‎پەیامێک لە سەرۆک بارزانییەوە بۆ ڕای گشتی

بەناوی خودای بەخشندە و میهرەبان

بە درێژاییی مێژوو گەلی كوردستان هیچ كات لەگەڵ شەڕدا نەبووە و هەمیشە خوازیاری ئاشتی و پێكەوەژیان بووە، ئەگەر شەڕیشی بەسەردا سەپێندرا بێت، ئەوە بەرگریی لە خۆی و مافەكانی كردووە. ئەوە بنەمایەكی نەگۆڕە و لە بڕوایەکی پتەو و فەرهەنگی دەوڵەمەندی ئاشتیخوازی و پێکەوەژیانی گەلی کوردستانەوە سەرچاوە دەگرێت.

جێگەی داخێكی زۆرە ئێستا شەڕ و گرژییەكی زۆر لە ناوچەكەماندا هەیە، ئێستا و پێشتریش هەردەم هیوامان ئەوە بووە كە هەرچی گرفت و كێشە هەیە لە ڕێگەی ئاشتیانەوە چارەسەر بكرێت، چونكە هەمیشە شەڕ مایەی كاولكاری و ماڵوێرانییه‌.

لەو میانەدا جێگەی سەرسوڕمانێكی زۆرە هەندێ گرووپ و لایەن لەژێر ناوی موقاوەمە و بە بیانوو و دروشمی بێ بنەما؛ ڕێگە بە خۆیان دەدەن پەلاماری شوێنی سڤیل و ژێرخانی ئابووریی هەرێمی كوردستان و بنكە و بارەگاكانی پێشمەرگە دەدەن. ئەمە شەڕفرۆشتن و دەستدرێژییەكی ئاشكرایە بۆ سەر مافی هاووڵاتیان و سەقامگیری و ئاسایشی هەرێمی کوردستان.

لێرەدا دەبێ هەموو لایەك باش بزانن که‌ دانبەخۆداگرتنیش سنووری هەیە. پێشمەرگە هەرگیز زوڵم و زۆری لە هیچ لایەنێك قبووڵ نەكردووە، ناكرێ و نابێ ئەو شەڕفرۆشتنە و تێكدانی سەقامگیریی هەرێمی کوردستان و ئاسایشی هاووڵاتیان لەلایەن ئەو گرووپانەوه‌ بەردەوام بێت. بۆ ئەو مەبەستە داوا لە حكوومەت و ئەنجوومەنی نوێنەرانی عێراق و لایەنە سیاسییەکان بە تایبەت چوارچێوەی هەماهەنگی دەكەین كە بە جددی بێنە سەر هێڵ و سنوورێك بۆ ئەو دەستدرێژییانە دابنێن، چونكە بەردەوامبوونی ئەو شەڕپێفرۆشتنە دەرئەنجامی خراپی لێ دەكەوێتەوە.

وێڕای دەربڕینی هاوخەمیم بۆ خانەوادە و كەسوكاری ئەو ئازیزانەی لە ئەنجامی ئەو پەلامارە ناڕەوایانەدا شەهید بوونە، خەڵكی خۆشەویستی كوردستانیش دڵنیا دەكەینەوە كە بە هەموو توانایەك بەردەوام دەبین بۆ ئه‌وه‌ی كوردستان لە شەڕ و نەهامەتی دوور بێت و ئارامی و ئاسایش و ژیانی خەڵك پارێزراو بێت و سەركەوتن هەر بۆ گەلی كوردستان دەبێت.

مسعود بارزانی

8ی ئاداری 2026

راگەیندراوێک لە وەزارەتی دارایی و ئابوری

وەزارەتی دارایی رایگەیاند ، گوژمەیەکی تر لە تەمویلی مووچەی مانگی شوبات خرایە سەر هەژماری بانکی وەزارەتی دارایی.

دوانیوەڕۆی ڕۆژی یەک شەممە ( ٨ ی ئازاری ٢٠٢٦ ) گوژمەیەکی تر بەبڕی (٣٦٥ ) ملیارو ( ٧٠٢ ) ملیۆن دینار وەک بەشێکی تر لەتەمویلی مووچەی مانگی شوباتی فەرمانبەرانی هەرێمی کوردستان خرایە سەر هەژماری بانکی وەزارەتی دارایی و ئابوری هەرێمی کوردستان لەلقی هەولێری بانکی ناوەندی عێراق.

چاوەڕێ دەکەین سبەی دووشەممە لەگەڵ گەیشتنی تەواوی تەمویلی مووچە لەلایەن وەزارەتی دارایی عێراقەوە ڕاستەوخۆ دەست بەدابەشکردنی مووچەی مانگی شوبات بکەین.

ڕاگەیاندنی وەزارەتی دارایی و ئابوری ٨ ی ئازاری ٢٠٢٦

حەشارگەی بکوژان و دادگاکانی حیزب!

