سەرۆکی حکومەت؛ گەنجانی کوردستان دواڕۆژی وڵاتەكەمانن و ڕۆڵی کارایان هەیە لە دروستكردنی ئاییندەیەکی باشتر

ئێوارەی ئەمڕۆ چوارشەممە 6/10، مەسرور بارزانی، سەرۆکی حکومەتی هەرێمی کوردستان، لە ڕێورەسمێکی تایبەتدا ناوەندی گەنجان Youth Hub – ی کردەوە، کە گەورەترین و پێشکەوتووترین ناوەندی گەنجانە لە سەرانسەری هەرێمی کوردستان و جیهان و لەلایەن کوردستان فاوندەیشنـەوە دروستکراوە و بەڕێوە دەبرێت.

سەرۆکی حکومەت بەشە جۆراوجۆرەکانی ناوەندەکەی بەسەر کردەوە کە تایبەتن بە چالاکییە ڕۆشنبیری، ڕاگەیاندن، هونەری، وەرزشی و تەکنەلۆژی و چەند بوارێکی دیکە.

پاشان سەرۆکی حکومەت لە گوتەیەکدا، باسی لە گرنگیی ئەم ناوەندەکە کرد وەک گەورەترین ناوەندی گەنجانە لەسەر ئاستی جیهان. لەمبارەیەوە سەرۆکی حکومەت گوتی؛ جێی شانازییە بۆ هەموو خەڵكی كوردستان كە ئێمە ناوەندێكی بەم شێوەیە ئێستا لە كوردستان هەمانە و بووەتە سەكۆیەك، بووەتە شوێنێك بۆ ئەوەی هەموو گەنجەكانی كوردستان بتوانن سوودی لێ ببینن.

پیرۆزبایی لە هەموو گەنجانی كوردستان و هەموو خەڵكی كوردستان دەكەم، دەستخۆشیش لە هەموو ئەو بەڕێزانە دەكەم كە ڕۆڵیان هەبووە لە دامەزراندنی ئەم ناوەندە و بەردەوامیشن لە پێگەیاندنی گەنجەكان و دروستكردنی ئەو پەیوەندییە تەندروستەی كە پێویستە هەمانبێت لە نێوان گەنجەكان و هەموو ڕۆڵەكانی ئەم كۆمەڵگەیە.

سەرۆکی حکومەت هەروەها گوتی؛ زۆر خۆشحاڵ بووم بە بینینی ئەو گەنجە بەهرەمەندانەی كە ئەمڕۆ لێرە بەشێكیان بەرهەمەكانی خۆیان پێشانی ئێمە دا. ئەوەی گرنگە بۆ ئێمە ئەوەیە كە گەنجەكانی ئێمە شوێنێكیان هەبێت بتوانن تێیدا كۆببنەوە و لە هەموو ڕوویەكەوە سوودی لێ ببینن. كتێبخانەیەكی گەورە لەم ناوەندەدا هەیە كە پڕە لە كتێب و لە بەرهەمە گرنگەكان بۆ ئەوەی لە ڕووی زانستی و لە ڕووی مێژووییەوە گەنجەكان سوودی لێ ببینن.

ئەوەی من داوا دەكەم و پێشنیاز دەكەم، گەنجەكانمان مێژووی خۆیان بخوێنن، بۆ ئەوەی ببینن و بزانن لە كوێوە هاتووین و ئەوەی ئێستا لە كوردستان هەمانە، بەرهەمی خەبات و ڕەنجی نەتەوەیەكی ستەمدیدە و ستەم لێكراوە. ئێمە بە درێژایی مێژوو ستەمێكی گەورەمان لێكراوە، بەڵام سەرەڕای ئەوەش خۆمان نەچەماندووە و نەمانهێشتووە كە ئیرادەی گەلەكەمان بمرێت. بەرهەمی خەباتی پێشمەرگە و قوربانیدانی ئەم گەلە وایكردووە كە ئێستا كوردستانێكی گەشەسەندوو و پێشكەوتوومان هەیە و ئومێدم وایە ئەم گەنجانە بتوانن زیاتر بەرەو پێشەوەی ببەن.

