ڕوونکردنەوەیەک لە بەڕێوەبەرایەتی گشتی ژمێرکاری/ وەزارەتی دارایی و ئابوورییەوە.

( يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ )

دوابەدوای بڵاوبوونەوەی چاوپێکەوتنێکی بەڕێز وەزیری دارایی و ئابووری لە کەناڵی ڕووداو، کە تێیدا داهاتی ناوخۆی پێنج مانگی ڕابردووی هەرێمی کوردستانی خستبووە ڕوو، هەریەک لە بەڕێزان عەلی حەمە ساڵح ئەندامی پەرلەمانی کوردستان و عومەر گوڵپی کاندیدی دەرچووی پەرلەمانی کوردستان بە ناشارەزایی و نەزانی چەند لێکدانەوەیەکی نادروستیان بۆ داتاکان کردووە، ئەوەی پەیوەندی بەوەزارەتی دارایی و ئابوورییەوە هەیە بە پێویستمان زانی لەم چەند خاڵەی خوارەوە وەڵامیان بدەینەوە.

١- لەدەستپێکی قسەکانیدا بەڕێز عەلی حەمەساڵح دەڵێت وەزارەتی دارایی پێشتر ڕایگەیاندووە داهاتی مانگانەیان چوار سەد ملیار دینارە، ئەو قسەیە هیچ بنەمایەکی نییە و هیچ کات وەزارەتی دارایی ئەو ئامارەی بڵاونەکردووەتەوە، داهاتی ناوخۆ ژمارەیەکی جێگیر نییە و مانگانە بەرز و نزم دەکات.

بەخشتەیەک داهاتی ناوخۆی حەوت ساڵی ڕابردوو دەخەینەڕوو کە مانگانە لە ڕاپۆرتی تەرازووی پێداچوونەوە تۆمار کراوە و لەلایەن تیمی هاوبەشی دیوانی چاودێری دارایی عێراق و هەرێمی کوردستانەوە وردبینی بۆ کراوە و وەزارەتی دارایی عێراقیش هیچ ڕەخنەیەکی لێی نەبووە، جێی خۆیەتی لە کاک عەلی بپرسین بێ زەحمەت ئەم چوار سەد ملیارەت لەکوێ هێناوە؟.

٢- هەروەها لە درێژەی قسەکانیدا دەڵێت داهاتی خاڵە سنوورییەکان مانگانە ١٤٠ ملیار دینارە ئێستا چۆن ڕێی تێدەچێت ٤٠ ملیار دینار بێت، داهاتی خاڵەسنوورییەکانیش هاوشێوەی داهاتەکانی تر بەردەوام لەگۆڕاندایە، لە ڕابردوو هەر ژمارەیەک بووبێت لە ڕاپۆرتی تەرازووی پێداچوونەوەی مانگانە دەرکەوتووە و تیمی هاوبەشی دیوانی چاودێری دارایی عێراق و هەرێمی کوردستان خۆیان لە گومرگ و دەروازەکان وردبینیان کردووە و ژمارەکانیان لە بەردەست بووە، وەهیچ لایەنێکی فەرمی و یاسایی ڕەخنەیان لێی نەبووە، نازانین سەرچاوەی ئەو زانیارییانەی کاک عەلی باسیان دەكات چییە؟!.

بۆ هەموو ئەوانەی داتاو زانیاری ناڕاست بڵاو دەکەنەوە، لامان سەیرە ئەو بەڕێزانە تا ئێستا ئاگاداری دۆخ و فشار و ئابڵوقەی سەر هەرێم نین، هەروەک ئەوەی لێرە نەژین، لە هەموو بوارەکانی باج و گومرگ و بیمە و هتد….کە فشارێکی ئابووری و بازرگانی توندی لەسەر هەرێم داناوە.

سەرباری شەڕی ئەمریکا و ئیسرائیل لەگەڵ ئێران کە کاریگەریەکانی گەیشتووەتە سەرتاسەری دنیا و کاریگەری ڕاستەوخۆشی لەسەر عێراق کردووە، بە چ لۆژیکێک کاریگەری لەسەر هەرێم جێناهێڵێت؟.

