داهاتوو هاندەران نەتوانن ئامادەی بینینی یاریەکانی یانەکانیان بن.

“سەرکار ڕێبوار”

ئیسپانیا بەبێ شاهانە؛ نەریتە کۆنەکەی ئێنریکی زیندوو دەبێتەوە

​پێکهاتەی نوێی هەڵبژاردەی ئیسپانیا هەمیشە دەنگدانەوەی گەورە لە میدیاکاندا دروست دەکات، بەتایبەت کاتێک ناوی یاریزانانی یانەی شاهانەی تێدا نەبێت. بەڵام ئەم بڕیارەی دێ لا فۆنتێ یەکەمین حاڵەت نییە لە مێژووی “لا ڕۆخا”دا، چونکە پێشتریش لویز ئێنریکی، ڕاهێنەری پێشووی ئیسپانیا، لە جامی یۆرۆی 2020دا هەمان هەنگاوی نا و هاندەرانی ڕیاڵ مەدریدی توڕە کرد.

​لەم چوارچێوەیەدا، لە کاتی ئامادەکارییەکان بۆ یۆرۆی 2020، لە کاتێکدا یاساکانی پاڵەوانێتییەکە ڕێگەیان بە ئێنریکی دەدا 26 یاریزان بۆ لیستەکەی دەستنیشان بکات، ئەو تەنیا 24 یاریزانی بانگهێشت کرد. غافڵگیرکردنی گەورەش ئەوە بوو کە لە نێو ئەو لیستە کورتکراوەیەدا، ناوی هیچ یاریزانێکی ڕیاڵ مەدرید بەدی نەدەکرا، کە ئەمەش هاوشێوەی بڕیارەکانی ئێستای دێ لا فۆنتێیە.

​سەبارەت بە هۆکاری ئەو بڕیارە مشتومڕاوییە، ئێنریکی لەو کاتەدا بەرگری لە ستراتیژییەتەکەی خۆی کرد و ڕایگەیاند: “نامەوێت فشار لەسەر تیپەکەم دروست بکەم، دەمەوێت هەلی یاریکردن بە سەرجەم یاریزانەکانم بدەم، بۆیە تەنیا 24 یاریزانم بانگهێشت کردووە.” بەمەش سەلماندی کە متمانەی تەواوی بەو گروپە هەیە کە هەڵیبژاردوون بەبێ پشتبەستن بە ئەستێرەکانی پایتەخت.

ئارسیناڵ لە مێژووی پرێمەرلیگدا: نازناوێک و ژمارەیەکی پێوانەیی دارایی

دەرەنجامی دارایی پرێمەرلیگ بۆ وەرزی ئەمساڵ ئاماژە بە سەرکەوتنێکی مێژوویی ئارسیناڵ دەکات نەک تەنها لە ڕووی وەرزشی بەڵکو لە ئاستی داهاتی داراییشدا.

یانەی ئارسیناڵ دوای چاوەڕوانییەکی درێژخایەن بۆ جاری چواردەیەم نازناوی خولەکەی بەدەستهێنا و بەپێی راپۆرتی رۆژنامەی دەیلی ئێکسپرێسی بەریتانی، کۆی گشتی داهاتی یانەکە گەیشتووەتە نێوان ١٧٦ بۆ ١٧٨ ملیۆن پاوەند، ئەمەش ژمارە پێوانەییەکەی وەرزی رابردووی لیڤەرپوولی تێپەڕاندووە کە ١٧٥ ملیۆن پاوەند بوو.

ئەم داهاتە زەبەلاحە لە چەند سەرچاوەیەکی جیاواز پێکهاتووە، بە جۆرێک ٩٧ ملیۆن پاوەندی بۆ مافی بەشداریکردن لە پەخشی ناوخۆیی و جیهانی و داهاتی بازرگانی تەرخان کراوە، لەگەڵ ٥٤ ملیۆن پاوەند وەک پاداشتی شایستەیی پلەی یەکەم و بڕێک پارەی زیادە کە بەهۆی زۆری پەخشکردنی یارییەکانی لە تەلەفزیۆنەوە بەدەستی هێناوە.