سەرۆکی حکومەت داوای لە گەنجەكان کرد كە پەرە بە تواناكانی خۆیان بدەن. زۆرجار گلەیی ئەوەمان دەبیست كە كوردستان شوێنێكی تێدا نییە كە گەنجەكان بتوانن بەهرەكانی خۆیانی تێدا بەرەو پێشەوە ببەن یانیش دەرفەت و فورسەتێكیان بۆ پەیدا ببێت بۆ ئەوەی سوودی لێ وەربگرن. دروستكردنی ئەم ناوەندە ئەم شوێنەیە كە گەنجەكانمان چیتر روو لە هەندەران نەكەن، پێیان وا نەبێت وڵاتەكەیان شوێنی ئەوانی تێدا نییە، وڵاتی ئێمە شوێنی ئەم گەنجانەیە، ئەوانەی كە خەباتیان كردووە و زەحمەتیان كێشاوە و تا ئێرە هێناویانە و كوردستانیان ئاوەدان كردووە، لەمەودوا ئەم ئەركە دەكەوێتە سەر شانی گەنجەكانمان.

سەرۆکی حکومەت گوتیشی ئەم ناوەندە لە چەندین ڕووەوە دەتوانێت یارمەتیی گەنجەكان بدات، لە ڕووی وەرزشییەوە شوێنی باشیان هەیە بۆ ئەوەی گەنجەكان بتوانن خۆیان تێیدا پەروەردە بكەن. لە ڕووی كولتوور و كەلەپووری نەتەوەییمانەوە، بتوانن هەم ئاشنا بن بەو كولتوور و كەلەپوورە، هەم بە جیهانیشی بناسێنن.

من داوام لە گەنجەكانمان هەیە، خۆیان دوور نەگرن لەو كولتوورە جوانەی كە وڵاتەكەمان هەیەتی. جلوبەرگی جوانی كوردی لەبەر بكەن و شوێنە جیاوازەكانی وڵاتەكەمان بە هەموو پێكهاتە نەتەوەیی و ئایینییەكان بەوەوە جوانە كە شانازیی بەو كولتوورە نەتەوەییەی خۆیان بكەن. خۆتان بەدوور مەگرن، لە بۆنەكانی وەكوو ئەمڕۆ و هاوشێوەی ئەمڕۆ، داواتان لێ دەكەم بگەڕێنەوە بۆ دروستكردنی ئەو پەیوەندییە تەندروستە لەگەڵ مێژووی خۆتان، بەڵام سوودوەرگرتن لە مێژوو بەس نییە و بەستنەوەی ئێستا بە مێژووش بەس نییە، دەبێ ئێمە بیری گەورەمان هەبێ بۆ داهێنان و دروستكردنی ئاییندەیەكی گەشتر، وڵاتێكی ئاوەدانتر. گەنجەكان دەتوانن سوود لە زانست و تەكنەلۆژیا ببینن كە ئەم جۆرە ناوەندانە و بە تایبەتی ئەم ناوەندە دەتوانێت بیخاتە خزمەتی گەنجەكانمان. لە ڕووی تەكنەلۆژییەوە ئامێری باش دەخرێتە خزمەتیان كە ئەوان بتوانن سوودی لێ وەربگرن.

لە ڕووی تێكەڵاویی كۆمەڵایەتی، بەبێ فەرق و جیاوازی لە هەموو ناوچە و شار و شارۆچكەكانی كوردستان گەنجەكان دەتوانن سەردانی ئەم ناوەندە بكەن، هەم بە یەكتر ئاشنا بن، هەم بتوانن بیروبۆچوونەكانی خۆیان ئاڵوگۆڕ بكەن و سوود لە تواناكانی یەكتر وەربگرن، چۆنیش بتوانن كاریگەرییان لەسەر داڕشتنی سیاسەتی داهاتووی وڵاتەكەمان هەبێت.