ڕاستیەکەش ئەوەیە هەروەک بەپێی داتا و زانیارییەکانی وەزارەتی دارایی و ڕاپۆرتی تەرازووی پێداچوونەوە دەرکەوتووە بەنزیکەیی لە ٧٠٪ داهات کەمبووەتەوە.

٣- لە بەشێکی تری قسەکانیدا باس لە داهاتی هاتووچۆ دەکات، سەرباری ئەوەی سەرچاوەی زانیارییەکانی لای ئێمە ڕوون نییە و وەزارەتی دارایی / ژمێرکاری لێی بەرپرس نییە، ژمارەکە هەرچەندێک بێت مانای ئەوە نییە ئەوە داهاتی کۆتاییە و دەچێتە خەزێنەی گشتییەوە، بەڵکو بەپێی یاسا و ڕێنماییە بەرکارەکان وەزارەتی ناوخۆ و چەند وەزارەتێكی تر بەشێک لە داهاتیان بۆ خۆیان دەبێت ( بۆ پێداویستیەکانیان بەپێی تایبەتمەندییان) ، ئەوەی دەمێنێتەوە لەو ڕێژەیە دەبێتە داهاتی کۆتایی.

٤- لە درێژەی قسەکانیدا بەڕێز عەلی حەمە ساڵح دێتە سەر داهاتی کارەبا و مانگانە بە ٩٠ ملیار دیاری دەکات، بەشێکی ئەم ژمارەیە کە ئێمە لێی دڵنیا نین، قەرزی فرۆشتنی کارەبایە لای هاووڵاتیان و کۆمپانیاکان، بڕێکی تریشی تایبەتە بەکرێی فرۆشتنی کارەبا بە وەزارەت و فەرمانگە حکومییەکان کە بە تەنها چەک و مەقاسەیە لەنێوان وەزارەتەکان، واتە وەک ژمارە دەردەکەوێت بەبێ بوونی کاش ئەوەی دەمێنێتەوە وەک کاش بەكردەیی(فیعلی) بەکار دەهێنرێت کە زۆر لەو ٩٠ ملیارە کەمترە، ئەوە سەرباری ئەوەی بەشێک لە داهاتی کارەبا ڕاستەوخۆ دەدرێتەوە بەخۆیان بەمەبەستی بەکارهێنانی تێچووی چاکكردنەوەی وێستگەکان و محاویلە و تۆڕەکانی گەیاندنی کارەباو …….هتد

لە کۆتایدا پرسیار لەو بەڕێزانە دەکەین بڵاوکردنەوەی زانیاری ناڕاست و چەواشەکردن کێ لێی سوودمەندە؟ .

دووپاتی دەکەینەوە لە چەند ساڵی ڕابردوودا دیوانی چاودێری دارایی عێراق و وەزارەتی دارایی فیدراڵ لارییان لەم زانیاریانەی حکومەتی هەرێم نەبووە ، جێگەی سەرسوڕمان و تێڕامانە ئەم بەڕێزانە بۆ لە مەلیک مەلیک ترن.

ئێمە تێکڕای قسەکانی ئەو بەڕێزانە ڕەتدەکەینەوە ، چەند بارەشی دەکەینەوە دەتوانن هەرکات ویستیان سەردانی بەڕێوەبەرایەتی گشتی ژمێرکاری بکەن بۆ ئەوەی توشی هەڵە نەبن و لەسەرچاوەی ڕاستەوخۆ کە ئێمەین زانیارییەکان وەربگرن.

هاوپێچ؛ خشتەی داهاتی ناوخۆی هەرێم بەپێی ساڵەکان ( ٢٠٢٥،٢٠٢٤،٢٠٢٣،٢٠٢٢،٢٠٢١،٢٠٢٠،٢٠١٩ ) لەگەڵ پێنج مانگی سەرەتای ئەمساڵ کە بۆ بەغداد نێردراوە.

