ئاس؛ یاریزانە یەدەگەکانی ڕیاڵ مەدرید جیاوازی دروست ناکەن

یانەی ریاڵ مەدرید لەم وەرزەدا بەبارودۆخێکی باشدا تێناپەرێت بەجۆرێک ئاستی یانەکە بەبەردەوام لە بەرزبوونەوە و نزمبوونەوەدایە لە دۆخێکی جێگیردا نیە.

رۆژنامەی ئاس راپۆرتێکی سەبارەت بە یاریزانە جێگرەوەکانی ئەم وەرزەی ریاڵ مەدرید بڵاوکردووەتەوە کە کەمترین کاریگەرییان هەبووە لەسەر ئەنجامەکانی مێرێنگی.

لە راپۆرتەکەی رۆژنامە ئیسپانییەکەدا هاتووە کە ریاڵ لەم وەرزەی لالیگا تەنها دوو گۆڵیان لە رێگەی یاریزانی یەدەگەوە تۆمارکردووە بەجۆرێک فران گارسیا بەرامبەر ریاڵ بیتس گۆڵی پێنجەمی تۆمارکردوو و ڤینیسیۆسیش بەرامبەر ریاڵ ئۆڤیدۆ گۆڵی سێیەمی بۆ یانەکەی تۆمارکرد.

لەلایەکیترەوە بەرشەلۆنە بەسەرکردایەتی فلێک زۆرترین سودیان لە گۆرانکارییەکانیان وەرگرتووە و بەجۆرێک لەم وەرزە خولی ئیسپانیا 13 گۆڵیان لەرێگەی ئەو یاریزانانەوە تۆمارکردووە کە تایمی دووەم بەشدارییان کردووە.

مەترسیی كەمكردنەوەی مووچەی فەرمانبەرانی عێراق هەیە

ئابووریناسێكی عێراقی هۆشداری له‌باره‌ی چاكسازییه‌كانی حكوومه‌تی فیدرالیی عێراق ده‌دات و پێیوایه‌ نابێت ده‌ستكاریی مووچه‌ و قووتی فه‌رمانبه‌ران بكرێت و چاكسازی ده‌بێت له‌ نه‌وت و گرێبه‌ستی كۆمپانیا و كرێكارە بیانییه‌كان بكرێت.

نه‌بیل مەرسوومی، ئابووریناسی عێراقی له‌ پلاتفۆڕمی خۆی له‌ (فه‌یسبووك)، هێرشی توندی كردووه‌ته‌ سه‌ر سیاسه‌تی سه‌ركرده‌كانی عێراق و ده‌ڵێت: “چاکسازی بە کەمکردنەوەی پارە و هاندانی فه‌رمانبه‌ران دەست پێناكات، به‌ڵكوو لە ڕووبەڕووبوونەوەی گەندەڵی بە شێوە جۆراوجۆرەکانیەوە دەست پێدەکات، لە گرێبەستەکانی نەوت و کارەبا و گواستنەوە، له قاچاخچێتیی نه‌وت و گرێبه‌ستی كۆمپانیا بیانییه‌كان دەست پێدەكات.“

ئەوەشی خستە ڕوو: “مووچە گرنگترین بەشی ژیانی تاكی عێراقی پێك ده‌هێنێت و بڕینی مووچە خواستی بەکاربەر کەم دەکاتەوە، بەم شێوەیەش خواستی گشتی کەم دەبێتەوە و داكشانی ئابووری قووڵتر ده‌بێته‌وه. له‌ بنه‌ڕه‌تدا پێویستە چاکسازی لایەنی ئابووریی به‌رزبكاته‌وه‌، ئه‌مه‌ش به‌ پشتیوانی سیاسی و جەماوەری ده‌كرێت بۆ سەرکەوتنی چاکسازی بەڵام چاکسازی بە کونکردنی گیرفانی فەرمانبەران نییە”.

