وەزیری تەندروستی زانیاری لەسەر پەتای خوێنبەربوون ئاشکرا دەکات ‎

‎​دکتۆر سامان بەرزنجی، وەزیری تەندروستیی حکوومەتی هەرێمی کوردستان، لە کۆنگرەیەکی ڕۆژنامەوانیدا دوایین زانیاریی لەبارەی دۆخی تەندروستی، بەردەوامیی خزمەتگوزارییەکان لە ڕۆژانی پشوودا و مەترسییەکانی پەتای خوێنبەربوون (تای کۆنگۆ) بۆ دەزگاکانی ڕاگەیاندن خستەڕوو.

‎​بەردەوامیی خزمەتگوزارییەکان بە شێوازی ٢٤ کاتژمێری

‎​وەزیری تەندروستی ڕایگەیاند کە سەرجەم دامودەزگا تەندروستییەکان، لەوانە نۆڕینگە دەرەکییەکان، بەشەکانی فریاکەوتن و نەخۆشخانە پسپۆڕییەکانی وەک (ئافرەتان، منداڵان، سەنتەرەکانی شێرپەنجە و بانکی خوێن) بە شێوازی ٢٤ کاتژمێری لە ئەرکدان بۆ خزمەتکردنی هاووڵاتییان. هاوکتات ئاماژەی بەوەش کرد کە تیمەکانی هێڵی فریاکەوتنی ١٢٢ لە ئامادەباشی تەواودان بۆ وەڵامدانەوەی هەر حاڵەتێکی کتوپڕ.

‎​لە میانی بەسەرکردنەوەی نەخۆشخانەی لەدایکبوون و ئافرەتانی هەولێردا، وەزیری تەندروستی ئاماری ٢٤ کاتژمێری ڕابردووی نەخۆشخانەکەی ڕاگەیاند و گوتی:

‎​”لە شەو و ڕۆژێکی ڕابردوودا ٣٧ منداڵ لەدایکبوون، ٤٩ حاڵەتی داخڵبوون و زیاتر لە ١٨٠ سەردانیکەر هەبووە. ئەمەش سەلمێنەری ئەوەیە کە خزمەتگوزارییەکان تەنانەت لە کاتی جەژن و پشووەکانیشدا بەبێ وەستان بەردەوامن.”

‎​دوایین زانیاری لەسەر پەتای خوێنبەربوون (تای کۆنگۆ)

‎​سەبارەت بە بڵاوبوونەوەی پەتای خوێنبەربوون، دکتۆر سامان بەرزنجی دڵنیایی دایە هاووڵاتییان کە تا ئێستا هیچ حاڵەتێکی پشتڕاستکراوەی ناوخۆیی لە هەرێمی کوردستان تۆمار نەکراوە، تەنیا یەک حاڵەت نەبێت کە لە شارەکانی دیکەی عێراقەوە سەردانی سلێمانی کردبوو، ئەویش دوای وەرگرتنی چارەسەری پێویست بە تەواوی چاک بووەتەوە.

‎​لەگەڵ ئەوەشدا، وەزیر هۆشداریی دا و ڕایگەیاند: “بەهۆی ئەوەی ئێستا وەرزی بڵاوبوونەوەی ئەم پەتایەیە، پێشبینی دەکەین حاڵەتی پۆزەتیڤ هەبێت، بۆیە تیمەکانمان گەڕان و چاودێرییەکانیان چڕکردووەتەوە.”

‎​ڕێنماییە گرنگەکانی وەزارەت بۆ هاووڵاتییان:

‎​دوورکەوتنەوە لە سەربڕینی ئاژەڵ لە ناوماڵ و شوێنە گشتی و نایاساییەکان.

‎​پەنابردن بۆ سەربڕخانە فەرمییەکان کە لەژێر چاودێری توندی ڤێتێرنەریدان.

‎​پەیڕەوکردنی ڕێکارەکانی خۆپارێزی کەسی لە کاتی مامەڵەکردن لەگەڵ گۆشت و ئاژەڵدا.

‎​هۆشیاربوون لە مەترسی نەخۆشخانەکە؛ چونکە ئەم پەتایە ڕێژەی مردنی زۆرە ئەگەر لە سەرەتاوە دەستنیشان نەکرێت.