بەڕێوەبەرایەتی گشتی ژمێرکاری / وەزارەتی دارایی و ئابووریی ٤ ی حوزەیرانی٢٠٢٦

سەرۆکایەتیی شارەوانیی هەولێر شۆفێران ئاگادار دەكاتەوە

سەرۆكایەتیی شارەوانیی هەولێر ئاماژە بۆ ئەوە دەکات، کە پڕۆسەی چاككردنەوەی شەقامی 120 مەتری دەستی پێكردووە و دەبێ شۆفێران لە چەند شوێنێكی شەقامی 120 مەتری، شەقامی جێگرەوە بەكار بهێنن.

سەرۆكایەتیی شارەوانیی هەولێر، ئەوەیشی خستەڕوو، بەهۆی دەستکردن بە پرۆسەی چاککردنەوەی شەقامی 120 مەتری، سەرۆکایەتیی شارەوانیی هەولێر ئاگاداری هاووڵاتیان و شۆفێران دەکاتەوە، لەمڕۆ پێنجشەممە 4/6/2026، بۆ ڕێگریکردن لە دروستبوونی لۆد و قەرەباڵغی و بۆ ئەوەی کارەکان بە خێرایی بەڕێوە بچن، ئەم ڕێگایانەی خوارەوە بۆ هاتوچۆ بەکار نەهێنن:

-سایدی ڕێگای پیرمام، بە دیاریکراوی لە سووڕانەوەکە بەرەو شاری ئیتاڵی 2 لەسەر شەقامی 120 مەتری.

-شەقامی 120 مەتری، لە نێوان بەرزەپردی بەحرکە بەرەو بەرزەپردی پیرمام، بە دیاریکراوی لە بەردەم گوندی ئارام تاوەكوو بەرزەپردی پیرمام.

لە ئاگادارییەكەدا داوا لە شۆفێران كراوە، ئەمڕۆ ڕێگای جێگرەوە بەکار بهێنن تا دوور بن لە قەرەباڵغی.

سه‌رۆكی حکومەت پێشوازیی له‌ باڵيۆزى توركيا دەکات

ئه‌مڕۆ پێنجشەممە‌ 6/4، مەسرور بارزانى، سه‌رۆكى حکومەتی هه‌رێمى كوردستان، پێشوازی لە ‌ئانل بۆرا ئينان، باڵيۆزى توركيا له‌ عێراق کرد.

لە کۆبوونەوەدا کە ئەرمان تۆپچو، کونسولی گشتیی تورکیا لە هەرێمی کوردستان ئامادەی بوو، هەردوولا جەختییان لە گرنگیی پێشخستنی زیاتری پەیوەندییەکانی هەرێمی کوردستان و تورکیا کردەوە، بە تایبەتی لە بواری ئاڵوگۆڕی بازرگانیدا. لەمبارەیەوە، ئاماژە بە سەردانی گرنگ و سەرکەوتووی مانگی ڕابردووی سەرۆکی حکومەت بۆ تورکیا و دیدار و کۆبوونەوەکانی لەگەڵ سەرۆکی تورکیا و بەرپرسە باڵاکانی دیکەی ئەو وڵاتە درا.

هەروەها بیروڕا لەبارەی دوایین پێشهات و گۆڕانکاری و پەرەسەندبەکانی دۆخی گشتیی عێراق و پێویستیی پشتیوانیکردنی حکومەتی نوێی فیدراڵ بۆ چارەسەرکردنی کێشەکان و ڕووبەڕووبوونەوەی ئاڵنگارییە جۆراوجۆرەکان ئاڵوگۆڕ کرا.

لە بەشێکی دیکەی گفتوگۆکاندا، باس لە گرنگیی پەرەپێدانی کەرتی وزە لە عێراق و بەردەوامبوونی هەناردەکردنی نەوتی عێراق و هەرێمی کوردستان لە ڕێگەی بەندەری جەیهانی تورکیا و کارکردن بۆ پەرەپێدانی بەرهەمهێنانی نەوت و زیادکردنی داهاتی گشتی و باشترکردنی دۆخی دارایی عێراق کرا.