لە ئاستی پاداشتی شایستەیی بەپێی ریزبەندی، ئارسیناڵ بە ٥٤ ملیۆن پاوەند لە پێشەنگدایە، دوای ئەو مانچستەر سیتی بە ٥١ ملیۆن و ٣٠٠ هەزار پاوەند لە پلەی دووەم و مانچستەر یونایتد بە نزیکەی ٤٨ ملیۆن پاوەند لە پلەی سێیەمدایە. لە بەرامبەردا یانە زیانمەندەکان وەک چێڵسی تەنها ٢٩ ملیۆن و ٧٠٠ هەزار پاوەند و تۆتنهامیش تەنها نزیکەی ١١ ملیۆن پاوەندیان بەرکەوتووە.

کۆتاییهاتنی وەرزەکە بۆ هەندێک یانە بە دابەزین بۆ خولی پلە یەک کۆتایی هات کە بریتین لە وێست هام و بێرنلی و وڵڤەرهامپتۆن، لە کاتێکدا چێڵسی لە پلەی دەیەمدا جێگیر بوو و تۆتنهامیش بە ئەستەم لە دوا هەفتەدا خۆی لە دابەزین رزگار کرد.

کێبڕکێی تۆتنهام و یوڤانتۆس لەسەر ئاندی ڕۆبێرتسۆن توند دەبێتەوە

یانەی تۆتنهام لە هەوڵەکانی بۆ گواستنەوەی ئاندی ڕۆبێرتسۆن کە بەرگریکاری چەپی یانەی لیڤەرپوولە تووشی کێشەیەکی چاوەڕواننەکراو بووەتەوە.

سەرەڕای ئەوەی تۆتنهام گەیشتبووە ڕێککەوتنی سەرەتایی لەگەڵ یاریزانەکە بەڵام ئێستا یانەی یوڤانتۆسی ئیتاڵی بە فەرمی هاتووەتە نێو کێبڕکێکەوە و دەیەوێت ئەو یاریزانە بۆ ڕیزەکانی خۆی ببات.

گرێبەستی ڕۆبێرتسۆن لەگەڵ لیڤەرپوول لە کۆتایی مانگی داهاتوو تەواو دەبێت و ئەو ئێستا یاریزانێکی ئازادە و دەتوانێت بەبێ بەرامبەر پەیوەندی بە هەر یانەیەکەوە بکات.

بەپێی تۆڕی سکای ئیتاڵیا یۆڤانتۆس پەیوەندی بە یاریزانەکەوە کردووە و ئۆفەرێکی دارایی پێشکەش کردووە و ئەمەش وایکردووە پلانی تۆتنهام بکەوێتە مەترسییەوە.

تۆتنهام کە بە زەحمەت لە دابەزین بۆ خولی پلە یەک ڕزگاری بوو دەیەوێت بە هێنانی یاریزانێکی ئەزمووندار وەک ڕۆبێرتسۆن هێڵی بەرگری یانەکەی بەهێز بکات.

ئەم بەرگریکارە سکۆتلەندییە لە ماوەی نۆ ساڵی ڕابردوودا لەگەڵ لیڤەرپوول سەرکەوتنی گەورەی وەک بەدەستهێنانی نازناوی پرێمەرلیگ بە دوو جار و خولی پاڵەوانەکانی ئەوروپای بەدەستهێناوە.

سەرەڕای هەوڵەکانی یۆڤانتۆس هێشتا تۆتنهام چانسی زۆری هەیە بۆ ئەوەی ڕۆبێرتسۆن ڕازی بکات کە لە خولی ئینگلتەرا بمێنێتەوە بەڵام پێشنیارە داراییەکەی یانە ئیتاڵییەکە ڕەنگە ببێتە هۆکارێک بۆ گۆڕینی بڕیاری یاریزانەکە.