‎​لە کۆتایی کۆنگرە ڕۆژنامەوانییەکەدا، وەزیری تەندروستی سوپاس و پێزانینی ئاراستەی پزیشکان، پەرستاران و سەرجەم کارمەندانی تەندروستی کرد و بە “سەربازی ون” ناوی بردن، کە لە کاتی پشووەکندا دوور لە ماڵ و منداڵیان، ئەرکەکانیان بە ڕێکوپێکی بەڕێوەدەبەن و سەرقاڵی خزمەتکردنی هاووڵاتییانن.

دیموکراسی و دۆخی ئازادیخوازان لەکوردستان بەرەو کوێ ؟

دیار ڕزگار قادر

نزیکەی سەدەیەک خەڵکی کوردستان لەدژی ڕژێمە فاشیستە یەک لەدوای یەکەکانی عێراق خەبات و تێکۆشانیان بۆ ئازادی و سەربەرستی و ژیانێکی شکۆمەند و هێنانەکایەی کیان و حکومەتێکی سەربەخۆ کرد، دواجار لەکاتی لەناوبردنی ڕژێمی صەدام حسێن لەساڵی 2003 کورد بووە خاوەن پێگەو دەسەڵات و سەروەری و هەموو شتێک، بەڵام بەداخەوە کاتێک تام و بۆنی دەسەڵات و سەروەت و سامان دەرکەوت سەرانی حزبەکانی دەسەڵاتدار لە پارتی و یەکێتی خەڵک و خاکی کوردستانیان لەبیرنەما و کەوتنە خۆدەوڵەمەند کردن و قایمکردنی پێگەی خۆیان بەهێزی ئەمنی و سەربازی و سەرکوتکردنی هەرکەسێک کەلەگەڵ خۆیان نەبێت.


کانتی فەیلەسوفی ئەڵمانی دەڵێت: مرۆڤ نابێت لەسزایەک بترسێت کە تاوان لەناخیدا بونی نیە، بەڵکو دەبيت لە نادادی زیاتر بترسێت! کەچی ڕۆژگاری ئەمڕۆی کوردستان وایلێهاتوە ئەوەی لە نادادپەروەری ئەترسێت هەر ئەو ئەکرێت بە تاوانبار، بەدرێژایی 35 ساڵی ڕابردووی حوکمڕانی کوردی، هەرکاتێک هەناسەیەک بۆ ئازادی و تروسکاییەکی ئومێد بۆ دیموکراسی لەدایک بووە، هێزەکانی دەسەڵات بەهەموو شێوەیەک لایەنەکانی ئۆپۆزسیۆن و کەسایەتیە سیاسییە سەربەخۆکان و ئازادیخوازەکانیان چەوساندۆتەوە، لەبری ئەوەی گوێ لەڕەخنە و سەرنجی ئازادیخوازان بگرن دێن بە پەلاماردان و گرتن و دادگایی کردن ڕوبەڕویان دەبنەوە، گوایە ئەم هیزانە دادپەروەری دەچەسپێنن و یاسا جێبەجێ دەکەن کەچی بەو نادادیە دەیان کەسی دیکە لەژیر ناوی یاسادا سزا دەدەن.

کاتێک دەبینین حکومەتی هەرێم لەسەر بنەمای یاساکانی خێڵ و کۆکردنەوەی تەواوی دەسەڵات لای هێزێک یان دوو هێز پێکدێت و لەبری لۆژیکی یاسا لۆژیکی هێز حوکم دەکات، کاتێک لەو شوێنەی یاسا دەبێت بە تابلۆیەک و تەنها هەڵدەواسرێت وەک وێنەیەکی بێ گیان و ڕاستگۆیی دەبێتە تاوان و ویژدان کۆت و بەند دەکرێت، کاتێک نێوان خەڵک و دەسەڵات پانتاییەکی گەورە داگیر دەکات و متمانە بوونی نەماوە، ئالەم کاتەدا دەسەڵات لەبری هێزی یاسا و حوکمەکانی دیموکراسی هێزی ئەمنی و سەربازی بۆ یەکلایی کردنەوەی خواست و ئامانجەکانی بەکاردەهێنێت و ڕێگە نادات ئەوانی تر هیچ جۆرە ئازادییەکیان هەبێت تەنانەت قسەکردن و ڕەخنەگرتنیش.