لە هەولێر یەکەم پێشانگای کتێبی کوردی کرایەوە

ئەمرۆ پێنجشەممە بە ئامادەبوونی ژمارەیەکی بەرچاو لە بەرپرسانی سیاسی و ئیداری و ئەکادیمست و نوسەرو رۆشنبیران یەکەمین پێشانگای کتێبی کوردی لە هەولێر کرایەوە.

ئومێد خۆشناو، پارێزگاری هەولێر ڕایگەیاند، ئامانجی سەرەکی ئەم پێشانگایە گێڕانەوەی متمانەیە بۆ نووسەری کورد و کتێبی کوردی، چونکە پێشانگاکە دەبێتە سەکۆیەک بۆ دووبارە بەها بەخشینەوە بە هزرو بابەتە ناوخۆییەکان و ئاشتکردنەوەی خوێنەر لەگەڵ قەڵەمی کوردی.

ڕاشیدەگەیەنێت، یەکەمین پێشانگای کتێبی کوردی، هەنگاوێکی گرنگ و ستراتیژییە، چونکە یەکەمین جارە ئەزموون و چالاکییەکی هاوشێوە بەو فراوانییەوە لە هەرێمی کوردستان جێبەجێ دەکرێت.

پێشانگاکە بە بەشداریی زیاتر لە 100 دەزگا و ناوەندی چاپ و بڵاوکردنەوەی کوردی لە هەرێمی کوردستان و دەرەوەی وڵات بەڕێوەچوو، تێیدا هەزاران ناونیشانی جۆراوجۆر لە بەرهەمە فکری، ئەدەبی، مێژوویی، کۆمەڵایەتی و زانستییەکان خرانە ڕوو.

لە ماوەی رۆژانی پێشانگاکەدا چەندین بڕگە و چالاکی ڕۆشنبیری، ئەدەبی، هونەری و فەرهەنگی، وەک دیدار پانێل و وۆرک شۆپ ئەنجام دەدرێن.

سەرۆك بارزانی پێشوازی لە باڵیۆزی توركیا لە عێراق دەكات

ڕۆژی پێنجشەممە 4ی حوزەیرانی 2026 سەرۆك مەسعود بارزانی پێشوازی لە بەڕێز ئانڵ بۆرا ئینان باڵیۆزی توركیا لە عێراق كرد.

لە دیدارەكەدا كە بەڕێز ئەرمان تۆپچو كونسوڵی توركیا لە هەولێریش ئامادەی بوو، بیروڕا لەبارەی دوایین گۆڕانكاری و شەڕ و گرژییەكان لەسەر ئاستی ناوچەكە ئاڵوگۆڕ كرا و باڵیۆزی توركیا پێزانینی وڵاتەكەی بۆ دانبەخۆداگرتن و سیاسەتی حەكیمانەی هەرێمی كوردستان نیشان دا كە وێڕای بوونی هەوڵ بۆ تێوەگڵاندنی هەرێم و بوونی دەستدرێژی و بوردومانی بەردەوام بۆسەر هەرێم بەڵام هەرێم بە هەموو شێوەیەك هەوڵی دا نەبێتە بەشێك لەو شەڕ و گرژییانەی لە ناوچەكەدا ڕووی دا.

لە بەشێكی ئەو دیدارە باس لە بارودۆخی دوای پێكهێنانی حكوومەتی عێراقی و پەیوەندییەكانی نێوان هەرێم و بەغدا و هەروەها پەیوەندیی نێوان پارتی و لایەنە سیاسییەكانی عێراق كرا. هەردوولا هیوای ئەوەیان خواست كە هەوڵەكان بە ئاقاری چارەسەركردنی كێشەكان و هەماهەنگیی تەواو لەبوارە جیاجیاكان و نەهێشتنی گرفتەكاندا بچن.

هەر لەو دیدارەدا ڕۆشنایی خرایە سەر پەیوەندییەكانی نێوان عێراقی فیدڕاڵ و هەرێمی كوردستان و توركیا و گفتوگۆ لەبارەی دەرئەنجامەكانی دوایین سەردانی سەرۆكی حكوومەتی هەرێمی كوردستان بۆ توركیا كرا و جەخت لە پەرەپێدانی پەیوەندی و دۆستایەتیی نێوان هەردوولا كرایەوە.