مه‌ڕسومی ئاگاداری ئه‌وه‌شی دا، نه‌وت تاكه‌ سه‌رچاوه‌ی داهات و سه‌رمایه‌ی سه‌ره‌كیی بودجه‌ی گشتیی عێراقه‌، به‌بێ نه‌وت داهاتی ئابووری توشی داڕمان ده‌بێت و هه‌ر كێشه‌یه‌ك له‌ كاره‌كانی نه‌وت دروست بێت، زیان به‌ هه‌موو عێراق ده‌گه‌ێنێت. ده‌بێت بزانین چاكسازی له‌ مووچه‌ و هاوسه‌نگكردنی گرنگە، به‌ڵام نەك لە ڕێگەی كەمكردنەوەی مووچەی خاوەن مووچە مامناوەندییەكان، بەڵكوو لە ڕێگەی ‌چاره‌سه‌ركردنی گه‌نده‌ڵی و كەمكردنەوەی مووچه‌ی بڕوانامه‌ی تایبه‌تەكان و ئیمتیازاتی به‌شێك له‌ سه‌ركرده‌كان و به‌رزكردنه‌وه‌ی مووچه‌ی ئه‌و فه‌رمانبه‌رانه‌ی كه‌ مووچه‌كانیان كه‌مه‌.

سەرۆکی حکومەت پێشوازی لە شاندێکی ئەڵمانی دەکات

ئەمڕۆ چوارشەممە 2/25، مەسرور بارزانی سەرۆکی حکومەتی هەرێمی کوردستان، پێشوازی لە شاندێکی ئەڵمانی کرد بە سەرۆکایەتی جیزا ئەندریاس ڤۆن گەیر بریکاری وەزارەتی دەرەوە.

لە کۆبوونەوەکەدا کە دانیال کرێبەر باڵیۆزی ئەڵمانیا لە عێراق ئامادەی بوو، هەردوولا هاوڕابوون لەسەر گرنگیی بەهێزکردنی پەیوەندیی دوولایەنە لە بوارە جۆراوجۆرەکاندا .

سەرۆکی حکومەت سوپاسی پشتیوانیی و هاریکاری ئەڵمانیای بۆ هەرێمی کوردستان کرد و جەختی لە پێشخستنی پەیوەندییەکانی هەرێمی کوردستان و ئەڵمانیا کردەوە.

هەردوولا جەختیان لە پێویستیی پەرەپێدانی هاریکاریی و هاوئاهەنگیی کۆمەڵگەی نێودەوڵەتی کردەوە بۆ ڕووبەڕووبوونەوەی هەڕەشە و مەترسییەکانی تیرۆریستانی داعش لە عێراق و سووریا.

لە بەشێکی دیکەی دیدارەکەدا ، بیروڕا لەبارەی دۆخی گشتیی عێراق و ناوچەکە، هەوڵ و گفتوگۆکانی هەڵبژاردنی سەرۆک کۆمار و پێکهێنانی حکومەتی فیدراڵ و هەرێم ئاڵوگۆڕ کرا.

هه‌ولێر.. پێگه‌یه‌كی شوێنەواری كۆن لە باغلومناره‌ی هەولێر دۆزرایەوە

-زیاتر له‌ 100 كه‌لـله‌ی سه‌ری مرۆڤ و پاره‌ی کۆن و خڕخاڵ و ملوانکە و بازنێکی ئاسن و گۆزەی تێدایه‌

له‌ گه‌ڕه‌كی باغلومناره‌ی شاری هه‌ولێر له‌ كاتی كاركردن له‌ پڕۆژه‌ خزمه‌تگوزارییه‌كاندا، پێگه‌یه‌كی شوێنه‌واری كه‌ گۆڕیكی به‌كۆمه‌ڵه‌ دۆزرایه‌وه‌‌ و زیاتر له‌‌ 100 كه‌لـله‌سه‌ری مرۆڤ و پاره‌ی كۆن و خڕخاڵ و ملوانكه‌ و بازنی ئاسن و گۆزه‌ی تێدایه‌.