ئەگەرچی دیموکراسی بەمانا فراوانەکەی واتا حوکمی گەل، بەڵام لەهەرێمی کوردستان تەواو پێچەوانەی ئەم دروشمە سیاسەت دەکرێت، گەل خاوەنی دەسەڵات نیە و توانای دەربڕینی بیروڕاکانی نیە، گەل دەرفەتی بۆ نەڕەخسێنراوە بەئازادی و دوور لەچاوی هەڕەشە و توندوتیژی بەشداربێت لە حوکمڕانی وڵاتدا، هەڵبژاردن تەنها وەک هێمایەکی دیموکراسی چوار ساڵێک ئەنجام دەدرێت، بەڵام هەڵبژاردن نەیتوانیوە ببێتە هۆکارێک بۆ گۆڕینی دەسەڵات و لابردنی ئەو حزبانەی کە دەیان ساڵە وەک ڕژێمە فاشیزمەکان دەسەڵات بەڕێوەدەبەن و ئازادیخوازان سەرکوت دەکەن، هەڵبژاردن وەک کاڵایەکی دیموکراسی لە شانۆگەریەکی گاڵتەجاڕیدا نمایش دەکرێت و چاوی وڵاتانی ئەمریکا و ئەوروپای پێ دەگیرێت، کاتێکیش ئازادیخوازان ڕەخنە لەم دیموکراسیە دەگرن ڕووبەڕووی ئەشکەنجە و گرتن و لێدان و دادگایی کردن دەبنەوە، سەرانی دەسەڵات نوقمی تاوانکاری و بێ یاسایی بوونە، ئەمەش بۆ چاککردنی ئەم بارودۆخە خراپە نیە کەلەکوردستان هەیە بەڵکو بۆ زیاتر سەرکەوتکردنی دەنگی ئازاو دلیری لایەنەکانی دەرەوەی دەسەڵاتە.

لەکوردستانی عێراقدا دیموکراسی و مافی هەڵبژاردن و ئازادی بیروڕا تائەو شوێنە هەیە کە تۆ دژی لایەنەکانی دەسەڵات نەبیت، ئەگەر ئازادیخوازان بیانەوێت خواروخێچی دەسەڵات نیشان بدەن و ڕەخنە لە کێماسی و گرفتەکان بگرن، ئەوا بە خائین و دەستی دەرەکی و ئاژاوەگێڕ ناودەبرێن، دەسەڵات لەکوردستان فێر نەبووە ڕەخنە قبوڵ بکات هەمیشە بە زمانی هەڕەشە و توندوتیژی ڕووبەڕووی هاوڵاتیەکانی خۆی دەبێتەوە، لێرەوە تێدەگەین کە کێشە بنەڕەتیەکە لە کەسەکاندا نیە بەڵکو کیشە جەوهەریەکە لەنەبوونی سیستەم دایە، دادگا لەبری ئەوەی سزای تاوانبار بدات سزای بی تاوان دەدات، یاسا لەبری ئەوەی سزا بەسەر دەسەڵاتدارانی گەندەڵ و ستەمکاردا بسەپێنێ یەخەی لایەنە ئۆپۆزسیۆنەکان و ئازادیخوازان دەگرێت و سزایان دەدات.

گرووپە چەکدارەکان برینەکانی نیشتمانیان کردە بازاڕی تاڵان

محمد ڕەمەزان عەلى

گۆڕەپانێکی تاریک کە تێیدا لاشەی قوربانییەکان هێشتا خوێنیان لێ دەچۆڕێت، بەڵام قەلەڕەشەکان لەبری ناشتنیان، خەریکی هەڕاجکردنی ئێسکەکانیانن بۆ ئەوەی بزانن کێ دەتوانێت زۆرترین قازانج لەم مەرگە بەدەست بهێنێت! لێرەدا خاکی داگیرکراو واتای ڕزگارکردنی نییە، بەڵکو واتای کرانەوەی دەرگایەکی نوێیە بۆ باجگرتن و سەپاندنی ترس! ئەمە ڕێک واقیعی ئەو ناوچانەیە کە پێیان دەڵێن “جێناکۆک” لە عێراقدا؛ خاکێک کە لەبری ئەوەی ببێتە پردی ئاشتی، کراوەتە مەیدانێکی کراوە بۆ هێزە چەکدارەکان و میلیشیاکان تا هەژموونی خۆیان بسەپێنن و ژیانی هاوڵاتییان بکەنە بارمتەی ئابووریی سێبەر و ململانێی قێزەونی سیاسی !

