کۆندی باسی باشترین ئەستێرەی بارسێلۆنا دەکات

کۆندی بەرگریکاری فەڕەنسی یانەی بارسێلۆنا لە کاتی کارکردن بۆ چاکبوونەوە لە پێکانەکەی و ئامادەکاری بۆ یارییە چاوەڕوانکراوەکەی بەرشەلۆنە بەرامبەر ئەتلەتیکۆ مەدرید لە چامپیۆنز لیگ، لە پەخشێکی ڕاستەوخۆدا باشترین و چێژبەخشترین یاریزانی ئێستای یانە کەتەلۆنییەکەی دەستنیشان کرد.

کوندی بەبێ دوو دڵی ڕایگەیاند کە پێدری یاریزانی دڵخوازی ئەوە و بە ئایکۆن و بلیمەتی تیپەکەی وەسف کرد و ئاماژەی بەوە کرد کە ئاستی ئەو یاریزانە تەمەن 23 ساڵە لە جیهانێکی تردایە و تەنانەت ئەوەی لە مەشقەکاندا ئەنجامی دەدات جێگەی سەر سووڕمانە.

بەرگریکارە فەڕەنسییەکە ستایشی توانای تەکنیکی و بینینی فراوانی یاریگای لەلایەن بێدرییەوە کرد و جەختی لەوە کردەوە کە ئەم یاریزانە لایەنێکی تری زۆر گرنگی هەیە کە زۆرجار پشتگوێ دەخرێت ئەویش کارە بەرگرییە سەرنجڕاکێشەکەیەتی.

کوندی ئاشکرای کرد کە پێدری یەکێک بووە لەو یاریزانانەی زۆرترین تۆپی لە ئەوروپا لە وەرزی ڕابردوو وەرگرتووەتەوە و لە هەر یارییەکدا نزیکەی 12 کیلۆمەتر رادەکات و بەمەش هاوسەنگییەکی بێوێنە لە نێوان وەرگرتنەوەی تۆپ و بونیاتنانی هێرش و گەیشتن بە ناوچەی سزای ڕکابەرەکان بۆ یانەی بارسێلۆنا دروست دەکات.

گرژییەکانی ڕۆژهەڵاتی ناوەڕاست نرخی نەوت بۆ سەروو ١١٣ دۆلار بەرز دەکەنەوە

لەگەڵ توندبوونەوەی گرژییە سەربازییەکانی نێوان ئەمریکا و ئیسرائیل لەلایەک و کۆماری ئیسلامی ئێران لەلایەکی تر، بازاڕەکانی وزە لە جیهاندا شڵەژانێکی گەورەیان بەخۆوە بینیوە، و بەهۆی پەرەسەندنی جەنگ و داخستنی گەرووی هورمز، کە گرنگترین ڕێڕەوی دەریایی وزەیە لە جیهاندا، نرخەکان گەیشتوونەتە ئاستێکی نوێ.​

لە ئێستادا، نرخی یەک بەرمیل نەوتی خاوی برێنت گەیشتووەتە 113 دۆلار و 6 سەنت. بەراورد بە دوێنێ دۆلارێک و 4 سەنت لە نرخەکەی بەرزبووەوە

هاوکات، نرخی نەوتی خاوی تەکساسی ئەمریکی (WTI) بە هەمان شێوە ڕووی لە هەڵکشان کردووە و بە 100 دۆلار و 4 سەنت مامەڵەی پێوە دەکرێت، بەروارد بە دوێنی دۆلارێک و 81 سەنت لە نرخەکەی بەرزبووەوە.

​داخستنی ئەم گەرووە ستراتیژییە مەترسییەکی جددی بۆ سەر دابینکردنی وزە لەسەر ئاستی نێودەوڵەتی دروست کردووە، چونکە بەشێکی زۆری نەوتی جیهان لەم ڕێڕەوەوە دەگوازرێتەوە.

چاودێرانی سیاسی و ئابووری هۆشداری دەدەن کە بەردەوامی داخستنی گەرووەکە و قووڵبوونەوەی ململانێ سەربازییەکان، ڕەنگە ببێتە هۆی بازدانی زیاتری نرخەکان لە ڕۆژانی داهاتوودا.