“دادپەروەری و سەروەریی یاسا” لە هەرێمی کوردستان ئەو درۆ گەورەیەیە کە پارتی و یەکێتی ڕۆژانە بەسەر شاشەکانەوە دەیفرۆشنەوە بە خەڵک، بەڵام لە واقیعدا دادگاکان تەنها لقی ناوچە و مەڵبەندەکانی حیزبن بۆ سزادانی نەیارەکانیان و پەردەپۆشکردنی تاوانەکانی خۆیان. نموونەی هەرە زەق و شەرمەزارکەری ئەم قۆرخکارییە، دۆسیەی تیرۆرکردنی عەقید هاوکار جافە، کە لە ئۆکتۆبەری ٢٠٢٢ لە ناوەڕاستی هەولێر بە بۆمبی چێنراو لەناو ئۆتۆمبێلەکەیدا کوژرا. کاتێک دادگای هەولێر، کە بەتەواوی لەژێر هەژموونی پارتیدایە، سزای لەسێدارەدانی غیابی بۆ وەهاب هەڵەبجەیی، بەرپرسی دژەتیرۆری یەکێتی و پێنج ئەفسەری تری باڵای ئەو دەزگایە دەرکرد، لە جیاتی جێبەجێکردنی یاسا، خەڵکی کوردستان بینییان چۆن ئەم دەسەڵاتە بووەتە دوو ئیدارەییەکی مافیایی کە هیچ یاسایەک تێیدا سەروەر نییە.

ئەوەی دۆخەکە دەکاتە گاڵتەجاڕییەکی مێژوویی و تفکردنە ناو چاوی یاسا، کاردانەوەی سەرۆکی یەکێتی بوو! لەبری ئەوەی تۆمەتباران ڕادەستی دادگا بکرێن بۆ سەلماندنی بێتاوانییان یان وەرگرتنی سزاکەیان، بافڵ تاڵەبانی ڕێک ڕۆژێک دوای دەرچوونی سزای لەسێدارەدانەکە، لە سلێمانی پێشوازی لە وەهاب هەڵەبجەیی کرد و خەڵاتی “ئازایەتی و دڵسۆزی” پێ بەخشی! ئەمە پەیامێکی ڕوون و بێشەرمانە بوو بۆ پەرلەمان، دادگا و تەواوی هاوڵاتییان کە یاسا تەنها بۆ سزادانی هاوڵاتیی هەژار و بێدەسەڵاتە، بەڵام بۆ بەرپرسانی حیزب، تاوانەکان دەبنە جێگەی شانازی و وەرگرتنی مەدالیا. یەکێتی پاساوی ئەوە دەهێنێتەوە کە دادگاکانی هەولێر سیاسین و پارتی دۆسیەکە بۆ لێدانی یەکێتی بەکاردەهێنێت، بەڵام پرسیارەکە ئەوەیە: ئایا داڵدەدانی داواکراوان لەلایەن حیزبەوە و ڕێگریکردن لە هەر جۆرە لێکۆڵینەوەیەکی سەربەخۆ، خۆی لەخۆیدا سەلماندنی شکستی دەوڵەتداری نییە؟

ئەمە ئەو وێرانەیەیە کە پێی دەڵێن “حکومەتی هەرێمی کوردستان”؛ شوێنێک کە بەرپرسە ئەمنییەکان خۆیان تۆمەتبارن بە خەڵتانی خوێنکردنی یەکتر، و دادگاکانیش تەنها مۆری حیزبیان بەدەستەوەیە بۆ شەرعیەتدان بەم جەنگە قێزەونە. ئەگەر یاسا و دەزگا ئەمنییەکان نەتوانن بکوژی ئەفسەرێکی باڵا سزابدەن و بیانکەنە قوربانیی ململانێی نەوت و دەسەڵات، هاوڵاتییەکی ئاسایی چۆن دەتوانێت لەم دارستانەدا هەست بە ئاسایش بکات؟

بۆ یاریەکەی ئەمشەو دوو ئەستێرەی دەگەڕێنەوە ڕیاڵ مەدرید

ئەمشەو لەگەڕی 26 لالیگادا یانەی ڕیاڵ مەدرید لەسەر یاریگای سانتیاگۆ بێرنابیۆ میوانداری یانەی خێتافی دەکات و یاریەکەش کاتژمێر 11:00ی شەو بە کاتی هەرێمی کوردستان دەست پێدەکات.

ئەوەی جێگای سەرنجە لەم یاریەدا ڕیاڵ مەدرید کۆمەڵێک ئەستێرەی لەیاریگا دادەبڕێن و لەبەرامبەردا دوو ئەستێرەی دەگەڕێنەوە یاریگا و لەم یاریە بانگهێشت کراون.