لە سایەی ئەم فەزایەدا، سەروەریی دەوڵەت تەنها گاڵتەجاڕییەکە لەسەر کاغەز. کاتێک دەسەڵاتدارانی بەغدا و هەولێر لەسەر شاشەکان شەڕی نیشتمانپەروەری دەکەن، لەسەر ئەرزی واقیع ئەوە چەکدارانی سێبەر و مافیاکانن کە دەروازە سنوورییەکان بەڕێوە دەبەن و سەرانە لە کاسبکار و خەڵکی سادە وەردەگرن. ئەوان ئەم بۆشاییە ئەمنییەیان کردووەتە بەهەشتێک بۆ قاچاخی سنوور و بازرگانیکردن بە خوێنی ئەو پێکهاتانەی کە ساڵانێکە قوربانیی یەکەمی دەستی سیاسەتە فاشیستەکانن. لێرەدا، دادگاکانی کارتۆنی و حکومەتی ئیفلیجکراو بوونیان نییە بۆ پاراستنی مافی مرۆڤ، بەڵکو تەنها بۆ شەرعییەتدانن بەو تاڵانییەی کە بە ناوی ئاسایشەوە دەکرێت و دەچێتە گیرفانی حیزبەوە.

بۆچوونى من وایە کە : “شارستانییەتێک کە توانای چارەسەرکردنی ئەو قەیرانانەی نەبێت کە خۆی دروستی کردوون، شارستانییەتێکی داڕزاوە و مردووە” ! ئەم حەقیقەتە ڕێک پێناسەی ئەو مۆدێلەیە کە لە وڵاتی سۆماڵ لە سەردەمی شەڕی ناوخۆدا ڕوویدا، کاتێک دەوڵەت هەرەسی هێنا و گرووپە چەکدارەکان وڵاتیان دابەش کرد بەسەر کانتۆنەکانی قاچاخ و باجگرتندا، و نەتەوەیەکیان خستە نێو دۆزەخی بێکۆتاییەوە ! ئەمڕۆ لە عێراق و ناوچە جێناکۆکەکانیشدا هەمان ئەو داڕزانە دووبارە دەبێتەوە؛ نوخبەی تاڵانچیی هەولێر و بەغدا کە خۆیان خولقێنەری ئەم کێشانەن، ناتوانن چارەسەری بکەن چونکە بوونی میلیشیاکان و هێزە تاریکەکان لەم ناوچانەدا، گەورەترین سەرچاوەی داهاتە بۆ خەزێنەی بەتاڵکراویان و درێژەدانە بە حوکمی خێزانی و تایفی !

لەم وێرانەیەدا، ئەوەی دەپلیشێتەوە خاکی نیشتمان نییە بە تەنها، بەڵکو کەرامەتی ئەو مرۆڤانەیە کە بوونەتە قەڵغانی شەڕی دزەکان. هەر دەنگێکی خنکێنراو کە لەم ناوچانەدا داوای خزمەتگوزاری یان دەرکردنی چەکدارەکان بکات، دەستبەجێ بە پەڕاوی دروستکراو، فڕاندنی سیاسی، و تیرۆری دەروونی وەڵام دەدرێتەوە. ئەمە ئیتر ململانێ نییە لەسەر ناسنامەی خاک، بەڵکو زۆرانبازییە لەسەر ئەوەی کێ مافی ئەوەی هەیە تاڵانییەکە بۆ خۆی قۆرخ بکات.