نرخی زیو زیاتر لە ٢ دۆلاری دیکە دابەزی

نرخی زیو لە مامەڵەکانی ئەمڕۆ دووشەممەدا پاشەکشەیەکی نوێی بەخۆیەوە بینی و بە دابەزینی زیاتر لە ٢ دۆلار بۆ هەر ئۆنسەیەک، نرخەکەی بۆ نزیکەی ٦٥ دۆلار نزمبووەوە، بەمەش کانزا سپییەکە بۆ چوارەم هەفتەی لەسەریەک لەسەر ڕێڕەوی دابەزین بەردەوامە.

ئەم فشارە نوێیەش لەسەر نرخی زیو هاوکاتە لەگەڵ هەڵکشانی گرژییە جیۆپۆلیتیکییەکانی نێوان ئێران، ویلایەتە یەکگرتووەکانی ئەمریکا و ئیسرائیل، لە کاتێکدا ئابوورییە گەورەکانی جیهان هەوڵەکانیان چڕکردووەتەوە بۆ پاڵپشتیکردنی کەرتەکانی وزە بە مەبەستی کەمکردنەوەی فشارەکانی هەڵاوسان لەسەر بەکاربەران.

​هەرچەندە لە هەفتەی ڕابردوودا نرخی زیو بە ڕێژەی ١٥٪ دابەزی، بەڵام بەرزبوونەوەی خێرای نرخی نەوت بووەتە هۆی زیاتربوونی نیگەرانییەکان لەبارەی بەردەوامیی هەڵاوسان لە بازاڕەکاندا.

لەو چوارچێوەیەشدا، پێشبینییەکان ئاماژە بۆ ئەوە دەکەن کە بانکە ناوەندییەکان بۆ بەرەنگاربوونەوەی هەڵاوسان پەنا بۆ توندترکردنی سیاسەتی دارایی ببەن و نەک تەنیا سوودی بانکی کەم نەکەنەوە، بەڵکو ئەگەری بەرزکردنەوەی زیاتریشی هەبێت، کە ئەمەش کاریگەریی نەرێنیی گەورەی لەسەر نرخی زیو و کانزاکانی دیکە دروست کردووە.

جیهان ڕووبەڕووی خراپترین قەیرانی وزە دەبێتەوە کە لە حەفتاکانی سەدەی ڕابردووەوە وێنەی نەبووە

لە کاتێکدا تەنیا چەند کاتژمێرێکی کەم ماوە بۆ کۆتاییهاتنی ئەو مۆڵەتە 48 کاتژمێرییەی دۆناڵد ترەمپ بۆ ئێرانی دیاری کردووە، ناوچەی ڕۆژهەڵاتی ناوەڕاست لەبەردەم مەترسیدارترین پەرەسەندنی سەربازیدایە. لە کاتێکدا واشنتن هەڕەشەی خاپوورکردنی کەرتی وزەی ئێران دەکات، تاران بە مووشەکی بالیستی قووڵایی ئیسرائیل دەپێکێت و هۆشداریی دەدات کە “ئەگەر کارەبای ئێمە ببڕن، کارەبای هەموو ناوچەکە دەبڕین.”

دۆناڵد ترەمپ، سەرۆکی ئەمەریکا، لە نوێترین پەیامیدا لە پلاتفۆرمی (تروس سۆشیاڵ) و چاوپێکەوتنێکی تەلەڤزیۆنیدا بۆ کەناڵی (13ـی ئیسرائیلی)، ئاستی گرژییەکانی گەیاندە لووتکە.

ترەمپ ڕایگەیاندووە کە ئەگەر ئێران بەتەواوەتی تەنگەی هورمز نەکاتەوە، ئەوا سڵ لە لەناوبردنی تەواوەتی ژێرخانی وزەی ئەو وڵاتە ناکاتەوە. ئەم هەڕەشەیە کاردانەوەی توندی لێکەوتەوە، عەباس عێراقچی، وەزیری دەرەوەی ئێران، واشنتنی بەوە تۆمەتبار کرد کە ئەوان بوونەتە هۆی تێکدانی ئاسایشی دەریاوانی و داوای کرد زمانێک بەکاربهێنرێت کە ڕێزگرتنی تێدا بێت، نەک هەڕەشە.

فاتح بیرۆڵ، بەڕێوەبەری ئاژانسی نێودەوڵەتیی وزە، هۆشداریی دا کە جیهان ڕووبەڕووی خراپترین قەیرانی وزە دەبێتەوە کە لە حەفتاکانی سەدەی ڕابردووەوە وێنەی نەبووە. ئامارەکان دەری دەخەن کە تێچووی ئەم شەڕە بۆ ئەمەریکا بە جۆرێکە تەنیا لە یەک خولەکدا ١.٣ ملیۆن دۆلار خەرج دەکرێت.

