ئارن سڵۆت نزیکە لە دوورخستنەوەی لە پۆستەکەی

یانەی لیڤەرپوڵ لە دۆخێکی هەستیار و پڕ لە فشاردایە ئەنجامە ناجێگیرەکانی ئەم دواییەی تیپەکە لەسەر ئاستی ناوخۆیی و ئەورووپی کارگێڕی یانەکەی ناچار کردووە بە جددی بیر لە دوورخستنەوەی ئارن سڵۆت بکەنەوە.

بەپێی هەواڵێکی تۆپ سکێڵز سپۆرتس، یاریی داهاتووی سوورپۆشەکان لە چامپیۆنز لیگ بەرامبەر یانەی گەڵاتەسەرای تورکی، تەنها یارییەکی ئاسایی نییە، بەڵکو بڕیاردەری کۆتایی دەبێت لەسەر چارەنووسی ئەم راهێنەرە هۆڵەندیەیە لە لیڤەرپوڵ.

سەرچاوەکان ئاماژە بەوە دەکەن کە ئەگەر لیڤەرپوڵ نەتوانێت بەسەر بەربەستی یانە تورکییەکەدا سەربکەوێت و لە پاڵەوانێتییەکە ماڵئاوایی بکات، ئەوا کارگێڕی یانەکە بێ دوودڵی لەم هەفتەیەدا کۆتایی بە گرێبەستی سڵۆت دەهێنێنن.

ئەمە لە کاتێکدایە کە هاندەرانی یانەکە چاوەڕوانییەکی زۆریان لە جێگرەوەکەی یۆرگن کڵۆپ هەبوو، بەڵام ئێستا وادیارە کاتەکانی ئەو لەگەڵ تیپەکە بەسەرچوون، مەگەر ئەوەی تەنها پەرجۆیەکی گەورە لە یاریگادا ڕوو بدات و تیپەکە بگەیەنێتە قۆناغی داهاتوو.

هانسی فلیک بەرشەلۆنە دوا وێستگەی کاروانی وەرزشیم دەبێت

فلیک راهێنەری یانەی بەرشەلۆنە پێش رووبەڕووبوونەوەی نیوکاسڵ یونایتد لە چامپیۆنز لیگ، جەختی لەسەر پێویستی پێشکەشکردنی یارییەکی نموونەیی کردەوە.

فلیک ئاماژەی بەوە کرد کە رکابەرەکەیان لە ڕووی جەستەییەوە زۆر بەهێزن و لە هێرشی هەڵگەڕاوەدا خێران، بۆیە پێویستە یاریزانەکانی بە متمانەیەکی زۆرەوە یاری بکەن و سوود لەو بۆشاییانە وەربگرن کە دروست دەبن.

سەبارەت بە داهاتووی خۆی و نوێکردنەوەی گرێبەستەکەی، فلیک رایگەیاند کە ئێستا کاتی قسەکردن نییە لەو بارەیەوە و هەموو تەرکیزی لەسەر یارییەکەیە، بەڵام وتی: من لێرە زۆر دڵخۆشم ڕەنگە بەرشەلۆنە دوا یانە و دوا کار بێت لە ژیانی وەرزشی مندا.

هەروەها باسی لە سەردانەکەی خوان لاپۆرتا کرد و ئاماژەی بەوە کرد کە پەیامی سەرۆک هەمیشە جەختکردنەوەیە لەسەر فەلسەفەی یانەکە و رێبازی کرۆیڤ، کە تەنها بردنەوە گرنگ نییە، بەڵکو شێوازی بردنەوەکە و رۆحیەتی تیمەکە لە هەموو شتێک گرنگترە.

راهێنەرەکە باسی لەوە کرد کە لامین یامال یاریزانێکە دەتوانێت جیاوازی دروست بکات و بۆ یارییەکە ئامادەیە و بەشداردەبێت بەرامبەر نیوکاسڵ.