پارتی لە خەمی هەژموون و یەکێتی لە خەمی پێگە

ئاراس طارق محمد

لە ناوەڕاستی تاریکستانێکدا، سێ ڕاوچی بە چەقۆی تیژەوە لەسەر لاشەی نێچیرێکی بریندار شەڕ دەکەن؛ یەکەمیان دەیەوێت پێستی دابماڵێت بۆ ئەوەی بیکاتە فەرشی کۆشکەکەی، دووەمیان دەیەوێت قاچەکانی ببڕێت بۆ ئەوەی بنکەی خۆی پێ بەهێز بکات، سێیەمیانیش دەیەوێت بە ناوی یاساوە تەواوی گۆشتەکە بباتە خەزێنەی خۆی ! لێرەدا هیچ کەسێک بیر لە تیمارکردنی برینەکانی ئەو نێچیرە ناکاتەوە، بەڵکو هەموویان تەنها بیر لەوە دەکەنەوە چۆن زۆرترین پارچەی لێ دابڕن! ئەمە ڕێک واقیعی تاڵی ناوچە جێناکۆکەکانە؛ خاکێک کە تێیدا پارتی دیموکراتی کوردستان بەدوای سەپاندنی هەژمووندایە، یەکێتیی نیشتمانیی کوردستان بەدوای جێگرتن و فراوانکردنی پێگەی خۆیەتی، حکومەتی بەغداش دەیەوێت بەناوی سەروەرییەوە کۆنترۆڵی ڕەهای بەسەردا هەبێت، بەڵام لە کۆتاییدا هاوڵاتیی سادە تەنها دەبێتە قوربانیی قەیرانێکی بێکۆتایی و چاوەڕوانییەکی کوشندە.

لە سایەی ئەم سێگۆشە وێرانکەرەدا، کەرکووک، شنگال، و خانەقین کراونەتە گۆڕەپانی زۆرانبازییەک کە تێیدا ژیانی مرۆڤەکان هیچ نرخێکی نییە. کاتێک دەسەڵاتدارانی هەولێر و بەغدا لەسەر شاشەی تەلەفزیۆنەکان باسی نیشتمانپەروەری دەکەن، لە پشتی پەردەوە خەریکی بەشبەشێنەی داهاتی قاچاخی سنوور و نەوتی دزراون. بۆ ئەم نوخبە تاڵانچییە، ناوچە جێناکۆکەکان تەنها کارتی فشار و ئابووریی سێبەرن، نەک خاکی نەتەوەیەک کە پێویستی بە خزمەتگوزاری و ئارامی بێت. لێرەدا پەرلەمانی بێدەنگکراو و دادگاکانی کارتۆنی تەنها بۆ شەرعییەتدان بەم قۆرخکارییە بەکاردەهێنرێن، نەک بۆ گەڕاندنەوەی ماف بۆ خاوەن مافەکان.

ئەلبێرت کامۆ دەڵێت: “خۆشگوزەرانیی گەل، هەمیشە بووەتە پاساوی هەمیشەییی ستەمکاران” ! ئەم حەقیقەتە ڕێک هاوشێوەی دۆخی کیشوەری ئەفریقایە لە سەردەمی کۆلۆنیالیزمدا، کاتێک ئیمپراتۆریەتە گەورەکان بە ناوی گەیاندنی شارستانییەت و پاراستنی خەڵکەوە، کیشوەرەکەیان لە نێوان خۆیاندا دابەش کرد و سەرچاوەکانیان تاڵان کرد، لەکاتێکدا دانیشتووانە ڕەسەنەکەیان لەوپەڕی هەژاری و خوێناویدا هێشتەوە ! ئەمڕۆ لە عێراق و هەرێمی کوردستانیشدا هەمان شانۆگەریی قێزەون دووبارە دەبێتەوە؛ دەسەڵاتداران بە ناوی پاراستنی پێکهاتەکان و سەپاندنی سەروەرییەوە، ناوچە جێناکۆکەکانیان خستووەتە ژێر گەمارۆی چەکدارەکانیان، بەڵام لە واقیعدا تەنها خەریکی دزینی سامانی ناوچەکەن و هەر دەنگێکی ناڕازیش بە خێرایی لە ڕێگەی سەرکوتکردنی مەدەنی و دروستکردنی پەڕاوی ساختەوە بێدەنگ دەکەن.

ئەم ململانێیە نە بۆ پاراستنی خاکە و نە بۆ خزمەتی خەڵکە؛ ئەمە شەڕی مانەوەی حوکمی خێزانی و دەسەڵاتی میلیشیاییە کە لەسەر حیسابی کەرامەتی هاوڵاتییان بەڕێوە دەچێت. هەر کاتێک گەنجێک لەم ناوچانەدا داوای کارەبا یان مووچە بکات، دەستبەجێ بە تیرۆری دەروونی و فڕاندنی سیاسی وەڵام دەدرێتەوە. ئەوان خاکەکەیان کردووەتە دۆزەخێک کە تێیدا هیچ پڕۆژەیەکی خزمەتگوزاری بوونی نییە، چونکە وەبەرهێنان لە ناوچەیەکی سەقامگیردا زیان بە قازانجی کۆمپانیاکانی حیزب دەگەیەنێت.