به‌پێی به‌ڕێوه‌به‌رایه‌تیی شوێنه‌وار و كه‌له‌پووری هه‌ولێر، له‌ چه‌ند ڕۆژی ڕابردوودا تیمی شوێنەواریی ناوخۆ و بەڕێوەبەرایەتیی گشتیی شوێنەوار و کەلەپوور و بەڕێوەبەرایەتیی شوێنەوار و کەلەپووری هەولێر لە ناوچەی باغلومنارەی شاری هه‌ولێر پێگه‌یه‌كی شوێنه‌واری كه‌ گۆڕێکی بەکۆمەڵه‌ دۆزراوەتەوە كه‌ پێده‌چێت مێژووه‌كه‌ی بۆ نزیكه‌ی 1400 ساڵ له‌مه‌وبه‌ر بگه‌ڕێته‌وه‌.

هه‌ر به‌پێی به‌ڕێوه‌به‌رایه‌تیی شوێنه‌وار و كه‌له‌پووری هه‌ولێر له‌و شوێنه‌دا تا ئێستا پاشماوه‌ی زیاتر له‌ 100 كه‌لـله‌سه‌ری مرۆڤ و پارەی کۆن و دوو خڕخاڵی بڕۆنز و دوو مرواری ملوانکە و بازنێکی ئاسن و چوار پارچه‌ گۆزه‌ له‌گه‌ڵ ته‌رمه‌كاندا دۆزراونەتەوە و بۆ یەکلاییکردنەوەی ڕاستییەکانیش، نموونەی DNA ڕەوانەی وەزارەتی ناوخۆ کراوە بۆ پشکنینی وردی زانستی.

هه‌ر به‌پێی به‌ڕێوه‌به‌رایه‌تیی شوێنه‌وار و كه‌له‌پووری هه‌ولێر ئه‌و پێگه‌ شوێنه‌وارییه‌ لە نزیک شەقامێکی گەڕەکی باغلومنارەی شاری هەولێره‌ و له‌ كاتی كاركردندا کرێکارەکان ژمارەیەک ئێسکه‌سەری مرۆڤیان بینیوه‌ و دواتر تیمەکان ئاگه‌دار كراونه‌ته‌وه‌ و دوای کنەوپشکنینی پێگه‌كه‌ دەرکەوتووه‌ كه‌ شوێنەوارێکی مێژوویییه‌ و ژمارەیەک سکەی زیو و زیاتر له‌ 100 کەلـلەسەری مرۆڤ و پارەی کۆن و دوو خڕخاڵی بڕۆنز و دوو ملوانکەی مرواری و بازنێکی ئاسن و چوار پارچەی گۆزە لەو ناوچەیە دۆزراوەتەوە.

کەشناسی: لەم ناوچانەدا باران و بارانی مامناوەند دەبێت

ئەمڕۆ چوارشەممە 25-2- 2026

کەش /ئاسمان ساماڵ و پەڵە هەور دەبێت لە ناوچە شاخاویەکان نیمچە هەور و هەوری تەواو دەبێت.

خێراى با / لەسەرخۆ ( 5 – 15) دەبێت.

ئاراستەی با / باشووری خۆرهەڵات.

مەوداى بینین / لە نێوان ( 8 – 10 ) کم دەبێت.

پلەکانی گەرما / کەمێک نزم دەبێتەوە بەراورد بە تۆمارکراوەکانی دوێنێ وەک لە خوارەوە ئاماژەیان پێدراوە.