ئەستێرەیەکی دیکەی ڕیال مەدرید دووچاری پێکان بوو

لە نوێترین هەواڵدا لەسەر یانەی ڕیاڵ مەدرید ڕۆژنامەی ئاسی ئێسپانی بڵاوی کردەوە یانەی ڕیاڵ مەدرید ئێستە کەوتۆتە نێو قەیرانێکی نوێوە،کە ئەمجارە پێکانی تیبۆ کۆرتوای گۆڵپارێزی یانەکەیە.

بەپێی زانیاریەکان بێت دوێنێ شەو لەکاتی خۆ گەرم کردن بۆ یاری بەرامبەر مان سیتی کۆرتوا دووچاری پێکان دەبێت و گێمی یەکەمیش بە پێکانەوە یاری دەکات،دواتر لە گێمی دووەم گۆڕانکاری پێدەکرێت و ناتوانێت بەردەوام بێت.

ئەوە جێگای گومانە لەکۆرتوا،جۆر و بارودۆخی پێکانەکەیەتی،کە بە ئەگەرەێکی زۆرەوە ناتوانێت بۆ یاری داهاتووی ڕیاڵ مەدرید یاری بکات لە دێربی بەمەدرید ژهەمبەر ئەتلەتیکۆ مەدرید.

“سەرکار ڕێبوار”

مان سیتی بیر لە دوورخستنەوەی گواردیۆلا دەکاتەوە

لە هەواڵێکی نوێدا ڕۆژنامەی سەنی بەریتانی ئەمڕۆ بڵاوی کردەوە یانەی مانچێستەر سیتی دوێنێ شەو ڕێک دوای شکستەکەیان بەرامبەر ڕیاڵ مەدرید لەگەڵ پێپ گواردیۆلای ڕاهێنەری یانەکە کۆبوونەتەوە و قسەیان لەسەر دوا دیدارەکانی نێوان مان سیتی و گواردیۆلا کردوە.

بەپێی زانیاریە سەرەتاییەکان بێت لە کۆبوونەوەکەدا بەرپرسانی مان سیتی هەستیان بە ڕەشبینی ڕاهێنەرەکە کردوە و بەڕوونی بە گواردیۆلایان وتووە کاتێک دیاری بکە بۆ جێهێشتنی یانەکە،پێپیش وتووێتی دوای جامی کاراباو قسەی لێدەکەینەوە و بڕیاری خۆم دەدەم.

شایەنی باسە مان سیتی بۆ چوارەم ساڵە لەسەر یەکتری لە چامپیۆنزلیگ دەردەکرێ و پێپ گواردیۆلای ڕاهێنەری یانەکەش زۆر بێ هیوا خۆی دەبینێتەوە لەم حاڵەدا،کە ڕەنگە خۆی لە کۆتا ساڵ ببینێتەوە لە سیتی.

“سەرکار ڕێبوار”

بەفەرمی مەغریب کرایەوە پاڵەوانی جامی نەتەوەکانی ئەفریقای 2025

بەفەرمی فیدراسیۆنی تۆپی پێی ئەفریقا دوای لێکۆڵینەوەی تەواو لە یاری کۆتایی جامی نەتەوەکانی ئەفریقای ساڵی 2025 هەڵبژاردەی مەغریب کرایە پاڵەوانی جامەکە،کە یاریەکە لەنێوانی هەڵبژاردەی مەغریب و سەنیگال بوو،هەڵبژاردەی سەنیگالیش یاریەکەی بردبۆوە.

ئەم بابەتە لەسەر سکاڵایەکی هەڵبژاردەی مەغریب دروست بوو،کاتێک دوای ئاڵۆزی یاریەکە و چوونە دەرەوە هەڵبژاردەی سەنیگال لە یاریگادا مەغریب داوای کرد جامەکە لە سەنیگال وەربگرنەوە بەهۆی ئەم حاڵەتەوە،فیدراسیۆنی تۆپی پێی ئەفریقاش ڕەزامەند بوو لەسەر وەرگرتنەوە جامەکە لە سەنیگال و پێدانی بە مەغریب،یاریەکەش بە 3 گۆڵی بێ وەڵام لەبەرژەوەندی مەغریب هەژمار کرا.

