لاپۆرتا گرێبەستێکی بە 24 کاتژمێر کۆتایی پێهـێـنا

ڕۆژنامەی مۆندۆ دیپۆرتیڤۆی کەتەلۆنی لە هەواڵێکی نوێیدا ڕایگەیاند یانەی بارسێلۆنا بەشێوەیەکی یەکجارەکی کۆتایی بە گرێبەستی ئەنتۆنی گۆردنی هێرشبەری یانەی نیوکاسڵی ئینگلیزی هێناوە و لەماوەی 24 کاتژمێردا توانیان هەموو شتێک لەسوودی بلوگرانا یەکلایی بکەنەوە و یاریزانەکە دەبێتە یەکێکی دیکە لەناوەکانی هێڵی پێشەوە بارسا بۆ وەرزی داهاتوو.

مۆندۆ دیپۆرتیڤۆ ئەوەشی ئاشکرا کرد بایرن میونخ و لیڤەرپوڵ لەسەر هێڵ بوون بۆ گواستنەوەی گۆردن،بەڵام بارسێلۆنا دوای هاتنە پێشەوەی توانی لەماوەی 24 کاتژمێر لەگەڵ نیوکایڵ ڕێککەوێت،کە قەرارە پێش ئەوەی ئەنتۆنی گۆردن پەیوەندی بە کەمپی مەشق و ڕاهێنانەکانی ئینگلتەرا بکات بۆ مۆندیال سەفەری شاری بارسێلۆنا بکات بۆ پشکنینی پزیشکی تائەوەی گرێبەستەکەی ئیمزا بکات.

دەربارەی گرێبەستەکەش مۆندۆ ئاشکرای کردوە بۆماوەی پێنج وەرز دەبێت و بڕی گواستنەوەی گۆردنی تەمەن 25 ساڵ 70 ملیۆن یۆرۆ دەبێت،کە لەکاتی بەدەست هێنانی نازناویش بڕێک پارە دەدرێتە نیوکاسڵ وەکو بەشێکی مەرجەکانی گرێبەستەکە.

“سەرکار ڕێبوار”

هاوسن پیرۆزبایی لە یاریزانانی هەڵبژاردەی ئیسپانیا دەکات

دوای بڵاوکردنەوەی لیستی یاریزانە بانگهێشت کراوەکانی هەڵبژادەی ئیسپانیا بۆ مۆندیال،کە چەند یاریزانێک بانگهێشت نەکرا بوون گرنگترینیان دین هاوسنی ئەستێرەی یانەی ڕیاڵ مەدرید دوای ماوەیەکیش لەبێدەنگی یاریزانەکە پەیامێکی بڵاوکردەوە و باسی هەڵبژاردەی ئیسپانیای کرد.

هاوسن تویتێکی لە تۆڕی کۆمەڵایەتی X کرد،پەیامێکی بڵاوکردەوە وتی ؛ پیرۆزبایی لە هاوکارانم دەکەم بەبۆنەی نوێنەرایەتی کردنی هەڵبژاردەی ئیسپانیا،منیش لەماڵەوە وەکو ئیسپانیەک پاڵپشتیان دەکەم و هانی هەڵبژاردەکەم دەدەم بۆ بەدەست هێنانی جامی جیهانی.

هاوسن ئەم وەرزە لەگەڵ ڕیاڵ مەدرید ئاستێکی باشی پێشکەش کرد،بەڵام لەکۆتاییدا بووە قوربانی کارەساتەکانی نێو ماڵی مێرێنگی دوای ئەوەی وەرزەکەیان بەبێ نازناو بەڕێکرد نەیتوانی متمانەی لوێز دێلا فۆنتی ڕاهێنەری هەڵبژاردەی ئیسپانیا بەدەست بێنێت و بانگهێشتی مۆندیال نەکرا.

“سەرکار ڕێبوار”

بازدانی نرخی زێڕ و زیو لەگەڵ یەکەم ڕۆژی کردنەوەی بازاڕەکانی جیهاندا

​ئەمڕۆ دووشەممە، ٢٥ـی ئایاری ٢٠٢٦، لەگەڵ کردنەوەی بازاڕەکان لە یەکەم ڕۆژی هەفتەدا، کانزا گرانبەهاکان بازدانێکی بەرچاویان بەخۆوە بینی؛ نرخی زێڕ و زیو بەهۆی دابەزینی بەهای دۆلاری ئەمریکی، بەڕێژەی زیاتر لە ١٪ ڕوویان لە بەرزبوونەوە کرد، ئەمەش لە کاتێکدایە کە بازاڕی نەوت بە پێچەوانەوە دابەزینی تۆمار کردووە.