لە کۆتایی گۆتەکەیدا سەرۆکی حکومەت دووپاتی کردەوە کە گەنج چیتر با وا نەزانێ كە پێگەیان نییە یان دەنگیان بیستراو نییە، دەنگی ئێوە بیستراوە و شوێن دەستی ئێوەش دیارە. راستە ئێوە هیوای دواڕۆژی وڵاتەكەمانن، بەڵام ئێوە هەر لە ئەمڕۆوە كاریگەریتان هەیە لەسەر دروستكردنی ئەو ئاییندەیەی كە دەتانەوێ تێیدا بژین. ئێوە بەشێكن لەو كۆمەڵگەیە و ئێوە دەبێ بەشێك بن لە دروستكردنی سیاسەتی وڵاتەكەتان. دەتانەوێ بەرەو كوێ بڕۆن؟ دەتانەوێ چاو لە چ وڵاتێكی پێشكەوتوو بكەن؟ ئەوەی لەسەر ئێمەمانانە یارمەتیتان بدەین و ئەو كەرەستانەتان بخەینە بەردەست، ئێوەش بە بەهرەی خۆتان، بە بۆچوونەكانی خۆتان، بە زیرەكی و شارەزایی و لێهاتوویی خۆتان، بتوانن تواناكانی خۆتان بەكار بهێنن بۆ دروستكردنی وڵاتێكی ئاوەدانتر و گەشەسەندووتر. دەتوانن یارمەتیمان بدەن لە رووی دروستكردنی ژێرخانێكی ئابووریی باشتر، تەلاری جوانترمان بۆ ئاوەدان بكەنەوە، كەرتی تەندروستیمان باشتر بكەن، خوێندنمان بەرەو ئاستێكی بەرزتر ببەن، لە هەموو ڕوویەكەوە دەتوانن یارمەتیمان بدەن كە ئێمە بتوانین شانازیی بە بوونی ئێوە بكەین، هەروەك شانازیتان پێوە دەكەین. من دواقسەم بۆ خوشك و برایانم، بۆ هەموو گەنجانی خۆشەویستی كوردستان ئەوەیە، خەونی گەورە ببینن، ئامانجتان با گەورە بێت، هیچ خەونێك ئەوەندە گەورە نییە، هیچ ئامانجێكیش ئەوەندە بە زەحمەت نییە كە بەدی نەیەت، جگە لەوەی كە هەوڵی بۆ نەدەن. بۆیە هیوادارم بەردەوام بن لە بینینی خەونی گەورە و بەرەو ئەو ئاستە بڕۆن كە شایستەی داهاتووی ئێوەیە.

دەستەی وەبەرھێنان: بە ڕاسپاردەی سەرۆکی حکوومەت، جووتیاران و کۆمپانیاکان دەتوانن گەنم ھەناردەی دەرەوە بکەن

​دەستەی وەبەرھێنانی ھەرێمی کوردستان ڕایگەیاند، لەسەر ڕاسپاردەی مەسرور بارزانی، سەرۆکی حکوومەتی ھەرێمی کوردستان، سەرجەم ئەو جووتیار و کۆمپانیایانەی ئارەزوومەندن گەنمی ھەرێم ھەناردەی دەرەوە بکەن، دەتوانن لە ئێستاوە داواکاریی فەرمیی خۆیان پێشکەش بە دەستەی وەبەرھێنان بکەن بە مەبەستی وەرگرتنی ڕەزامەندی.