بۆ ئەم یاریە دین هاوسن و ڕۆدریگۆ بەفەرمی ناویان لە لیستی یاریزانە بانگهێشت کراوەکانە،کە هاوسن ماوەیەکی زۆرە بەهۆی پێکانەوە لەیاریگا دوورە کیلیان مباپێش لەم یاریەدا دوورخراوەتەوە بەهۆی پێکانی ئەژنۆی.

“سەرکار ڕێبوار”

گرووپی گۆڵدمان ساکس: بەهۆی داخستنی گەرووی هورمز نرخی گاز دوو هێندە بەرزدەبێتەوە

ئەمڕۆ دووشەممە، 2ـ3-2026، گرووپی کۆمپانیاکانی گۆڵدمان ساکس کە لەبوارەکانی وەبەرهێنان، بانک و خزمەتگوزاری دارایی کاردەکات، رایگەیاند، پێشبینی دەکەن نرخی گازی سروشتی ئەوروپا زیاتر لە دوو هێندە بەرزبێتەوە، ئەگەر ناردنی گاز لە ڕێگەی گەرووی هورمزەوە بۆ ماوەی مانگێک بوەستێت.

شرۆڤەکارانی گرووپی گۆڵدمان ساکس، لە یاداشتێکدا نووسیویانە، پێوەرەکان le ئەوروپا و ئاسیا بە دەگمەن نرخی مەترسی پەیوەست بە ئێرانیان داناوە، نزیکەی یەک لەسەر پێنجی دابینکردنی گازی سروشتی شل لە جیهاندا کە زۆربەیان لە قەتەرەوە هاتووە، بەم گەرووەدا تێدەپەڕن.

ئاماژەیان بەوەشکردووە، “داخستنی یەک مانگ دەتوانێت ببێتە هۆی بەرزبوونەوەی نرخی گازی ئەوروپا و نرخی LNG لە ئاسیا بە رێژەی 130%، کە دەگاتە نزیکەی 25 دۆلار بۆ هەر ملیۆن یەکە گەرمییەکانی بەریتانیا.”

شرۆڤەکاران ئاماژەیان بەوەشکردووە، ” ئەگەر زیاتر لە دوو مانگ گواستنەوەی گاز لە رێگەی گەرووی هورمزەوە رابگیرێت، پێدەچێت نرخی گازی ئەوروپا بۆ زیاتر لە 100 یۆرۆ بۆ هەر مێگاوات کاتژمێرێک، نزیکەی 35 دۆلار بۆ هەر ملیۆن یەکەیەکی گەرمی بەریتانیا بەرزبێتەوە، ئەمەش ئەگەری هەیە خواستی جیهانی لەسەر گاز کەم ببێتەوە.

هەروەها کۆمپانیاکە پێشنیازی کردووە “کاریگەرییەکانی لەسەر گازی سروشتی ئەمریکا سنووردار دەبێت، بەو پێیەی ئەمریکا هەناردەکاری سەرەکیی گازی سروشتی شلە.”

دوێنێ یەکشەممە، 1ـی ئاداری 2026، ئاژانسی هەواڵی رۆیتەرز بڵاویکردەوە، زیاتر لە 150 تانکەری نەوت و گاز لە ئاوەکانی کەنداو لە دەرەوەی گەرووی هورمز گیریان خواردووە و ناتوانن بە گەرووەکە تێپەڕن.

بەرپرسێكی حكوومی: حكوومەتی عێراق ڕێگر بوو لە دانانی دژەمووشەك و دژەدرۆن لە كۆرمۆر

نوێنه‌رایه‌تی حكوومه‌تی هه‌رێمی كوردستان له‌ به‌غدا داوایه‌كی له‌ میدیاكان كرد، هه‌روها ئاشكرای دەكات كە پچڕانی كاره‌بای 24 كاتژمێری بەهۆی ئەوەوەیە بەغدا رازی نەبووە سیستەمی دژەمووشەك لە نزیك كێڵگەی كۆرمۆر دابنرێت.

به‌ختیار حاجی حه‌مه‌د، به‌ڕێوه‌به‌ری گشتیی كاروباری په‌یوه‌ندییه‌كان و به‌دواداچوون له‌ نوێنه‌رایه‌تیی حكوومه‌تی هه‌رێم له‌ به‌غدا له‌ بلاوكراوه‌یه‌كدا لە تۆڕی كۆمەڵایەتی (فەیسبوك) نووسیویەتی، “شه‌ڕێكی گه‌وره‌ چوار ده‌وره‌مانی گرتووه‌ بۆیە داوا لە دەزگاكانی راگەیاندن و میدیاكاران دەكەم لە كاتی گه‌یاندنی هه‌واڵ، شوێنی كه‌وتن و به‌رپه‌رچدانه‌وه‌ی درۆن و مووشه‌ك و هێرشه‌كان ئاشكرا نه‌كه‌ن، ئه‌مه‌ش له‌پێناو ئه‌وه‌ی هێرشكاران سوود له‌ زانیارییه‌كان وه‌رنه‌گرن.”