لە لایەکی دیکەوە، بەپێی ڕاپۆرتێکی (عەرەبی ئەلجەدید) لەگەڵ پەرەسەندنی هێرشە ئاسمانییەکانی ئیسرائیل بۆ سەر تاران و ئورمییە، هەوڵێکی دیپلۆماسیی چڕ لە لایەن قەتەڕ، تورکیا و میسرەوە دەستی پێکردووە. سەرچاوە ئیسرائیلییەکان باس لەوە دەکەن کە ترەمپ دەیەوێت بە جۆرێک لە شەڕەکە بێتە دەرەوە کە وەک سەرکەوتوو دەربکەوێت و ئێران ناچار بکات پاشەکشە بکات، بەڵام تاران هێشتا سوورە لەسەر وەڵامدانەوەی هەر هێرشێک بۆ سەر دوورگەی خارگ، یان وێستگەکانی کارەبای وڵاتەکەی.

ئەم جەنگە ئاسایشی خۆراکی سەدان ملیۆن مرۆڤی خستووەتە مەترسییەوە

کاتێک باس لە گەرووی هورمز دەکرێت، زۆربەی جار ڕاستەوخۆ بیرمان بۆ لای وزە دەچێت، چونکە نزیکەی %20ی نەوت و غازی جیهانی بەو ڕێڕەوەدا تێدەپەڕێت. بەڵام بۆ وڵاتانی ناوچەکە، ئەم گەرووە تەنیا سەرچاوەی داهات نییە، بەڵکوو شادەماری ژیانی زیاتر لە 100 ملیۆن کەسە.

ئێستا، لەگەڵ گەرمبوونی ململانێکانی نێوان ئەمەریكا و ئیسرائیل لەگەڵ ئێران، داخستنی ئەم دەروازەیە چیتر تەنیا ئەگەر نییە، بەڵکوو بووەتە ڕاستییەکی تاڵ کە هەڕەشە لە ئاسایشی خۆراکی وڵاتانی کەنداو دەکات.

بە گوێرەی ڕاپۆرتێکی سی ئێن ئێن (CNN)ی عەرەبی، وڵاتانی عەرەبیی دەوروبەری کەنداو بەتەواوی پشت بەم گەرووە دەبەستن بۆ دابینکردنی خۆراک و پێداویستیی ڕۆژانەیان. ئامارەکان دەریدەخەن کە بێ ئەم ڕێڕەوە، ئەو وڵاتانە ڕووبەڕووی گرفتێکی گەورە دەبنەوە، چونکە هەموویان پشت بەم گەرووە دەبەستن، بۆ نموونە:

-عەرەبستانی سعوودی: زیاتر لە %80ی خۆراکی وڵاتەکەی لەم گەرووەوە هاوردە دەکات.

– ئیمارات: نزیکەی %90ی پێداویستییەکانی خۆراکی لەم ڕێگەیەوە دەگات.

– قەتەڕ: بە ڕێژەی %98 پشت بەم ڕێڕەوە ئاوییە دەبەستێت.

– عێراق: سەرەڕای هەبوونی دوو ڕووبار، بەڵام بۆ هاوردەکردنی تەواوی خۆراک و پێداویستیی وڵاتەکە، بەندەرەکانی باشوور و گەرووی هورمز تاکە دەرچەن.

هەڵاوسانی نرخ و شکستی ڕێگە جێگرەوەکان

شیاوی باسە، داخستنی ئەم ڕێڕەوە بازرگانیە تەنێ کاریگەریی لەسەر کەمبوونەوەی کاڵا نییە، بەڵکوو بووەتە هۆی بەرزبوونەوەی خەیاڵیی نرخەکانیش.

بەرنامەی خۆراکیی جیهانی (WFP) هۆشداری دەدات کە زنجیرەی دابینکردن لەبەردەم توندترین پەککەوتندایە لەدوای پەتای کۆڤید-19 و جەنگی ئۆکرایناوە.

لەمبارەیەوە، کارل سکۆ، جێگری بەڕێوەبەری جێبەجێکاری بەرنامەکە، ئاماژە بەوە دەکات کە تێچووی بارکردن بە شێوەیەکی خێرا بەرز بووەتەوە، ئەمەش باری سەرشانی کڕیاران قورستر دەکات.