بارودۆخی ناوخۆی هەرێمی كوردستان و هەنگاوەكان بۆ وەگەڕخستنی پڕۆسەی سیاسی تەوەری تری ئەو دیدارە بوو.

گەڕانەوەی یەکەم کاروانی حاجیانی هەرێمی کوردستان بۆ فڕۆکەخانەی نێودەوڵەتی هەولێر

​ئەمڕۆ پێنجشەممە 4ی حوزەیرانی 2026، یەکەم کاروانی حاجیانی هەرێمی کوردستان دوای تەواوکردنی ئەنجامدانی فەریزەی حەج، لە ڕێگەی فڕۆکەخانەی نێودەوڵەتی هەولێرەوە گەیشتنەوە زێدی خۆیان و لەلایەن ژمارەیەکی زۆر لە کەسوکار و بنەماڵەکانیانەوە بە گەرمی پێشوازییان لێکرا.

​بەپێی ئەو بەرنامەیەی بۆ گەڕانەوەی حاجیان داڕێژراوە، پرۆسەی گواستنەوەی حاجیان لە سعودیەوە بۆ هەرێمی کوردستان بەردەوام دەبێت و بڕیارە سەرجەم حاجیانی هەرێم بە حەوت گەشتی ئاسمانی بگەنەوە. لەو چوارچێوەیەدا، چوار فڕۆکە بۆ گواستنەوەی حاجیانی پارێزگای هەولێر تەرخانکراون، هەروەها دوو فڕۆکە تایبەتکراون بە گەڕانەوەی حاجیانی پارێزگای دهۆک و فڕۆکەی حەوتەمیش حاجیانی ئیدارەی سەربەخۆی زاخۆ دەگەیەنێتەوە.

​جێگەی ئاماژەیە، بۆ وەرزی ئەمساڵ پێنج هەزار و 120 هاووڵاتی لە هەرێمی کوردستانەوە سەردانی وڵاتی سعودیەیان کردووە بەمەبەستی بەجێگەیاندنی فەریزەی حەج. تیمەکانی فڕۆکەخانەی نێودەوڵەتی هەولێر و لایەنە پەیوەندیدارەکان ڕێوشوێنی پێویستیان بۆ ئاسانکاری پرۆسەی گەڕانەوەی حاجیان و وەرگرتنی کەلوپەلەکانیان گرتووەتەبەر، تاوەکو بە سەلامەتی بگەنەوە ناو کەسوکاریان.

نێچیرڤان بارزانی و باڵیۆزی تورکیا دۆخی ناوچەکە تاوتوێ دەکەن

نیوەڕۆی ئەمڕۆ پێنجشەممە 2026/6/4، بەڕێز نێچیرڤان بارزانی، سەرۆکی هەرێمی کوردستان، پێشوازیی لە بەڕێز ئانل بۆرا ئینان، باڵیۆزی تورکیا لە عێراق و شاندێکی یاوەری کرد.

لە دیدارێكدا، پەیوەندییەکانی تورکیا لەگەڵ عێراق و هەرێمی کوردستان، دۆخی سیاسیی عێراق و پەرەپێدانی هاوکاریی دوو لایەنە، بەتایبەت لە بوارى ئابووری و بازرگانیدا، تاوتوێ کرا. له‌مباره‌يه‌وه‌ جەختیان لەسەر گرنگیی بەردەوامیی هەماهەنگی لە پێناو پاراستنی ئارامى و سەقامگیری کردەوە.

هه‌ردوولا دەربارەی دۆخی سیاسی لە هەرێمی کوردستان و هه‌وڵه‌كان بۆ تێپەڕاندن و چارەسەرکردنی کێشە ناوخۆیییەکان، بیروڕایان گۆڕییەوە، هەروەها دیالۆگ و لێکگەیشتنى هەولێر ـ بەغدايان بۆ چارەسەرکردنی کێشە هەڵپەسێردراوەکان، به‌ پێويست زانى.