بەختیار حاجی حەمەد گوتیشی: “‌تا ئێستا هیچ هێرشێك زیانی گیانیی نه‌بووه، پێویسته‌ ستاییشی سیاسه‌تی هاوسه‌نگ و عەقڵانیی حكوومه‌تی هه‌رێمی كوردستان و هەوڵەكانی هاوپه‌یمانان بكه‌ین بۆ به‌رپه‌رچدانه‌وه‌ی سه‌رجه‌م هێرشه‌كان‌ و بۆ ئه‌و ئاماده‌كارییانه‌ی كراون‌ بۆ خۆپارێزی.”

جەختیشی كردووەتەوە: ”ڕاسته‌ له‌ كاتی شه‌ڕدا قه‌یرانی ئاو و كاره‌با دروست ده‌بێت، به‌ڵام ئه‌گه‌ر حكوومه‌تی فیدراڵی رێگر نه‌بوایه‌، ئێستا كۆرمۆریش دژه‌درۆن و رۆكێتی ده‌بوو، بەمەش كاره‌بای 24 كاتژمێری كێشەی بۆ دروست نەدەبوو.”

ئێران هەناردەكردنی خۆراكی راگرت

حکوومەتی ئێران هەناردەکردنی هەموو جۆرە بەرهەمێکی خۆراکی و کشتوکاڵی بۆ دەرەوەی وڵاته‌كه‌ی قەدەغە کرد.

بەپێی بڕیارێکی نوێی حکوومەتی ئێران: “ئەمڕۆ سێشەممە 2026\3\3، هەناردەکردنی سەرجەم بەرهەمە خۆراکی و کشتوکاڵییەکانی تا کاتێکی نادیار راگرت، ئامانج لەم بڕیارە دابینکردنی پێداویستییە سەرەتایی و سەرەکییەکانی هاووڵاتییانە لە بازاڕەکانی ناوخۆی ئێران دا.”

ئەو هەنگاوە لە کاتێکدایە، لە رۆژی شەممەوە 2026\2\28، جەنگی ئەمه‌ریکا و ئیسرائیل و بۆ سه‌ر ئێران دەستی پێکردووە و بەردەوامە، ئێران رووبەڕووی قەیرانێکی قووڵی ئابووری و رێژەی بەرزی هەڵاوسان و دابەزینی بەهای دراوەکەی بووەتەوە.

سەد و بیست ملیار دەخرێتە سەر هەژماری بانکی وەزارەتی دارایی عێراق

داهاتی نانەوتی هەرێم بۆ مانگی شوبات دەخرێتە سەر هەژماری بانکی وەزارەتی دارایی عێراق

سبەی چوارشەممە ڕێکەوتی ( ٤ ی ئازاری ٢٠٢٦ ) بڕی ( ١٢٠،٠٠٠،٠٠٠،٠٠٠ ) سەدو بیست ملیار دینار وەک داهاتی نانەوتی هەرێم بۆ مانگی شوبات بەشێوەی کاش دەخرێتە سەر هەژماری بانکی وەزارەتی دارایی حکومەتی فیدراڵ لە لقی هەولێری بانکی ناوەندی عێراق.

ڕاگەیاندنی وەزارەتی دارایی و ئابوری

٣ ی ئازاری ٢٠٢٦

بەپەلە.. لە هەولێرەوە 120 ملیار دیناری داهاتی ناوخۆ، ڕەوانەی بەغدا کرا

120 ملیار دینار داهاتی نانەوتیی هەرێمی کوردستان خرایە سەر هەژماری وەزارەتی دارایی عێراق و چاوەڕوان دەکرێت هەفتەی داهاتووش مووچەی مووچەخۆرانی هەرێمی کوردستان بنێردرێت.

ئاگادارییەک لە بەڕێوەبەرایەتی ئاسایشی هەولێر

داوا لە هاوڵاتیانی خۆشەویست دەکەین لە کاتی کەوتنە خوارەوەی، درۆن یان موشەک، خۆیان بە دوور بگرن لە گردبونەوە لە شوێنی ڕووداو و دەسکاری پارچە تەنەکان نەکەن، تاکو نەبێتە هۆکاری مەترسی بۆ سەر ژیانیان.

لەکاتی بونی هەر ڕوودواێک پەیوەندی بکەن بە هێڵی گەرمی بەڕێوەبەرایەتیەکەمان.

هێڵی گەرم : 066106 07502522728

بەڕێوەبەرایەتی ئاسایشی هەولێر ٤ی ئازاری ٢٠٢٦