​ئەم ھەنگاوە لەپێناو خزمەتکردنی زیاتری جووتیاران و بەبازاڕکردنی بەرھەمەکانیاندایە، و دەستەکە ئاماژەی بەوەش کردووە کە وادەی پێشکەشکردنی داواکارییەکان سنووردارە و تەنیا حەوت ڕۆژ لەبەردەم خوازیاراندا هەیە بۆ پێشکەشکردنی داواکارییەکانیان.

سەرۆک بارزانی بەشداری لە چوارەمین فێستیڤاڵی شەل و شەپک لە زاخۆ دەکات

ڕۆژی چوارشەممە 10ی حوزەیرانی 2026، لە ئیدارەی سەربەخۆی زاخۆ سەرۆک مەسعود بارزانی بەشداری لە چوارەمین فێستیڤاڵی شەڵ و شەپک کرد.

لە فێستیڤاڵەکەدا کە ژمارەیەکی بەرچاو لە خەڵکی هەموو ناوچەکانی کوردستان ئامادەی بوون تیایدا کلتوری چل و بەرگی ناوچە جیاوازەکانی کوردستان نمایش کران و سەرۆک بارزانی هەموو بەشەکانی فێستیڤاڵەکەی بەسەرکردەوە، دواتر لەلایەن هونەرمەندانی ناوچە جیاوازەکانی کوردستان چەندین چاڵاکی و نمایشی هونەری ئەنجامدران.

وەزیری بازرگانیی عێراق گەیشتە هەولێر؛ وەرزی وەرگرتنی گەنم لە هەرێمی کوردستان دەستپێدەکات

ئێوارەی ئەمڕۆ چوارشەممە، وەزیری بازرگانیی حکومەتی فیدراڵ بە مەبەستی بەشداریکردن لە دەستپێکی پرۆسەی وەرزی بەبازاڕکردنی گەنم، گەیشتە فڕۆکەخانەی نێودەوڵەتیی هەولێر و لەلایەن بەرپرسانی وەزارەتی بازرگانی و پیشەسازیی هەرێمی کوردستانەوە پێشوازیی لێکرا.

سەروەر کەمال هاواری، بریکاری وەزارەتی بازرگانی و پیشەسازی بۆ کاروباری بازرگانی، بە یاوەری بەڕێوەبەری گشتیی بازرگانی، پێشوازییان لە دکتۆر مستەفا نزار ئەلعانی، وەزیری بازرگانیی عێراق و دکتۆر حەیدەر گەرعاوی، بەڕێوەبەری گشتیی کۆمپانیای بازرگانیی دانەوێڵە کرد.

ئامانجی سەردانی وەزیری بازرگانیی عێراق و شاندی یاوەری، بەشداریکردنە لە دەستپێکردنی پڕۆسەی وەرزی بەبازاڕکردن و وەرگرتنی گەنمی جوتیاران لە هەرێمی کوردستان و پارێزگای نەینەوا بۆ ساڵی ٢٠٢٦.

بڕیارە لە چوارچێوەی ئەم سەردانەدا، هەماهەنگییەکانی نێوان هەولێر و بەغدا بۆ سەرخستنی وەرزی دروێنە و وەرگرتنی گەنمی ئەمساڵ تاوتوێ بکرێن، کە تێیدا پشکی جوتیارانی هەرێمی کوردستان لە چوارچێوەی پلانی وەزارەتی بازرگانیی عێراقدا دیاریکراوە.

“فارس عیسا” و سەرۆکی کەنیسەی کلدانی لە عێراق و جیهان تاوتوێی چۆنیەتی پەرەپێدانی پێکەوەژیان لە نێوان پێکهاتەکانی عێراقدا دەکەن

ئەمڕۆ چوارشەممە 10 ی حوزەیرانی 2026 بەڕێز “فارس عیسا” سەرۆکی نوێنەرایەتی حکومەتی هەرێمی کوردستان لە بەغدا سەردانی بارەگای کڵێسای کلدانی کرد و لەلایەن پاتریارک “ئیمیل نونا” سەرۆکی کڵێسای کلدانی لە عێراق و جیهان پێشوازیی لێکرا.