​لە بازاڕە جیهانییەکاندا، نرخی یەک ئۆنسە زێڕ بەرزبووەوە بۆ 4,563.64 دۆلار، یەک کیلۆگرام گەیشتە 146,724.43 دۆلار و یەک گرامیش بە 146.72 دۆلار مامەڵەی پێوە دەکرێت. هاوکات لە بازاڕەکانی ناوخۆشدا و بەپێی نرخی فەرمی سەندیکای زێڕنگران، عەیارەکان بەهایەکی بەرزتریان تۆمار کرد؛ بە جۆرێک عەیارەی ٢٢ بە 1,029,019 دینار، عەیارەی ٢١ بە 982,245 دینار و عەیارەی ١٨ بە 841,925 دینار جێگیر بوو.

​لەلایەکی دیکەوە، بازاڕی زیویش هاوشێوەی زێڕ ڕووی لە بەرزبوونەوەیەکی بەرچاو کرد، بە جۆرێک لە ئێستادا نرخی هەر ئۆنسەیەک زیو گەیشتووەتە 77.72 دۆلار، هەر کیلۆگرامێک بە 2,498.79 دۆلار مامەڵەی پێوە دەکرێت و نرخی هەر گرامێکیش لەسەر 2.5 دۆلار جێگیر بووە.

​سەبارەت بە هۆکاری ئەم گۆڕانکارییانە، شارەزایان ئاماژە بەوە دەکەن کە وەبەرهێنەران و بازرگانان بە گەشبینییەوە دەڕواننە ئەگەری ڕێککەوتنی نێوان ئێران و ئەمریکا. ئەم دۆخەش بووە هۆی دابەزینی بەهای دۆلار و دابەزینی نرخەکانی نەوت بۆ کەمترین ئاستی دوو هەفتەی ڕابردووی خۆیان، ئەمەش هۆکار بوو بۆ کەمکردنەوەی نیگەرانییەکان لەسەر سەرهەڵدانەوەی هەڵاوسان و ڕاکێشانی سەرنجی وەبەرهێنەران بۆ سەر کانزا گرانبەهاکان.

نرخی نەوت لەگەڵ کردنەوەی بازاڕەکاندا پاشەکشەی زیاتری بەخۆوە بینی

ئەمڕۆ دووشەممە، ٢٥ـی ئایاری 2026، لەگەڵ کردنەوەی بازاڕەکانی جیهان لە یەکەم ڕۆژی مامەڵەکانی هەفتەدا، نرخی نەوت درێژەی بە ئاراستەی دابەزینەکەی دا و نزمبوونەوەی زیاتری بەخۆوە بینی.

​بەپێی دواین نوێکردنەوەکانی بازاڕ لە کاتی کردنەوەدا، نرخی هەر بەرمیلێک نەوتی خاوی برێنت گەیشتووەتە 98.49 دۆلار، کە بەراورد بە نرخی داخستنی کۆتایی هەفتە (103.5 دۆلار) بە بڕی 5.01 دۆلار بە شێوەیەکی بەرچاو دابەزیوە. هاوكات، نرخی هەر بەرمیلێک نەوتی خاوی سووکی تەکساسی ئەمریکیش زیاتر پاشەکشەی کرد و گەیشتە 91.41 دۆلار، کە ئەمەش بەراورد بە کاتی داخستنی بازاڕەکان (96.60 دۆلار) دابەزینێکی تری 5.19 دۆلاری نیشان دەدات.

​ئەم بەردەوامییەی دابەزینی نرخەکان لە یەکەم ساتەکانی دەستپێکردنی مامەڵەکانی هەفتەدا، ڕەنگدانەوەی بەردەوامیی ئەو کەشە گەشبینەیە کە بەهۆی لێدوانەکانی تایبەت بە نزیکبوونەوەی تاران و واشنتن لە ڕێککەوتنی کۆتایی دروستبووە. بازاڕەکان بە ئارامییەوە پێشوازی لەم پێشھاتە سیاسییە دەکەن، چونکە مەترسییەکانی داخرانی گەرووی هورمز کەمتر بوونەتەوە و ئاسۆی دابینکردنی وزە لە جیهاندا بەرەو سەقامگیری دەچێت.

نرخی نەوت دووبارە ڕووی لە بەرزبوونەوە کردەوە

​ئەمڕۆ سێشەممە، ٢٦ـی ئایاری ٢٠٢٦، لە دوای کردنەوەی بازاڕەکانی ئاسیا، نرخی نەوت ئاراستەکەی گۆڕی و دووبارە ڕووی لە هەڵکشان کردەوە، دوای ئەو دابەزینە بەردەوامانەی لە ڕۆژانی ڕابردوودا تۆماری کردبوون.

​بەپێی دواین نوێکردنەوەکانی بازاڕ، نرخی هەر بەرمیلێک نەوتی خاوی برێنت گەیشتووەتە 99.15 دۆلار، کە بەراورد بە ئامارەکانی کاتی کردنەوەی دوێنێ (98.49 دۆلار) بە بڕی 66 سەنت بەرزبووەتەوە.

هاوكات، نرخی هەر بەرمیلێک نەوتی خاوی سووکی تەکساسی ئەمریکیش ڕووی لە بەرزبوونەوە کرد و گەیشتە 92.65 دۆلار، کە ئەمەش بەراورد بە کاتی پێشوو (91.41 دۆلار) بەرزبوونەوەی 1.24 دۆلاری نیشان دەدات.