یارییەکی مێژوویی؛ ئیسپانیا و عێراق لە یارییەکی دۆستانەدا ڕووبەڕووی یەکدەبنەوە

​شاری مەدرید وەک بەشێک لە ئامادەکارییەکانی بۆ مۆندیالی ٢٠٢٦، فیدراسیۆنی تۆپی پێی ئیسپانیا بە فەرمی ئەنجامدانی یارییەکی دۆستانەی بەهێزی لە نێوان هەڵبژاردەی نیشتمانیی وڵاتەکەی و هەڵبژاردەی عێراق ڕاگرت. ئەم یارییە لە چوارچێوەی پلانی هەردوو هەڵبژاردەدایە بۆ بەرزکردنەوەی ئاستی خۆبەرهەڤکردن و ڕاهێنانی یاریزانان پێش دەستپێکردنی ڕکابەرییەکانی جامی جیهانی.

​بەپێی ڕاگەیەندراوە فەرمییەکە، بڕیارە ئەم ڕووبەڕووبوونەوە سەرنجڕاکێشە لە ڕۆژی ٤ی مانگی داهاتوودا بەڕێوەبچێت. ستافی تەکنیکیی هەردوو لا ئەم دەرفەتە بە هەلێکی زێڕین دەزانن بۆ تاقیکردنەوەی پلانە تاکتیکییەکان و ڕاگرتنی هاوسەنگیی پێکهاتەکانیان، بەتایبەت کە هەڵبژاردەی عێراق دەیەوێت بە باشترین شێوە و بە ورەیەکی بەرزەوە پێ دەنێتە نێو یارییەکانی مۆندیالەوە.

​ئەم یارییە دۆستانەیە گرنگییەکی تایبەتی بۆ هاندەرانی تۆپی پێی عێراقی و عەرەبی هەیە، چونکە ڕووبەڕووبوونەوەی قوتابخانەیەکی گەورەی وەک ئیسپانیا، تاقیکردنەوەیەکی ڕاستەقینە دەبێت بۆ تواناکانی شێرەکانی ڕافیدەین.

چاوەڕوان دەکرێت یارییەکە ئاستێکی تەکنیکیی بەرز بەخۆوە ببینێت و ببێتە وێستگەیەکی گرنگ لە کاروانی خۆئامادەکردنی هەردوو هەڵبژاردە بۆ گەورەترین ڕووداوی وەرزشیی جیهان لە ساڵی ٢٠٢٦دا.

بەفەرمی وادەی هەڵبژاردنی سەرۆکایەتی ڕیاڵ مەدرید دیاریکرا

ئەمڕۆ لەهەنگاوێکی مێژووییدا لێژنەی هەڵبژاردنەکان وادەی هەڵبژاردنی سەرۆکایەتی یانەی ڕیاڵ مەدریدی دیاریکرد،ئەمەش دوای دوو دەیە لەدەسەڵاتی ڕەهای فلۆرێنتینۆ پێرێز بەبێ ڕکابەر و یانەکە دەچێتە قۆناغێکی نوێ و هەستیارەوە بۆ هەڵبژاردنی سەرۆکایەتی یانەکە،کە بە یەکێک لە گرنگترین ساتەکانی مێژووی یانەکە هەژمار دەکرێت،کە لەدوای ساڵی 2006 ئەمە دەبێتە یەکەم هەڵبژاردنی سەر سندوق لە مێرێنگی.

لێژنەکە ڕێککەوتی 7ی حوزەیرانی ئەمساڵی وەکو کاتی هەڵبژاردنەکان دیاریکرد و لەکاتژمێر 8 بەیانی تاکو 9ی شەو ئەو کەسانەی مافی دەنگدانیان هەیە دەتوانن دەنگ بدەن لەهۆڵی باسکەی شاری وەرزشی ڕیاڵ مەدرید،کە بۆ ئەمجارە ئینریکی ڕیکێڵمی وەکو ڕکابەری سەرسەختی پێرێز خۆی بەشایەن دەبینێت بۆ سەرۆکایەتی یانەکە و توانیشی گەرنتی دارایی دابین بکات،کە گەورەترین بەربەست بوو.