پرۆسه‌ی ئاشتی له‌ تورکیا، دوایين پێشهاتە هەرێمییەکان و دۆخی ناوچەکە، تەوەرێکی دیکەی دیدارەکە بوو. تيايدا هاوڕا بوون له‌سه‌ر گرنگیی چارەسەرکردنی ئاشتیانەی کێشە و ناکۆکییەکان و پاراستنی ئارامی و سەقامگیرى.

له‌ ديداره‌كه‌دا بەڕێز ئەرمان تۆپچو، كونسوڵى گشتيى توركیا له‌ هه‌رێمى كوردستان، ئاماده‌ بوو.

بازدانی نرخی زێڕ و زیو لەگەڵ یەکەم ڕۆژی کردنەوەی بازاڕەکانی جیهاندا

​ئەمڕۆ دووشەممە، ٢٥ـی ئایاری ٢٠٢٦، لەگەڵ کردنەوەی بازاڕەکان لە یەکەم ڕۆژی هەفتەدا، کانزا گرانبەهاکان بازدانێکی بەرچاویان بەخۆوە بینی؛ نرخی زێڕ و زیو بەهۆی دابەزینی بەهای دۆلاری ئەمریکی، بەڕێژەی زیاتر لە ١٪ ڕوویان لە بەرزبوونەوە کرد، ئەمەش لە کاتێکدایە کە بازاڕی نەوت بە پێچەوانەوە دابەزینی تۆمار کردووە.

​لە بازاڕە جیهانییەکاندا، نرخی یەک ئۆنسە زێڕ بەرزبووەوە بۆ 4,563.64 دۆلار، یەک کیلۆگرام گەیشتە 146,724.43 دۆلار و یەک گرامیش بە 146.72 دۆلار مامەڵەی پێوە دەکرێت. هاوکات لە بازاڕەکانی ناوخۆشدا و بەپێی نرخی فەرمی سەندیکای زێڕنگران، عەیارەکان بەهایەکی بەرزتریان تۆمار کرد؛ بە جۆرێک عەیارەی ٢٢ بە 1,029,019 دینار، عەیارەی ٢١ بە 982,245 دینار و عەیارەی ١٨ بە 841,925 دینار جێگیر بوو.

​لەلایەکی دیکەوە، بازاڕی زیویش هاوشێوەی زێڕ ڕووی لە بەرزبوونەوەیەکی بەرچاو کرد، بە جۆرێک لە ئێستادا نرخی هەر ئۆنسەیەک زیو گەیشتووەتە 77.72 دۆلار، هەر کیلۆگرامێک بە 2,498.79 دۆلار مامەڵەی پێوە دەکرێت و نرخی هەر گرامێکیش لەسەر 2.5 دۆلار جێگیر بووە.

​سەبارەت بە هۆکاری ئەم گۆڕانکارییانە، شارەزایان ئاماژە بەوە دەکەن کە وەبەرهێنەران و بازرگانان بە گەشبینییەوە دەڕواننە ئەگەری ڕێککەوتنی نێوان ئێران و ئەمریکا. ئەم دۆخەش بووە هۆی دابەزینی بەهای دۆلار و دابەزینی نرخەکانی نەوت بۆ کەمترین ئاستی دوو هەفتەی ڕابردووی خۆیان، ئەمەش هۆکار بوو بۆ کەمکردنەوەی نیگەرانییەکان لەسەر سەرهەڵدانەوەی هەڵاوسان و ڕاکێشانی سەرنجی وەبەرهێنەران بۆ سەر کانزا گرانبەهاکان.

نرخی نەوت دووبارە ڕووی لە بەرزبوونەوە کردەوە

​ئەمڕۆ سێشەممە، ٢٦ـی ئایاری ٢٠٢٦، لە دوای کردنەوەی بازاڕەکانی ئاسیا، نرخی نەوت ئاراستەکەی گۆڕی و دووبارە ڕووی لە هەڵکشان کردەوە، دوای ئەو دابەزینە بەردەوامانەی لە ڕۆژانی ڕابردوودا تۆماری کردبوون.