بەرزترین پلەکانی گەرمای پێشبینیکراو بۆ ئەمرۆ:

هەولێر 17 پلەی سیلیزی

پیرمام 14 پلەی سیلیزی

سۆران 16 پلەی سیلیزی

حاجی ئۆمەران 6 پلەی سیلیزی

سلێمانی 17 پلەی سیلیزی

چەمچەماڵ 18 پلەی سیلیزی

دهۆک 17 پلەی سیلیزی

زاخۆ 17 پلەی سیلیزی

هەڵەبجە : 18 پلەی سیلیزی

گەرمیان : 22 پلەی سیلیزی

سبەى پێنچشەممە 26-2- 2026

کەش/ ئاسمان ساماڵ و پەڵە هەور و نیمچە هەور دەبێت بە گشتی، کاریگەری نزمە پاڵە پەستۆیەکی لاواز درێژ دەبێتەوە بۆ سەر بەشێک لە ناوچە شاخاویەکانی سنووری ئیدارەی سۆران و سەرجەمی ناوچە جیا جیاکانی سنووری پارێزگای دهۆک ئیدارەی زاخۆ باران بارین لەم ناوچانەدا بە شێوەی نمە باران و بارانی مامناوەند دەبێت هاوکات بەفرێکی کەم لە ناوچە شاخاویە سنووریەکان دەبارێت .

خێراى با / لەسەرخۆ – مام ناوەند ( 10 – 25). لە دوای نیوەرۆ زیادبوونی خێرایی با بۆ سەرووی 25کم/کاتژمێر دەبێت.

ئاراستەی با / باشووری خۆرهەڵات.

مەوداى بینین / لەنێوان ( 8 – 9 ) کم/ک.

پلەکانی گەرما / کەمێک بەرز دەبێتەوە بەڵام لە ناوچە شاخاویەکان نزم دەبێتەوە بە (2 – 3 ) پلە بە بەراورد لە تۆمارکراوەکانی ئەمڕۆ وەک لە خوارەوە ئاماژەیان پێدراوە.

بەرزترین پلەکانی گەرمای پێشبینیکراو بە پلەی سیلیزی

هەولێر 18 پلەی سیلیزی

پیرمام 15 پلەی سیلیزی

سۆران 16 پلەی سیلیزی

حاجی ئۆمەران 5 پلەی سیلیزی

سلێمانی 18 پلەی سیلیزی

چەمچەماڵ 19 پلەی سیلیزی

دهۆک 15 پلەی سیلیزی

زاخۆ 16 پلەی سیلیزی

هەڵەبجە : 19 پلەی سیلیزی

گەرمیان : 23 پلەی سیلیزی

تێبینی// سبەی لە کاتی زیادبوونی خێرایی با لە سنووری باشوری پارێزگای هەولێر و بەشێک لە ئیدارەی گەرمیان و سنووری پارێزگای کەرکوک ئەگەری بەرزبوونەوەی تۆزێکی کەم هەیە.

25/2/2026

“فارس عیسا” سەردانی بەڕێوەبەرایەتی گشتی هەواڵگری و ئاسایشی وەزارەتی بەرگری دەکات

ئەمڕۆ چوارشەممە 25ی شوباتی 2026، بەڕێز “فارس عیسا” سه‌رۆكى نوێنەرایەتی حکومەتی هەرێمی کوردستان لە بەغدا، سەردانی بەڕێوەبەرایەتی گشتی هەواڵگری و ئاسایشی وەزارەتی بەرگری کرد و، لەلایەن ليوا ڕوكن “ئیدریس خدر” بەڕێوەبەری گشتی پێشوازی لێکرا.

لە میانی دیدارەکەدا، باسیان لە بارودۆخی گشتی ئەمنی و ،ڕێگاکانی بەرزکردنەوەی ئاستى هەماهەنگی و هاوکاری، لە هەوڵە هەواڵگرییە هاوبەشەکانی نێوان دامودەزگا فیدراڵیەکان و هاوتاکانیان لە هەرێمی کوردستان کرد، بە ئامانجی بەهێزکردنی ئاسایش و سەقامگیری.

هەروەها جەختیان لە گرنگی یەکخستنی هەوڵەکان و ،چڕکردنەوەی کاری هاوبەش کردەوە، بەتایبەتی لە بەرەنگاربوونەوەی تیرۆر، و بەدواداچوونی تۆڕەکانی بازرگانیکردن بە ماددە هۆشبەرەکان، و چارەسەرکردنی تاوانە نێودەوڵەتییەکان، به‌مه‌به‌ستى به‌رزكردنه‌وه‌ى، ئاستى ئاسایشی نیشتمانی و پاراستنی گيانى هاووڵاتیان.