ئەمە بۆ یەکەمین جارە لەمێژوودا حاڵەتێکی لەو جۆرە لە تۆپی پێ ڕوودەدات و ئەم بابەتەش هەرایەکی زۆری دروست کردوە لە شەقامە وەرزشیاکاندا،کە ئێستا دوو لایەن هەن لەسەر ئەم بڕیارە،لانێک پێیان وایە شایەنی ئەم حاڵەتە سەنیگالیەکان بەهۆی جێهێشتنی یاریگا و لایەنێکیش دەڵێن مەغریب حەقی خۆی لەیاریەکە وەرگرتووە دەبووایە جامەکە بۆ سەنیگال بووایە.

“سەرکار ڕێبوار”

سندووقی گێڕانەوەی داراییەکانی عێراق: نزیکەی ٣٨٠ ملیۆن دۆلار بۆ گەنجینەی دەوڵەت گێڕدراوەتەوە و ٢.٣ ملیار دۆلار بلۆک کراوه

سندووقی گێڕانەوەی دارایی عێراق نوێترین ئاماری کار چالاکییەکانی بڵاوکردەوە و ڕایگەیاند: • بڕی پارەی گێڕدراوە: تا ئێستا نزیکەی ٣٧٩ ملیۆن دۆلار لە دراوە جیاوازەکان گێڕدراوەتەوە بۆ سەر هەژماری وەزارەتی دارایی. • پارە بلۆککراوەکان لە دەرەوە: زیاتر لە ٢.٣ ملیار دۆلاری عێراق لە سێ وڵات بلۆک کراوە (١.٤ ملیار لە سوریا، ٧٠٠ ملیۆن لە ئوردن و ١٩٣ ملیۆن لە تورکیا). • ڕێکارە یاساییەکان: ٣٩ داواکاریی هاوکاریی دادوەری بۆ ملاحقەکردنی ئەو کەسانە بەرزکراوەتەوە کە پارەی عێراقیان لایە و هاوکار نین. • شێوازی کارکردن: سندوقەکە لە ڕێگەی گرێبەست لەگەڵ کۆمپانیا نێودەوڵەتییەکان و هەماهەنگی دیپلۆماسی، کار بۆ دۆزینەوە و گێڕانەوەی ئەو سامنانە دەکات کە بۆ دەرەوە قاچاخ کراون.

نرخی نەوت لە بازاڕەکانی جیهان بە زیاتر لە 105 دۆلار مامەڵەی پێوەدەکرێت

نرخی نەوت لە بازاڕەکانی جیهاندا پارێزگاری لە ئاستە بەرزەکانی خۆی کردووە و لە ئێستادا بەرمیلێک نەوتی برێنتی دەریای باکوور بە زیاتر لە 105 دۆلار 8 سەنت مامەڵەی پێوەدەکرێت، هاوکات نەوتی سووکی تەکساسی ئەمریکیش گەیشتووەتە 100 دۆلار .

​ئەم هەڵکشانە بەرچاوەی نرخەکان لە کاتێکدایە کە بەهۆی هەڵگیرسانی جەنگ لەگەڵ ئێران لە سەرەتای ئەم مانگەوە، هەردوو جۆری نەوتی برێنت و تەکساس بە ڕێژەی 40% بەرزبوونەوەیان بەخۆوە بینیوە. لە لایەکی دیکەوە دۆناڵد ترەمپ، سەرۆکی ئەمریکا داوای لە وڵاتانی جیهان کردووە هاوکار بن بۆ پاراستنی ئاسایشی تەنگەی هورمز.