ئێستا هەموو جیهان چاوی لەو هەڵبژاردنەیە بەوپێیەی یانەی ڕیاڵ مەدرید هەمیشە بارودۆخەکانی کاری کردۆتە سەر تۆپی پێ و بۆ ئەم هەڵبژاردنەش چاوەڕێ دەکرێت گۆڕانکاری گەورە لە پۆستەکانی یانەکە بکرێت.

“سەرکار ڕێبوار”

هەوڵەکانی گەڵەتەسەرای بۆ گواستنەوەی رافاێل لیاو

رۆژنامەی لاگازێتا دیللۆ سپۆرتی ئیتاڵی بڵاویکردووەتەوە کە بەرپرسانی یانەی گەڵەتەسەرای تورکی بەنیازین لە مێرکاتۆی هاوینەی ئەمساڵدا هەوڵی بەدەستهێنانی تواناکانی رافاێل لیاوی ئەستێرەی پۆرتوگالی یانەی ئەی سی میلان بدەن.

بەپێی زانیارییەکانی هەمان رۆژنامە، یانە تورکیەکە ئۆفەرێکی فەرمی ئامادە کردووە و پێشکەشی ئەی سی میلانی کردووە، کە تێیدا بڕی ٤٠ ملیۆن یۆرۆ وەک نرخی گواستنەوەی یاریزانەکە دیاری کراوە، هاوکات مووچەی ساڵانەی ١٠ ملیۆن یۆرۆشیان بۆ خودی لیاو داناوە و لە ئێستاشدا چاوەڕێی وەڵامی هەردوولا دەکەن.

سەرباری ئەم ئۆفەرە گەورەیە، سەرچاوەکە جەختیکردووەتەوە کە رافاێل لیاو بە هیچ شێوەیەک بیری لە جێهێشتنی ریزەکانی ئەی سی میلان نەکردووەتەوە.

لیاو سورە لەسەر ئەوەی لە وەرزەکانی داهاتوودا بمێنێتەوە و کار بۆ گەڕانەوەی نازناوەکان بۆ ئەو یانەیە بکات.

ئەستێرە پۆرتوگالیەکە پێیوایە قەرزاری هاندەرانی یانەکەیە و ئامانجی سەرەکی لە داهاتوودا ئەوەیە قەرەبووی ئەنجامە نائومێدکەرەکانی وەرزی ئەمساڵ و وەرزی رابردوو بکاتەوە و وەک دیارییەک بۆ هاندەرانی میلان، لە وەرزی داهاتوودا ئاستێکی بەرز پێشکەش بکات و سەرکەوتنی گەورە بەدەستبهێنێت.

مباپێ بەردەوامە لە درەوشانەوەی تاکەکەسی

یانەی ڕیاڵ مەدریدی ئیسپانی لە پێگەی فەرمی خۆیان ڕایانگەیاندووە کە کیلیان مباپێی ئەستێرەی فەرەنسی بە باشترین یاریزانی ئەم وەرزەی یانەکەیان دیاریکراوە و خەڵاتی ماهۆ سینسۆ ستێرێلای بەدەستهێناوە کە ساڵانە دەدرێتە باشترین یاریزانی وەرز لە یانەکەدا دوای ئەوەی لە کێبڕکێ لەگەڵ یاریزانەکانی دیکە سەرکەوتوو بووە.

مباپێ لەم وەرزەدا بەشداری لە 44 یاریی ڕیاڵ مەدرید کردووە لە سەرجەم پاڵەوانێتییەکاندا و 42 گۆڵی بۆ یانەکەی تۆمارکردووە و بە 25 گۆڵیش لە پێشەنگی گۆڵکارانی خولی ئیسپانیدا بووە و لە پلەی یەکەمی گۆڵکارانی خولی یانە پاڵەوانەکانی ئەوروپاشدا بووە.

ئەمە دووەم جاری بەدوای یەکە کە کیلیان مباپێ ئەو خەڵاتە دەباتەوە دوای ئەوەی لە وەرزی ڕابردووشدا بە باشترین یاریزانی ڕیاڵ مەدرید دیاریکرا و هەمان خەڵاتی وەرگرت بەڵام لەم وەرزەدا نەیتوانی هیچ نازناوێک لەگەڵ ڕیاڵ مەدرید بەدەستبهێنێت و بۆ دووەم وەرزی بەدوای یەک یانەکە بە بێ نازناو وەرزەکەیان کۆتایی پێهێنا.