بڕیاری لێخۆشبوون لە سزای سەرپێچیەکانی هاتووچۆ بە ڕێژەی 20% درێژکرایەوە

لە کۆبوونەوەی ئەمڕۆی ئەنجومەنی وەزیراندا، لەسەر پێشنیاری وەزارەتی ناوخۆ بڕیار درا بە درێژکردنەوەی ماوەی لێخۆشبوون لە سزای سەرپێچیەکانی هاتووچۆ بەڕێژەی 20% و بڕیارەکەش تاکو 30ـی6ـی2026 کاری پێدەکرێت.

جێی وەبیرهێنانەوەیە لە ساڵی 2024 بڕیاری لێخۆشبوون لە سزاکانی هاتووچۆ بەڕێژەی 20% دراو چەند جارێکیش بڕیارەکە له بەرژەوەندی هاوڵاتییان درێژکراوەتەوە.

سەرۆك نێچيرڤان بارزانى و وه‌زيرى ده‌وڵه‌تى ئه‌ڵمانيا بۆ كاروبارى ده‌ره‌وه کۆبوونه‌وه‌

نیوەڕۆی ئەمڕۆ چوارشەممە 2026/2/25 بەڕێز نێچیرڤان بارزانی، سەرۆکی هەرێمی کوردستان، پێشوازیی لە بەڕێز د. جێزا ئەندریاس ڤۆن گایەر، وه‌زیرى ده‌وڵه‌تى ئەڵمانیا بۆ كاروبارى ده‌ره‌وه و شاندێکی یاوەری کرد.

لە کۆبوونەوەیەکدا، پەرەپێدانی پەیوەندییەکانی ئەڵمانیا لەگەڵ عێراق و هەرێمی کوردستان، دوایین پێشهاته‌کانی دۆخی سیاسیی عێراق و هەرێمی کوردستان و پەیوەندییەکانی هەولێر ـ بەغدا و دۆخی ناوچه‌که‌، تاوتوێ کران.

شاندی میوان دووپاتیان کردەوە کە ئەڵمانیا بە بایەخەوە سەیری سەقامگیریی عێراق و هەرێمی کوردستان دەکات و خواستی وڵاته‌که‌یان بۆ به‌رده‌وامیی هاریکاریی هاوبەشیان لە بوارە جیاوازەکاندا، ده‌ربڕی.

لای خۆیەوە سەرۆک نێچیرڤان بارزانی سوپاسی هاوکاری و پشتگیرییەکانی ئەڵمانیای بۆ هەرێمی کوردستان له‌ هه‌موو بواره‌کاندا کرد، هەروەها جەختی لە گرنگیی چارەسەرکردنی ئاشتییانه‌ی کێشەکان و پاراستنی ئارامیی ناوچەکە کردەوە.

هه‌ڕه‌شه‌ و مه‌ترسییه‌کانی داعش، دۆخی سووریا و چەند پرسێکی جێی بایەخی هەردوولا، تەوەرێکی دیکەی کۆبوونەوەکە بوو کە بەڕێزان باڵیۆزی ئەڵمانیا لە عێراق و کونسوڵی گشتییان لە هەرێمی کوردستان، ئامادەی بوون.