​گرژییەکان دوای ئەوە زیاتر بوون کە هێرشەکانی ئیسرائیل و ئەمریکا بۆ سەر ئێران بوونە هۆی ئەوەی ئەو وڵاتە هەڕەشەی داخستنی تەنگەی هورمز بکات، کە ئەمەش کاریگەرییەکی ڕاستەوخۆی لەسەر ناجێگیریی بازاڕی وزە لەسەر ئاستی جیهان دروست کردووە.

کۆمپانیای “BP”ی بەریتانی کارمەندەکانی لە پڕۆژە نەوتییەکانی کەرکوک دەکشێنێتەوە

سەرچاوەکان لە کۆمپانیای نەوتی باکووری عێراق ئەمڕۆ ڕایانگەیاند کە کۆمپانیای “BP”ی بەریتانی ژمارەیەک لە کارمەندە بیانییەکانی خۆی کە لە پڕۆژەکانی پەرەپێدانی کێڵگە نەوتییەکانی کەرکوک کار دەکەن، کشاندووەتەوە؛ ئەمەش بەهۆی گرژییە ئەمنییەکان و لێکەوتەکانی جەنگ لە ناوچەکەدا.

سەرچاوەکان بە “شەفەق نیوز”یان ڕاگەیاندووە: کۆمپانیاکە وەزارەتی نەوت و کۆمپانیای نەوتی باکووری ئاگادار کردووەتەوە لە بڕیاری کشانەوەی کارمەندە بیانییەکانی کە لە تیمەکانی پاڵپشتی تەکنیکی و ڕاوێژکاری کار دەکەن. ڕوونیشیان کردەوە کە ئەم هەنگاوە وەک ڕێکارێکی خۆپارێزییە بۆ پاراستنی ستافەکانیان لە ژێر ڕۆشنایی پەرەسەندنە ئەمنییەکانی ئەم دواییەدا.

ئەو سەرچاوانە ئاماژەیان بەوەش کردووە کە بڕیارەکە بە واتای هەڵوەشاندنەوە یان کۆتاییهێنان بە گرێبەستی نێوان هەردوولا نایەت، بەڵکو تەنها ڕێکارێکی کاتییە تا ئەو کاتەی هەڵسەنگاندن بۆ دۆخی ئەمنی دەکرێت. باسیان لەوەش کرد کە ڕەنگە هەندێک لە کارە مەیدانییەکان بەشێوەیەکی کاتی کاریگەر بن بەهۆی نەبوونی تیمە تەکنیکییە بیانییەکان کە سەرپەرشتی لایەنە پسپۆڕییەکانی پڕۆسەی پەرەپێدان دەکەن.

هەروەها ئاماژە بەوە دراوە کە هاوکاری نێوان کۆمپانیای نەوتی باکوور و کۆمپانیای (BP) مەبەست لێی جێبەجێکردنی بەرنامەیەکی گشتگیرە بۆ پەرەپێدانی ژمارەیەک کێڵگەی نەوتی لە پارێزگای کەرکوک، بە مەبەستی بەرزکردنەوەی ئاستی بەرهەمهێنان و باشترکردنی ژێرخانی سیستەمی گواستنەوە و بەرهەمهێنان.

لە ئێستادا بەرهەمهێنانی کۆمپانیای نەوتی باکوور نزیکەی ٣٢٥ هەزار بەرمیلە لە ڕۆژێکدا، پلانەکانی پەرەپێدانیش ئامانجیان ئەوەیە ئەو بڕە لە ساڵانی داهاتوودا بە شێوەیەکی پلەبەندی زیاد بکەن.