ئێندریک بە فەرمی کۆتایی بە گەشتەکەی لەگەڵ لیۆن هێنا

ئێندریکی هێرشبەری لاوی بەڕازیلی دوای کۆتایی هاتنی ماوەی خواستنەکەی لە یانەی لیۆنی فەڕەنسی بە فەرمی ماڵئاوایی لە هاندەرانی ئەو یانەیە کرد و بڕیاری گەڕانەوەی بۆ ڕیزەکانی ڕیاڵ مەدرید دا.

ئەم ئەستێرە تەمەن ١٩ ساڵانە کە لە زستانی ڕابردوو بەهۆی کەمی خولەکەکانی یاریکردنی لە مەدرید ڕووی لە خولی فەڕەنسی کردبوو توانی لەو ماوە کورتەدا بە تۆمارکردنی پێنج گۆڵ و حەوت ئەسیست ئاستێکی بەرز نیشان بدات و متمانە بۆ خۆی بگەڕێنێتەوە.

سەرەڕای ئەوەی پێشتر دەنگۆی ئەوە هەبوو کە یانە ئیسپانییەکە نایەوێت بیگەڕێنێتەوە بەڵام درەوشانەوەی ئێندریک و تێپەڕاندنی کێشە دەروونییەکانی وایکرد هاوکێشەکان پێچەوانە ببنەوە و شوێنی خۆی لە پێکهاتەی وەرزی داهاتووی سپیپۆشەکاندا بکاتەوە.

ئێندریک لە ڕێگەی گرتەیەکی ڤیدیۆییەوە سوپاسی یانەی لیۆنی کرد و ئاماژەی بەوە دا کە ئێستا بە ئەزموونێکی زۆرتر و بەسەرکەوتوویی دەگەڕێتەوە بۆ قەڵای سپی تاوەکو لەژێر سەرپەرشتی ئەنچیلۆتی درێژە بە کاروانە وەرزشییەکەی بدات.

گواردیۆلا پیرۆزبایی لە ئارسناڵ دەکات

پیپ گواردیۆلا دوای لەدەستدانی نازناوەکە رایگەیاند کە تەنها یەک ساڵ لە گرێبەستەکەی ماوە و ئاماژەی بەوە کرد کە سەرەڕای دڵخۆشی زۆری لە مانچستەر سیتی بەڵام بڕیاری کۆتایی لەبارەی مانەوە یان رۆیشتنی دوای کۆبوونەوەی لەگەڵ سەرۆکی یانەکە لە کۆتایی وەرزدا دەدرێت.

لە کاتێکدا میدیاکان باس لەوە دەکەن یانەکە لەگەڵ ئینزۆ ماریسکا گەیشتووەتە ڕێککەوتن بۆ شوێنگرتنەوەی پیپ

راهێنەری مانچستەر سیتی لەبارەی یەکسانبوونیان بەرامبەر بۆرنمۆس روونی کردەوە کە یارییەکی زۆر سەخت بوو و یاریزانەکانی توانیان گۆڵ تۆمار بکەن بەڵام کاتەکە درەنگ بوو.

هەروەها گلەیی ئەوەی کرد کە گۆڵێکی ته‌واوی ئیرلینگ هالاند بە بیانووی ئۆفساید رەتکراوەتەوە و تەکنەلۆژیای ڤار پێداچوونەوەی بۆ نەکردووە.

سەرەڕای لەدەستدانی نازناوەکە گواردیۆلا ستایشی ماندووبوونی یاریزانەکانی کرد کە تا کۆتا سات جەنگاون و بە فەرمی پیرۆزبایی نازناوی پریمەر لیگی لە یانەی ئارسناڵ و میکێل ئارتێتا کرد و دووپاتی کردەوە کە تۆپچییەکان بە تەواوی شایستەی ئەم دەستکەوتە مێژووییە بوون دوای ئەو ئاستە بەرزەی لەم وەرزەدا پێشکەشیان کرد.

شۆکێکی گەورە بۆ ئیسپانیا

فێرمین لۆپێزی یاریزانی ناوەڕاستی هەڵبژاردەی ئیسپانیا بەهۆی تووشبوون بە پێکانێکی سەخت لە پێیدا، بەشداریی لە جامی جیهانی ٢٠٢٦ ناکات.