له سەرەتای دیدارەکەدا، سەرۆکی نوێنەرایەتی حکومەتی هەرێمی کوردستان له بەغدا، پیرۆزبایی له پاتریارک “ئیمانوێل نونا” کرد به بۆنەی هەڵبژاردنی وەک پاتریارکی کاسۆلیکی کلدانی له عێراق و جیهان و هیوای سەرکەوتنی بۆ خواست له ڕاپەڕاندنی ئەرکەکانیدا.

هەروەها هەردوولا ڕۆڵی پیاوانی ئاینی لە برەودان بە کەلتووری پێکەوەژیانی ئاشتیانە لەنێوان پێکهاتەکانی گەلی عێراق و گرنگی ئاراستەکردنی هێزە سیاسییەکان بۆ پاراستنی یەکبوونی نیشتمانی و پێویستی پاراستنی بێلایەنی تاوتوێکران،کە یارمەتیدەرە بۆ بتەوکردنی سەقامگیری و ئاشتی کۆمەڵایەتی.

له تەوەرێکی دیکەی دیدارەکەدا، پاتریارک “ئیمیل نونا” سوپاسگوزاری و پێزانینی خۆی بۆ ئەم سەردانە دەربڕی، و ستایشی سیاسەتی حکومەتی هەرێمی کوردستانی کرد بۆ برەودان بە بەهاکانی پێکەوەژیان، و ئاشتی و بتەوکردنی پەیوەندییەکانی برایەتی لەنێوان پێکهاتە جیاجیاکانی هەرێمی کوردستان و عێراق بەگشتی.

کەشناسی: پلەکانی گەرما زیاتر بەرز دەبنەوە

​بەڕێوەبەرایەتی گشتی کەشناسی و بوومەلەرزەزانی هەرێم ڕایگەیاند؛ ئەمڕۆ پێنجشەممە 11-06-2026، ئاسمان بە گشتی ساماڵ دەبێت. پلەکانی گەرما بەراورد بە تۆمارکراوەکانی دوێنێ بە (1 بۆ 2) پلەی سیلیزی بەرزتر دەبنەوە، خێرایی با لەسەرخۆ بۆ مامناوەند دەبێت (10-25) کم/ک بە ئاراستەی باکووری ڕۆژئاوا، هەروەها مەودای بینین لە نێوان (8-10) کم دەبێت. ​پەیوەست بەمەشەوە کەشی سبەی هەینی 12-06-2026، ئاسمان ساماڵ و پەڵە هەور دەبێت؛ پێشبینی دەکرێت پلەکانی گەرما بە نزیکەی (2 بۆ 3) پلەی سیلیزی بەراورد بە تۆمارکراوەکانی ئەمڕۆ نزم ببنەوە. خێرایی با لەسەرخۆ بۆ مامناوەند دەبێت (10-20) کم/ک بە ئاراستەی باکووری ڕۆژئاوا و مەودای بینین لە نێوان (8-10) کم دەبێت. ​بەرزترین پلەکانی گەرمای پێشبینیکراو بۆ ئەمڕۆ و سبەی: ​هەولێر ئەمڕۆ 42 سبەی 39 سلێمانی ئەمڕۆ 39 سبەی 38 دهۆک ئەمڕۆ 40 سبەی 39 زاخۆ ئەمڕۆ 42 سبەی 40 چەمچەماڵ ئەمڕۆ 42 سبەی 40 پیرمام ئەمڕۆ 37 سبەی 34 حاجی ئۆمەران ئەمڕۆ 30 سبەی 27

خانوو و شوقە دەدرێتە کەم درامەتان

بڕیارە لەسەرانسەری هەرێمی کوردستان 20 هەزار یەکەی نیشتەجێبوون بۆ خێزانە کەمدەرامەتەکان دروست بکرێت، کە بە شێوەی قستی درێژخایەنی 15 ساڵ بەسەر هاووڵاتییاندا دابەش دەکرێن.