یەکێتی ئەوروپا بۆ ڕێگری لە بەرزبوونەوەی نرخی وزە کۆدەبێتەوە

بەهۆی بەردەوامیی جەنگی ئێران و کاریگەرییە ڕاستەوخۆکانی لەسەر بازاڕی وزەی جیهانی، ئەمڕۆ دووشەممە وەزیرانی وزەی یەکێتی ئەوروپا لە برۆکسل کۆدەبنەوە بۆ تاوتوێکردنی ڕێکارەکانی کەمکردنەوەی تێچووی وزە و ڕێگریکردن لە بەرزبوونەوەی زیاتری نرخی نەوت و گاز. بەپێی زانیارییەکان، کۆمیسیۆنی ئەوروپا سەرقاڵی ئامادەکردنی پلانی فریاگوزارییە بۆ پاراستنی بەکاربەران لە قورسیی پسوڵەکانی وزە. هاوکات بژاردەکانی وەک پێشکەشکردنی پاڵپشتیی دارایی بۆ پیشەسازییەکان، کەمکردنەوەی باج و پێشنیاری دیاریکردنی “سقف” بۆ نرخی گاز لە گفتوگۆدان.

ئەم دانیشتنە کە بەشێوەی داخراو بەڕێوەدەچێت، تایبەتە بە تاوتوێکردنی لێکەوتەکانی داخستنی گەرووی هورمز، کە بووەتە هۆی پەککەوتنی هەناردەی نەوت و شڵەژانی بازاڕی گازی سروشتی لە ئەوروپا. لە سەرەتای دەستپێکردنی جەنگی ئێرانەوە، نرخی گاز لە ئەوروپا بە ڕێژەی زیاتر لە پەنجا لەسەد بەرزبووەتەوە و ئۆرسۆلا ڤۆن دێر لاین، سەرۆکی کۆمیسیۆنی ئەوروپا، بڕیارە لە چەند ڕۆژی داهاتوودا لیستی بژاردەکانی فریاگوزاری پێشکەشی سەرکردەکانی یەکێتی ئەوروپا بکات.

نرخی نەوت لە بازاڕەکانی جیهاندا بە رێژەی 3% بەرزبووەوە

​ئەمڕۆ سێشەممە دوای کردنەوەی بازاڕەکانی ئاسیا، نرخی نەوت بەرزبوونەوەیەکی بەرچاوی بەخۆوە بینی و نرخی یەک بەرمیل نەوتی برێنتی دەریای باکوور بە بڕی 3 دۆلار و 79 سەنت زیادی کرد، بەوەش گەیشتە 104 دۆلار و 2 سەنت.

هاوکات نرخی نەوتی سووکی تەکساسی ئەمریکیش بە هەمان شێوە رووی لە بەرزبوونەوە کرد و دوای زیادبوونی 3 دۆلار و 68 سەنت، بە 97 دۆلار و 70 سەنت مامەڵەی پێوەکرا.

​ئەم گۆڕانکارییانە لە کاتێکدایە کە لە کۆبوونەوەی پێشووی بازاڕدا نرخەکان دابەزینیان بەخۆوە بینیبوو، بە جۆرێک نەوتی برێنت 2.8٪ و نەوتی تەکساس زیاتر لە 5٪ دابەزی بوون، ئەوەش دوای ئەوەی ئێران رێگەی بە تێپەڕبوونی چەند کەشتییەکی نەوت دا بە تەنگەی هورمزدا.

​لە ئێستادا بارودۆخی تەنگەی هورمز کە ناوەندێکی سەرەکییە و 20٪ی نەوت و گازی جیهانی پێدا تێدەپەڕێت، کاریگەرییەکی زۆری لەسەر بازاڕ دروست کردووە.

دوای هێرشەکانی ئەمریکا و ئیسرائیل بۆ سەر ئێران، ئەو تەنگەیە داخراوە و وڵاتانی هاوپەیمانی ئەمریکاش رایانگەیاندووە کە ئامادە نین کەشتی جەنگی بۆ پاسەوانیکردنی کەشتییە نەوتییەکان بنێرنە ناوچەکە، ئەمەش نیگەرانییەکانی لەبارەی دابینکردنی وزە لەسەر ئاستی جیهان زیاتر کردووە.