ئەنجومەنی وەزیران داوا لە حکومەتی فیدراڵ دەکات نەک تەنیا مووچە و شایستە داراییەکانی مووچەخۆرانی هەرێم بەڵکوو بەشە بودجەی هەرێمی کوردستان بەپێی ڕێژەی 14.1ی سەرژمێريی گشتیی دانیشتووانی عێراق بنێرێت

* ئەنجومەنی وەزیران، وەزارەتی پێشمەرگە و لایەنە پەیوەندیدارەکانی دیکەی ڕاسپارد بە گوێرەی کۆنووسی هاوبەشی پەسەندکراو، کاری پێویست لەبارەی هەنگاوەکانی ئەم دواییەی جێبەجێکردنی چاکسازییەکانی وەزارەتی پێشمەرگە و ڕێکخستنەوەی سەرجەم هێزەکانی پێشمەرگە لە ناو وەزارەتی پێشمەرگە ئەنجام بدەن .

* ڕێژەی 20% لێخۆشبوونی سزاکانی سەرپێچیی ئۆتۆمبيل، بۆ شەش مانگی دیکە درێژ کرایەوە.

ئەمڕۆ چوارشەممە 25ی شوباتی 2026، بەسەرپەرشتی سەرۆکی ئەنجومەنی وەزیران مەسرور بارزانی و ئامادەبوونی قوباد تاڵەبانی جێگری سەرۆک وەزیران، ئەنجومەنی وەزیرانی هەرێمی کوردستان کۆبووەوە.

لە سەرەتای کۆبوونەوەکەدا، دوا هەڵوێستی بارودۆخی دارایی هەرێمی کوردستان و خەرجکردنی مووچەی مانگی شوباتی مووچەخۆرانی هەرێم و بەدواداچوونی دەرەنجامی دوا کۆبوونەوەی تیمی هاوبەشی هەردوو دیوانی چاودێری دارایی فیدراڵ و هەرێم سەبارەت بە پابەندیی دارایی هەردوو حکومەتی فیدراڵ و هەرێم بەرامبەر یەکتر، لەلایەن ئاوات شێخ جەناب وەزیری دارایی و ئابووری و ئەندامانی دیکەی شاندی دانوستانکار خرایە ڕوو.

ئەنجومەنی وەزیران دووپاتی کردەوە کە پێویستە حکومەتی فیدراڵ نەک تەنیا مووچە و شایستە داراییەکانی مووچەخۆرانی هەرێم، بەڵکوو بەشە بودجەی هەرێمی کوردستان لە چوارچێوەی بودجەی گشتیی فیدراڵ بە پێی ڕێژەی 14.1ی سەرژمێری گشتیی دانیشتووانی عێراق بنێرێت، بە تایبەتیش کە هەرێمی کوردستان پابەندیی نەوتیی و دارایی خۆی بە تەواوی جێبەجێ کردووە و لیستی مووچە و تەرازووی پێداچوونەوەی مانگانەش لە لایەن وەزارەتی دارایی و ئابووری حکومەتی هەرێمەوە بێ کەموکوڕی ئاراستەی وەزارەتی دارایی فیدڕاڵ کراوە، سەبارەت بە پابەندیی ناردنی 120 ملیار دینار بۆ مانگی شوباتیش، ئەنجومەنی وەزیران جەختیکردەوە لەسەر ئەولەویەتدان بە ناردنی ئەم پارەیە پێش هەر خەرجییەکی دیکە تاوەکوو هیچ پاساوێک بۆ وەزارەتی دارایی عێراق نەمێنێتەوە بۆ دواخستنی خەرجکردنی مووچەی مانگی شوبات و مانگەکانی دیکەش.

لە بەشێکی دیکەی گفتوگۆکان لەسەر ئەم بڕگەیە، دەرئەنجامی کۆبوونەوەی هاوبەشی هەردوو دیوانی چاودێری دارایی لە بەغدا لە ڕۆژی 2026/2/23 خرایەڕوو سەبارەت با پابەندییە داراییەکانی هەردوو حکومەت و هەموو ئەو بەڵگە و بنەما دەستووریی و قانونی و داراییانەش ڕوونکرانەوە کە پاڵپشتیی شایستە داراییەکانی هەرێم دەکەن.