هاوکات کۆمپانیای “کیپسۆنز ئینتەرناشناڵ” (Kibsons International) کە بنکەکەی لە ئیماراتە، جەخت دەکاتەوە کە گۆڕینی ڕێڕەوی کەشتییەکان بۆ ڕێگەی دیکەی دوورەدەست، تێچوویەکی زۆر و کاتێکی زۆرتری دەوێت ئەمەش بۆ خۆراکی فرێش (سەوزە و میوە) زیانمەندە.

دانیال کابرال، بەڕێوەبەری کڕین لەو کۆمپانیایە، دەڵێت: هەزاران “تۆن خۆراکی فرێش لەناو کانتێنەرەکاندایە و لەدەرەوەی گەرووەکە وەستاون، بێ ئەوەی بزانین کەی و بۆ کام بەندەر بەڕێ دەکەوین.”

ئاڵۆزییەکانی ئەمریکا و ئێران ناسەقامگیری دەخاتە بازاڕی نەوتەوە

لەگەڵ توندبوونەوەی گرژییە سەربازییەکانی نێوان ئەمریکا و ئیسرائیل لەلایەک و کۆماری ئیسلامی ئێران لەلایەکی تر، بازاڕەکانی وزە لە جیهاندا شڵەژانێکی گەورەیان بەخۆوە بینیوە، و بەهۆی پەرەسەندنی جەنگ و داخستنی گەرووی هورمز، کە گرنگترین ڕێڕەوی دەریایی وزەیە لە جیهاندا، نرخەکان گەیشتوونەتە ئاستێکی نوێ.​

نرخی نەوت ئەمڕۆ سێشەممە بەرزبووەوە، دوای ئەوەی ئێران رەتیکردەوە لەگەڵ ئەمریکا دانوستاندنی کردبێت، نرخی نەوتی برێنتی دەریای باکوور 1 دۆلار و 6 سەنت بەرزبووەوە و بە 101 دۆلار مامەڵەی پێوەکرا.

هاوکات نرخی نەوتی سووکی تەکساسی ئەمریکاش 1 دۆلار و 58 سەنت بەرزبووەوە و بە 89 دۆلار و 71 سەنت مامەڵەی پێوەکرا.

نرخی نەوت رۆژی دووشەممە بە رێژەی 10٪ دابەزی دوای ئەوەی دۆناڵد ترەمپ، سەرۆکی ئەمریکا رایگەیاند بۆ ماوەی 5 رۆژ هێرشی سەر وێستگەکانی کارەبای ئێران رادەگرێت بەهۆی دانوستاندنی ئەرێنی لەگەڵ بەرپرسێکی ئێرانی بۆ راگرتنی شەڕ.

چاودێرانی سیاسی و ئابووری هۆشداری دەدەن کە بەردەوامی داخستنی گەرووەکە و قووڵبوونەوەی ململانێ سەربازییەکان، ڕەنگە ببێتە هۆی بازدانی زیاتری نرخەکان لە ڕۆژانی داهاتوودا.

جەنگی ئێران، قەبارەی بازاڕی چەک و جبەخانەی گەیاندە 500 ملیار دۆلار

لە کاتێکدا ئاسمانی ناوچەکە بەهۆی ته‌قینەوەی درۆن و مووشەکەکانەوە دەناڵێنێ، کۆمپانیا زەبەلاحەکانی چەک لە جیهاندا خەریکی دروێنەکردنی داهاتێکی خەیاڵین کە پێشووتر وێنەی نەبووە.

پەرەسەندنی جەنگی ئێران و هەڕەشەی بەردەوامی درۆنە هەرزانبەهاکان، وای کردووە وڵاتانی جیهان پێشبڕکێ بکەن بۆ کڕینی سیستەمی بەرگری کە پێشبینی دەکرێت قەبارەی مامەڵەی بازاڕەکەی بگاتە نێوان 400 بۆ 500 ملیار دۆلار.

ئەم خواستە گەورەیە، کۆمپانیاکانی وەک (لوکهید مارتن)، (ئار تی ئێکس)، (ڕاینمیتال) و (رافائیل)ی خستووەتە ژێر باری داواکارییەکی گەورەوە کە لە توانای بەرهەمهێنانی کارگەکانیاندا نییە.

بە گوێرەی ڕاپۆرتێکی (بلومبێرگ ئینتێڵێجێنس)، تەنیا لە ماوەی یەک ساڵدا نزیكەی 150 ملیار دۆلار چووەتە سەر بودجەی بەرگریی ئاسمانیی جیهانی. ئەمەش بەهۆی ئەوەی ئێستا هەموو دەوڵەتان پەلەیانە بۆ مسۆگەرکردنی مووشەکی بەرگریی تێکشکێنەر تا ئاسمانیان لە هێرشە کتوپڕەکانی ئێران بپارێزن.