پێنجشەممە 11ـی حوزەیرانی 2026، سامان عارەب، بەڕێوەبەری گشتی وەبەرهێنانی هەولێر رایگەیاند، لە کۆی گشتی ئەو 20 هەزار یەکەیەی دروست دەکرێت، شەش هەزار یەکەیان لە شاری هەولێر دەبن، ئاماژەی بەوەش کرد هەرچەندە لە ئێستادا کارکردن لە پڕۆژەکەدا وەستاوە، بەڵام لە ئایندەیەکی نزیکدا دەستپێدەکاتەوە.

پڕۆژەکە بە هاوبەشی لە نێوان حکوومەتی هەرێمی کوردستان و کەرتی تایبەت جێبەجێ دەکرێت، حکوومەت بەرپرسیار دەبێت لە دابینکردنی خزمەتگوزارییە بنەڕەتییەکانی وەک شەقام، قوتابخانە و مزگەوت، لە کاتێکدا کەرتی تایبەت ئەرکی دروستکردنی یەکەکان دەگرێتە ئەستۆ.

سەبارەت بە جۆری یەکەکان، بەڕێوەبەری وەبەرهێنانی هەولێر روونی کردەوە، ئەو کەسانەی تازە هاوسەرگیرییان کردووە زیاتر خواستیان لەسەر شوقەیە، بەڵام خێزانە قەرەباڵغەکان خانوویان پێ باشترە.

بەپێی بەدواداچوونەکان، 80%ـی یەکەکانی نیشتەجێبوون لە هەرێمی کوردستان بە شێوەی شوقە دروست دەکرێن، چونکە لە رووی رووبەرەوە سوودبەخشترن؛ بۆ نموونە لەسەر رووبەری یەک دۆنم زەوی دەکرێت نزیکەی 200 شوقە دروست بکرێت، لە کاتێکدا هەمان رووبەر تەنها جێگەی 20 خانووی تێدا دەبێتەوە.

بەپێی دوایین ئامارەکانی سەرژمێری، لە هەرێمی کوردستان 2 ملیۆن و 28 هەزار و 937 یەکەی نیشتەجێبوون هەن، کە بەشێکی زۆریان بەتاڵن و رێژەیەکی زۆری هاووڵاتییانیش هێشتا کرێنشینن، لە ئێستاشدا زیاتر لە 100 هەزار یەکەی دیکەی نیشتەجێبوون لە قۆناغی جێبەجێکردندان.

گەنمی سەرجەم جووتیاران وەردەگیرێت و بازاڕکردنی بۆ دەکرێت ​

دەستەی وەبەرهێنانی هەرێمی کوردستان ڕایگەیاند، لەسەر بڕیار و ڕاسپاردەی مەسرور بارزانی، سەرۆکی حکومەتی هەرێمی کوردستان، گەنمی سەرجەم جووتیاران وەردەگیرێت و کاری پێویست بۆ ساغکردنەوەی دەکرێت.

​بەرگەشت ئاکرەیی، وتەبێژی دەستەی وەبەرهێنان ئاماژەی بەوە کرد کە ئەم گەنمە لە بازاڕی ناوخۆیی هەرێمی کوردستاندا ساغ دەکرێتەوە، یاخود هەناردەی دەرەوەی وڵات دەکرێت.

​وتەبێژی دەستەکە ڕوونیشیکردەوە کە جووتیاران دەتوانن لە ئێستاوە داواکاری فەرمی خۆیان پێشکەشی دەستەی وەبەرهێنان بکەن. هاوکات ئەو کۆمپانیایانەی ئارەزووی کڕین و هەناردەکردنی گەنمی هەرێمی کوردستان بۆ دەرەوە دەکەن، دەتوانن بە هەمان شێوە داواکارییەکانیان پێشکەش بکەن.