لە بڕگەی دووەمدا، شۆڕش ئیسماعیل وەزیری کاروباری پێشمەرگە ، ڕاپۆرتێکی خستەڕوو دەربارەی هەنگاوەکانی ئەم دواییەی جێبەجێکردنی چاکسازییەکانی وەزارەتی کاروباری پێشمەرگە و ڕێکخستنەوەی سەرجەم هێزەکانی پێشمەرگە لە ناو وەزارەتی پێشمەرگە و پوختەی کۆنووسی واژۆکراوی هاوبەشی لایەنە پەیوەندیدارەکان سەبارەت بە دەستنیشانکردنی تایبەتمەندیی و ئەرک و دەسەڵاتەکانی دەڤەرەکان.

ئەنجومەنی وەزیران وێڕای دەستخۆشی لە سەرۆکایەتی هەرێم و وەزارەتی پێشمەرگە و لیژنە هاوبەشەکان، ئەم هەنگاوەی بە گرنگ و مێژوویی وەسف کرد لە ڕووی ڕێکخستنەوەی سەرجەم هێزەکان لە چوارچێوەی وەزارەتی پێشمەرگە و دەستنیشانکردنی دەسەڵاتی فەرماندەیی دەڤەرەکان و پەیکەربەندیی نوێی هێزەکانی پێشمەرگە، لە هەمانکاتدا ئەنجومەنی وەزیران سوپاسی هاوبەشە نێوەدەوڵەتییەکانی کرد کە هاوکار و پاڵپشتی پرۆسەکەیان کرد. ئەنجومەنی وەزیران، وەزارەتی کاروباری پێشمەرگە و لایەنە پەیوەندیدارەکانی دیکەی ڕاسپارد بە گوێرەی کۆنووسی هاوبەشی پەسەندکراو، کاری پێویست ئەنجام بدەن.

لە بڕگەی سێیەم و کۆتاییدا، ئەنجومەنی وەزیران گفتوکۆی لە بارەی پێشنیارێکی ڕێبەر ئەحمەد وەزیری ناوخۆ کرد تایبەت بە درێژکردنەوەی ماوەی کارکردن بە بڕیاری پێشووی ئەنجومەنی وەزیران سەبارەت بە لێخۆشبوونی ڕێژەی 20% لە سزاکانی سەرپێچی هاتووچۆ بۆ ماوەی شەش مانگی دیکە واتا تاکوو 2026/6/30 . ئەنجومەنی وەزیران پێشنیارەکەی پەسەند کرد و ڕێژەی لێخۆشبوونی سزاکانی سەرپێچییەکانی هاتووچۆ، بۆ شەش مانگی دیکە درێژ کرایەوە.

پەیامێک لە سەرۆکی هەرێمی کوردستان

نێچیرڤان بارزانی سەرۆکی هەرێمی کوردستان رایگەیاند ، پێشوازی لە ڕاپۆرتی لیژنەی یەکێتیی نیشتمانی و برایەتی و دیموکراسی لە پەرلەمانی تورکیا دەکەم. بە هەنگاوێکی گرنگ و ئاراستەیەکی دروستی دەزانم بۆ ئاشتی و چارەسەری. پێشخستنی زمانی سیاسەت و دیالۆگ و پابەندبوون بە چارەسەری ئاشتییانە، بنەمای سەرەکین بۆ بنیاتنانی سەقامگیریی هەمیشەیی کە بە سوودی هەموو ناوچەکە دەگەڕێتەوە.

ئێمە لە هەرێمی کوردستان وەک هەمیشە جەخت لە پشتگیری و هاوکاریمان بۆ هەر هەوڵ و هەنگاوێک دەکەینەوە کە ئامانجی چارەسەرکردنی ئاشتییانەی کێشەکان بێت و ئاسۆیەکی نوێ بۆ برایەتی و پێکەوەژیان بکاتەوە. هیوادارین هەنگاوی تری له‌ په‌رله‌مان به‌دوادا بێت بۆ بەهێزکردنی زیاتری متمانە و بەدیهێنانی ئەو ئاشتییەی کە هەمووان چاوەڕێی دەکەن.