بە گوێرەی ئەو ڕاپۆرتە، ئەمەریكا کە ساڵانە 35 ملیار دۆلار بۆ ئەم بوارە تەرخان دەکات، ئێستا لەژێر فشاری جەنگی ئێراندایە و داوای بودجەی فریاگوزاریی تری 50 ملیار دۆلاری لە کۆنگرێس کردووە.

هاوکات، ئەورووپاش بۆ دروستکردنی قەڵغانێکی مووشەکیی تۆکمە، پێویستی بە نزیكەی 500 ملیار دۆلاری دیکە هەیە.

ئەم کێشەیە تەنیا ئەمەریكا و ئەورووپای نەگرتووەتەوە، بەڵکوو ئیسرائیل کە (قوبەی ئاسنین) بەکار دەهێنێت، ساڵانە زیاتر لە 5.2 ملیار دۆلار بۆ بەرگریی ئاسمانیی خەرج دەکات، جیا لەو 8.7 ملیار دۆلارەی وەک هاوکاری لە واشنتۆنەوە پێی دەگات. هەروەها وڵاتانی کۆریای باشوور و ژاپۆنیش ناچار بوون بودجەی بەرگریی ئاسمانیی خۆیان بە بڕی 10 ملیار دۆلار زیاد بکەن.

یەکێک لە کێشە هەرە گەورەکان کە لەم ڕاپۆرتەدا هاتووە (نادادیی تێچووی جەنگە) هێرشە درۆنییەکانی ئێران بۆ سەر بنکە ئەمەریكییەکان دەریانخستووە کە ناتوانرێت بۆ تێکشکاندنی درۆنێکی چەند هەزار دۆلاری، مووشەکێکی (باتریۆت) یان (پاک 3) بەکار بهێنرێت کە تێچووی هەر دانەیەکی زیاتر لە 4 ملیۆن دۆلارە. هەر بۆیە ئێستا وڵاتان ڕوویان لە سیستەمە هەرزانەکان کردووە، وەک (فامبایەر) کە بە تەنیا 20 هەزار دۆلار ئامانجەکەی دەپێکێت، یان سیستەمی (سکای نێکس) کە بە تێچووی تەنیا 7 هەزار دۆلار درۆنەکان لە ئاسماندا دەپێکێت. هەرچەندە کۆمپانیای (لوکهید مارتن) گرێبەستێکی 9.8 ملیار دۆلاری وەرگرتووە تا ساڵی 2030 بەرهەمهێنانی مووشەکی (پاک 3) بگەیەنێتە 2000 دانە لە ساڵێکدا، بەڵام مەترسییەکە لەوەدایە کە کۆگاکانی جیهان خەریکە بەتاڵ دەبن.

نرخی نەوت لە بازاڕەکانی جیهاندا بۆ خوار 100 دۆلار دابەزی

لەگەڵ توندبوونەوەی گرژییە سەربازییەکانی نێوان ئەمریکا و ئیسرائیل لەلایەک و کۆماری ئیسلامی ئێران لەلایەکی تر، و داخستنی گەرووی هورمز،بازاڕەکانی وزە لە جیهاندا شڵەژانێکی گەورەیان بەخۆوە بینیوە.

دوای ئەوەی دۆناڵد ترەمپ، سەرۆکی ئەمریکا رایگەیاند، لەگەڵ ئێران لە دانوستاندندان، نرخی نەوت بە رێژەی 5% دابەزی، و نرخی یەک بەرمیل نەوتی برێنتی دەریای باکوور لەدوای کردنەوەی بازاڕەکانی ئاسیا ئەمڕۆ چوارشەممە دابەزی بۆ نزیکەی 99 دۆلار هاوکات نرخی نەوتی سووکی تەکساسی ئەمریکاش بە هەمان رێژە دابەزی و بەرمیلێکی بە 87 دۆلار مامەڵەی پێوەکرا.

سەرۆکی ئەمریکا رایگەیاند، هێرشی بۆ سەر دامەزراوەکانی وزەی ئێرانی راوەستاندووە و ئێران بەنیازە لەگەڵ ئەمریکا رێکبکەوێت.