​بەپێی دواین نوێکردنەوەکانی بازاڕ، نرخی هەر بەرمیلێک نەوتی خاوی برێنت گەیشتووەتە 99.15 دۆلار، کە بەراورد بە ئامارەکانی کاتی کردنەوەی دوێنێ (98.49 دۆلار) بە بڕی 66 سەنت بەرزبووەتەوە.

هاوكات، نرخی هەر بەرمیلێک نەوتی خاوی سووکی تەکساسی ئەمریکیش ڕووی لە بەرزبوونەوە کرد و گەیشتە 92.65 دۆلار، کە ئەمەش بەراورد بە کاتی پێشوو (91.41 دۆلار) بەرزبوونەوەی 1.24 دۆلاری نیشان دەدات.

​ئەم گۆڕانکارییە نوێیەی بازاڕ و هەڵکشانی نرخەکان بۆ سەرهەڵدانەوەی گرژییەکانی نێوان ئێران و ئەمریکا دەگەڕێتەوە، کە وەک هۆکاری سەرەکی ئەم بەرزبوونەوەیە دەستنیشان دەکرێت، هەرچەندە پێشتر گەشبینییەک بۆ ڕێککەوتن هەبوو، بەڵام نوێبوونەوەی ئاڵۆزییەکان دووبارە ترسی لای وەبەرهێنەران دروستکردووەتەوە سەبارەت بە سەقامگیریی هاتوچۆی کەشتییەکان لە گەرووی هورمز و دابینکردنی وزە لەسەر ئاستی جیهان.

نرخی زێڕ و زیو لە بازاڕەکانی جیهان و ناوخۆدا

ئەمڕۆ سێشەممە، ٢٦ـی ئایاری ٢٠٢٦، بازاڕەکانی کانزا گرانبەهاکان گۆڕانکاری نوێیان بەخۆوە بینی و نرخەکان ڕوویان لە دابەزین کردەوە؛ ئەمەش دوای ئەوە هات کە هێرشی نوێی ئەمریکا بۆ سەر چەندین ئامانج لە باشووری ئێران بووە هۆی دووبارە بەرزبوونەوەی نرخی نەوت، کە ئەمەش بە نەرێنی کاریگەری لەسەر نرخی زێڕ و زیو دانا.

​لە بازاڕە جیهانییەکاندا، نرخی یەک ئۆنسە زێڕ دابەزی بۆ 4,532.88 دۆلار، یەک کیلۆگرام بە 145,735.32 دۆلار و یەک گرامیش بە 145.74 دۆلار مامەڵەی پێوە دەکرێت.

هاوكات لە بازاڕەکانی ناوخۆشدا و بەپێی نرخی فەرمی سەندیکای زێڕنگران، نرخەکان کەمێک هاتنە خوارەوە و بەم شێوەیە جێگیر بوون؛ عەیارەی ٢٢ بە 1,022,353 دینار، عەیارەی ٢١ بە 975,882 دینار و عەیارەی ١٨ بە 836,471 دینار مامەڵەی پێوە دەکرێت.

​لەلایەکی دیکەوە، بازاڕی زیویش هاوشێوەی زێڕ ڕووی لە دابەزین کرد، بە جۆرێک لە ئێستادا نرخی هەر ئۆنسەیەک زیو هاتووەتە خوارەوە بۆ 76.33 دۆلار، هەر کیلۆگرامێک بە 2,453.97 دۆلار مامەڵەی پێوە دەکرێت و نرخی هەر گرامێکیش لەسەر 2.45 دۆلار جێگیر بووە.

​شارەزایانی دارایی ئاماژە بەوە دەکەن کە بازاڕ بە نیگەرانییەوە لە دۆخی ئێستای ناوچەکە دەڕوانێت؛ بەرزبوونەوەی گرژییەکان و نرخی نەوت مەترسییەکانی بەرزبوونەوەی هەڵاوسانی زیاتر کردووە، ئەمەش ئەگەری بەرزکردنەوەی سوودی بانکی لە لایەن بانکە ناوەندییەکانەوە هێناوەتە پێشەوە کە ڕاستەوخۆ زیان لە بەهای کانزا گرانبەهاکان دەگەیەنێت.