ئەم یاریزانە ٢٣ ساڵەیە لە یاریی نێوان بەرشلۆنە و ڕیاڵ بێتیسدا کە بە بردنەوەی ٣-١ بۆ بەرشلۆنە کۆتایی هات تووشی شکانی ئێسکی پێنجەمی پێی ڕاستی بوو. سەرەڕای ئەوەی نەشتەرگەرییەکەی بە سەرکەوتوویی ئەنجامدراوە، بەڵام یانەی بەرشلۆنە هێشتا وادەیەک بۆ گەڕانەوەی بۆ یاریگاکان دیاری نەکردووە.

لۆپێز لە پەیامێکدا لە ئینستاگرام ئاماژەی بەوە کردووە کە سەرباری ئەوەی ئەم دۆخە بۆی زۆر قورسە، بەڵام وەک ئاڵنگارییەکی نوێ لە ژیانی وەرزشیدا سەیری دەکات و بەڵێنی گەڕانەوەیەکی بەهێزتر دەدات. ئەو ئێستا بەنیازە لە ماڵەوە وەک هاندەرێک پشتگیری هاوڕێکان و هەڵبژاردەی وڵاتەکەی بکات.

ئەم یاریزانە خاوەنی حەوت یاریی نێودەوڵەتییە و پێشبینی دەکرا ناوی لە لیستی هەڵبژاردەی ئیسپانیا بۆ جامی جیهانی هەبێت، کە بڕیارە لیستی کۆتایی یاریزانەکان ڕۆژی دووشەممە ڕابگەیەنرێت. ئیسپانیا لە جامی جیهانی ئەمریکا و کەنەدا و مەکسیکدا لە کۆمەڵەی هەشتەمدایە و لە ١٥ی حوزەیران یەکەم یاری خۆی بەرامبەر کەیپ ڤێردی ئەنجام دەدات و پاشان ڕووبەڕووی سعودیە و ئۆرۆگوای دەبێتەوە.

لۆپێز لەم وەرزەدا بەشداری ٤٨ یاری کردووە و سەرەڕای پێکانی ماسولکەی ڕان، توانیویەتی ١٣ گۆڵ تۆمار بکات و ١٧ گۆڵیش دروست بکات، هەروەها بەشێک بووە لەو پێکهاتەیەی کە ئیسپانیا لە یۆرۆی ٢٠٢٤ سەرکەوتنی پێ بەدەستهێنا.

مۆرینیۆ دەگەڕێتەوە ڕیال مەدرید و دەسەڵاتی ڕەهای پێدەدرێت

​میدیاکانی ئیسپانیا و ئەوروپا ئاشکرایان کردووە کە یانەی ڕیال مەدرید گەیشتووەتە ڕێککەوتن لەگەڵ خۆزێ مۆرینیۆ، ڕاهێنەری پورتوگالی، بۆ ئەوەی لە وەرزی داهاتوودا (2026-2027) سەرکردایەتی یانەکە بگرێتە دەست.

ئەم بڕیارەی فلۆرێنتینۆ پێرێزی، سەرۆکی یانەکە، دوای ئەوە دێت کە یانەی شاهانە وەرزێکی بێ نازناوی لەژێر سەرپەرشتی ئەلڤارۆ ئاربێلوا بەڕێکرد و دوچاری چەندین کێشەی ناوخۆیی لە ژووری جلگۆڕیندا بووەوە؛ بۆیە پێرێز، مۆرینیۆ بە گونجاوترین کەس دەزانێت بۆ گەڕاندنەوەی دیسپلین و سەقامگیری بۆ تیپەکە.

​بەپێی ڕاپۆرتە ڕۆژنامەوانییەکان و سەرچاوە ئیسپانییەکان، یەکێک لە مەرجە سەرەکییەکانی مۆرینیۆ بۆ واژۆکردنی گرێبەست، پێدانی دەسەڵاتی تەواو و ڕەها بووە لەناو یانەکەدا. ئەمەش بەو مانایەیە کە ئەو پیاوە پورتوگالییە دەبێتە بەرپرسی یەکەم و کۆتایی لە پرۆسەی کڕینی یاریزانانی نوێ و بەڕێکردنی ئەو یاریزانانەی کە لە پلانەکانیدا نین، بەبێ ئەوەی کارگێڕی یانەکە دەستوەردان لە بڕیارەکانیدا بکات.