درەنگانی رۆژی سێشەممە نیویۆرک تایمز بڵاویکردەوە، ئەمریکا 15 داواکاریی بۆ ئێران ناردووە بۆ ئەوەی کۆتایی بە شەڕ بهێنێت.

چاودێرانی سیاسی و ئابووری هۆشداری دەدەن کە بەردەوامی داخستنی گەرووەکە و قووڵبوونەوەی ململانێ سەربازییەکان، ڕەنگە ببێتە هۆی بازدانی زیاتری نرخەکان لە ڕۆژانی داهاتوودا.

نرخی نەوت لە بازاڕەکانی جیهاندا بۆ خوار 100 دۆلار دابەزی

لەگەڵ توندبوونەوەی گرژییە سەربازییەکانی نێوان ئەمریکا و ئیسرائیل لەلایەک و کۆماری ئیسلامی ئێران لەلایەکی تر، و داخستنی گەرووی هورمز،بازاڕەکانی وزە لە جیهاندا شڵەژانێکی گەورەیان بەخۆوە بینیوە.

دوای ئەوەی دۆناڵد ترەمپ، سەرۆکی ئەمریکا رایگەیاند، لەگەڵ ئێران لە دانوستاندندان، نرخی نەوت بە رێژەی 5% دابەزی، و نرخی یەک بەرمیل نەوتی برێنتی دەریای باکوور لەدوای کردنەوەی بازاڕەکانی ئاسیا ئەمڕۆ چوارشەممە دابەزی بۆ نزیکەی 99 دۆلار هاوکات نرخی نەوتی سووکی تەکساسی ئەمریکاش بە هەمان رێژە دابەزی و بەرمیلێکی بە 87 دۆلار مامەڵەی پێوەکرا.

سەرۆکی ئەمریکا رایگەیاند، هێرشی بۆ سەر دامەزراوەکانی وزەی ئێرانی راوەستاندووە و ئێران بەنیازە لەگەڵ ئەمریکا رێکبکەوێت.

درەنگانی رۆژی سێشەممە نیویۆرک تایمز بڵاویکردەوە، ئەمریکا 15 داواکاریی بۆ ئێران ناردووە بۆ ئەوەی کۆتایی بە شەڕ بهێنێت.

چاودێرانی سیاسی و ئابووری هۆشداری دەدەن کە بەردەوامی داخستنی گەرووەکە و قووڵبوونەوەی ململانێ سەربازییەکان، ڕەنگە ببێتە هۆی بازدانی زیاتری نرخەکان لە ڕۆژانی داهاتوودا.

زیو لە ماوەی سێ رۆژدا 10 دۆلار بەرزبووەتەوە

ئەمڕۆ چوارشەممە، هاوشان لەگەڵ بەرزبوونەوەی بەهای کانزاکانی دیکە، نرخی زیو گۆڕانکارییەکی خێرای بەخۆیەوە بینی و نرخی یەک ئۆنسەی گەیشتە 73 دۆلار. ​بەپێی ئەو داتایانە، کانزای سپی لە ماوەی تەنها سێ رۆژی رابردوودا بەرزبوونەوەیەکی بەرچاوی تۆمارکردووە و لە 63 دۆلارەوە بۆ 73 دۆلار بەرزبووەتەوە، تەنها لە مامەڵەکانی ئەمڕۆشدا نرخەکەی 3 دۆلار زیادیکردووە.

​هۆکاری ئەم بەرزبوونەوە خێرایە کە رێژەی 4%ی تێپەڕاندووە، بۆ گەشبینییەکان لەسەر دانوستاندنەکانی نێوان ئەمریکا و ئێران دەگەڕێتەوە. بەتایبەت دوای ئەوەی سەرۆکی ئەمریکا ئاماژەی بەوە کرد “ئێران لە دانوستاندنەکاندا جیددییە”، ئەوەش هیواکانی بۆ گەیشتن بە رێککەوتنێک و کۆتاییهێنان بە جەنگ بەرزکردووەتەوە.

​چاودێران پێیانوایە، هەر ڕێککەوتنێکی ئەگەری و کۆتاییهاتنی گرژییەکان، فشارەکانی هەڵاوسان کەمدەکاتەوە؛ ئەوەش ڕێگەخۆشکەر دەبێت بۆ بانکی ناوەندیی ئەمریکا تاوەکو بە چاوێکی نوێدا بە سیاسەتی نەختینەیی و سوودی بانکیدا بچێتەوە، کە ڕاستەوخۆ کاریگەریی لەسەر ئاڕاستەی بازاڕە جیهانییەکان دەبێت.