لاپۆرتا گرێبەستێکی بە 24 کاتژمێر کۆتایی پێهـێـنا

ڕۆژنامەی مۆندۆ دیپۆرتیڤۆی کەتەلۆنی لە هەواڵێکی نوێیدا ڕایگەیاند یانەی بارسێلۆنا بەشێوەیەکی یەکجارەکی کۆتایی بە گرێبەستی ئەنتۆنی گۆردنی هێرشبەری یانەی نیوکاسڵی ئینگلیزی هێناوە و لەماوەی 24 کاتژمێردا توانیان هەموو شتێک لەسوودی بلوگرانا یەکلایی بکەنەوە و یاریزانەکە دەبێتە یەکێکی دیکە لەناوەکانی هێڵی پێشەوە بارسا بۆ وەرزی داهاتوو.

مۆندۆ دیپۆرتیڤۆ ئەوەشی ئاشکرا کرد بایرن میونخ و لیڤەرپوڵ لەسەر هێڵ بوون بۆ گواستنەوەی گۆردن،بەڵام بارسێلۆنا دوای هاتنە پێشەوەی توانی لەماوەی 24 کاتژمێر لەگەڵ نیوکایڵ ڕێککەوێت،کە قەرارە پێش ئەوەی ئەنتۆنی گۆردن پەیوەندی بە کەمپی مەشق و ڕاهێنانەکانی ئینگلتەرا بکات بۆ مۆندیال سەفەری شاری بارسێلۆنا بکات بۆ پشکنینی پزیشکی تائەوەی گرێبەستەکەی ئیمزا بکات.

دەربارەی گرێبەستەکەش مۆندۆ ئاشکرای کردوە بۆماوەی پێنج وەرز دەبێت و بڕی گواستنەوەی گۆردنی تەمەن 25 ساڵ 70 ملیۆن یۆرۆ دەبێت،کە لەکاتی بەدەست هێنانی نازناویش بڕێک پارە دەدرێتە نیوکاسڵ وەکو بەشێکی مەرجەکانی گرێبەستەکە.

“سەرکار ڕێبوار”

هاوسن پیرۆزبایی لە یاریزانانی هەڵبژاردەی ئیسپانیا دەکات

دوای بڵاوکردنەوەی لیستی یاریزانە بانگهێشت کراوەکانی هەڵبژادەی ئیسپانیا بۆ مۆندیال،کە چەند یاریزانێک بانگهێشت نەکرا بوون گرنگترینیان دین هاوسنی ئەستێرەی یانەی ڕیاڵ مەدرید دوای ماوەیەکیش لەبێدەنگی یاریزانەکە پەیامێکی بڵاوکردەوە و باسی هەڵبژاردەی ئیسپانیای کرد.

هاوسن تویتێکی لە تۆڕی کۆمەڵایەتی X کرد،پەیامێکی بڵاوکردەوە وتی ؛ پیرۆزبایی لە هاوکارانم دەکەم بەبۆنەی نوێنەرایەتی کردنی هەڵبژاردەی ئیسپانیا،منیش لەماڵەوە وەکو ئیسپانیەک پاڵپشتیان دەکەم و هانی هەڵبژاردەکەم دەدەم بۆ بەدەست هێنانی جامی جیهانی.

هاوسن ئەم وەرزە لەگەڵ ڕیاڵ مەدرید ئاستێکی باشی پێشکەش کرد،بەڵام لەکۆتاییدا بووە قوربانی کارەساتەکانی نێو ماڵی مێرێنگی دوای ئەوەی وەرزەکەیان بەبێ نازناو بەڕێکرد نەیتوانی متمانەی لوێز دێلا فۆنتی ڕاهێنەری هەڵبژاردەی ئیسپانیا بەدەست بێنێت و بانگهێشتی مۆندیال نەکرا.

“سەرکار ڕێبوار”