مۆرینیۆ کە پێشتر لە نێوان ساڵانی 2010 بۆ 2013 ڕاهێنەری ڕیال مەدرید بووە، لە ئێستاوە دەستی بە داڕشتنی پلانی وەرزی نوێ کردووە و داوای بەهێزکردنی هێڵی بەرگری و ناوەڕاستی یانەکەی کردووە.

جێی باسە، چاوەڕوان دەکرێت دوای کۆتایی هاتنی خولی ئیسپانی، ڕیال مەدرید بە فەرمی گەڕانەوەی “Special One” بۆ سانتیاگۆ بێرنابیۆ ڕابگەیەنێت.

ئەستێرەیەکی هەڵبژاردەی بەڕازیل دووچاری پێکان بووە

دوای بڵاوکردنەوەی لیستی کۆتایی یاریزانە بانگهێشت کراوەکانی هەڵبژاردەی بەڕازیل بۆ مۆندیال کێشەیەک بەرۆکی هەڵبژاردەکە دەگرێت،ئەویش دوای ئەوەی یانەی سانتۆس ڕایگەیاند نەیمار جۆنیۆر دووچاری پێکان بووە،ئەمەش دڵڕاوکێی تەواوی خستۆتە دڵی هاندەرانی سیریساو.

بەگوێرەی زانیاریەکان بێت نەیمار لە پاژنەی پێی دووچاری پێکان بووە،بەڵام یانەی سانتۆس ڕایگەیاندوە یاریزانەکە هەفتەی داهاتوو دەتوانێ دەست بکاتەوە بە ڕاهێنان کردن و کێشەی نامێنێ،بەڵام هاندەرانی بەڕازیل ترسی ئەوەیان هەیە پێکانەکەی نوێتر ببێتەوە لەکاتی یاریەکانی مۆندیال یاریزانەکە دووربکەوێتەوە.

شایەنی باسە لەدواین ساتەکاندا نەیمار هیوای بەشداری کردنی لەمۆندیال لەدەست نەدا بۆ چوارەمین مۆندیال بانگهێشتی هەڵبژاردەکە کرا،کە لە 11ی حوزەیرانەوە یاریەکان دەست پێدەکەن و لە 19 تەمموز کۆتایی دێت،نەیماریش ئەم مۆندیالەی دواین هیوایە بۆ بەرز کردنەوەی نازناوەکە.

“سەرکار ڕێبوار”

ئەمشەو نەسڕ و ڕۆناڵدۆ لەبەردەم سەکۆی نازناوی ڕۆشەنی سعودین

ئەمشەو هەموو چاوەکانی جیهان دەچنەوە سەر سعودیا و خولی ڕۆشەنی ئەو وڵاتە،یانەی نەسڕ لەیاری یەکلاییکەرەوەی نازناوی خولەکە ڕووبەڕووی یانەی زەمەک دەبێتەوە،کە لەو یاریەدا تەنها بردنەوە دادی زەرد پۆشەکانی گەورەکانی سعودیا دەدات کاتێک هیلالی یاریەکەی خۆی بباتەوە.

نەسڕ لەچەند ڕۆژی ڕابردوو یاری کۆتایی خولی یانە پاڵەوانەکانی ئاسیا دووی لەدەستدا،ئەمەش هاندەرانی یانەکەی خستە ترسێکی زۆرەوە لە بردنی خولی ناوخۆیی،بەڵام هێشتا دەرفەتێکی زێڕینی لەبەردەمدا ماوە و یانەکە بەسەرکردیەتی کریستیانۆ ڕۆناڵدۆ بە ئیرادەیەکی قاییمەوە خۆی لەبەردەم سەکۆی نازناوەکە دەبینێتەوە.

یاریەکە کاتژمێر 9:00ی شەو بەکاتی هەرێمی کوردستان بەڕێوەدەچێت لەسەر یاریگای ئەوەل پارک،کە لەکاتی بەرامبەربوون یان شکستی نەسڕ لەم یاریە و بردنەوەی هیلال ئەوا شین پۆشەکانی هیلال دەبنە پاڵەوانی ڕۆشەنی سعودیا.

“سەرکار ڕێبوار”