​ئەم گۆڕانکارییە نوێیەی بازاڕ و هەڵکشانی نرخەکان بۆ سەرهەڵدانەوەی گرژییەکانی نێوان ئێران و ئەمریکا دەگەڕێتەوە، کە وەک هۆکاری سەرەکی ئەم بەرزبوونەوەیە دەستنیشان دەکرێت، هەرچەندە پێشتر گەشبینییەک بۆ ڕێککەوتن هەبوو، بەڵام نوێبوونەوەی ئاڵۆزییەکان دووبارە ترسی لای وەبەرهێنەران دروستکردووەتەوە سەبارەت بە سەقامگیریی هاتوچۆی کەشتییەکان لە گەرووی هورمز و دابینکردنی وزە لەسەر ئاستی جیهان.

نرخی زێڕ و زیو لە بازاڕەکانی جیهان و ناوخۆدا

ئەمڕۆ سێشەممە، ٢٦ـی ئایاری ٢٠٢٦، بازاڕەکانی کانزا گرانبەهاکان گۆڕانکاری نوێیان بەخۆوە بینی و نرخەکان ڕوویان لە دابەزین کردەوە؛ ئەمەش دوای ئەوە هات کە هێرشی نوێی ئەمریکا بۆ سەر چەندین ئامانج لە باشووری ئێران بووە هۆی دووبارە بەرزبوونەوەی نرخی نەوت، کە ئەمەش بە نەرێنی کاریگەری لەسەر نرخی زێڕ و زیو دانا.

​لە بازاڕە جیهانییەکاندا، نرخی یەک ئۆنسە زێڕ دابەزی بۆ 4,532.88 دۆلار، یەک کیلۆگرام بە 145,735.32 دۆلار و یەک گرامیش بە 145.74 دۆلار مامەڵەی پێوە دەکرێت.

هاوكات لە بازاڕەکانی ناوخۆشدا و بەپێی نرخی فەرمی سەندیکای زێڕنگران، نرخەکان کەمێک هاتنە خوارەوە و بەم شێوەیە جێگیر بوون؛ عەیارەی ٢٢ بە 1,022,353 دینار، عەیارەی ٢١ بە 975,882 دینار و عەیارەی ١٨ بە 836,471 دینار مامەڵەی پێوە دەکرێت.

​لەلایەکی دیکەوە، بازاڕی زیویش هاوشێوەی زێڕ ڕووی لە دابەزین کرد، بە جۆرێک لە ئێستادا نرخی هەر ئۆنسەیەک زیو هاتووەتە خوارەوە بۆ 76.33 دۆلار، هەر کیلۆگرامێک بە 2,453.97 دۆلار مامەڵەی پێوە دەکرێت و نرخی هەر گرامێکیش لەسەر 2.45 دۆلار جێگیر بووە.

​شارەزایانی دارایی ئاماژە بەوە دەکەن کە بازاڕ بە نیگەرانییەوە لە دۆخی ئێستای ناوچەکە دەڕوانێت؛ بەرزبوونەوەی گرژییەکان و نرخی نەوت مەترسییەکانی بەرزبوونەوەی هەڵاوسانی زیاتر کردووە، ئەمەش ئەگەری بەرزکردنەوەی سوودی بانکی لە لایەن بانکە ناوەندییەکانەوە هێناوەتە پێشەوە کە ڕاستەوخۆ زیان لە بەهای کانزا گرانبەهاکان دەگەیەنێت.

ڕاگەیەندراوێک لە وەزارەتی دارایی و ئابورییەوە

دوای ناردنی لیستی مووچەی مانگی ئایارو ڕاپۆرتی تەرازووی پێداچونەوەی مانگی نیسان بۆ وەزارەتی دارایی عێراق لەکۆتایی هەفتەی ڕابردوو، لە پێناو ئەوەی هەرچی زووە مووچەی مانگی ئایار بنێردرێت و بەرلەجەژن دابەش بکرێت، سەرلەبەیانی ڕۆژی دوو شەممە ( ٢٥ ئایاری ٢٠٢٦ ) وەک وەزارەتی دارایی و ئابووری بڕی ( ٥٠،٠٠٠،٠٠٠،٠٠٠ ) پەنجا ملیار دینارمان وەک نیوەی داهاتی نانەوتی بۆ مانگی ئایار بەنوسراوی ژمارە ( ٥٤٧٧،٤،٧ ) کە لەڕۆژی (٢٤ ی ئایاری ٢٠٢٦ ) واژۆ کراوە خستە سەر هەژماری بانکی وەزارەتی دارایی حکومەتی فیدراڵ بە ژمارە ( ٧٠٠١٨ ) لە لقی هەولێری بانکی ناوەندی عێراق.

کەئەوەش لە هیچ سیستەمێکی ژمێریاری دنیادا نەبووە هێشتا مانگەکە شەش ڕۆژی ماوە بۆ کۆتایی بەڵام وەزارەتی دارایی فیدراڵ داوای نیوەی داهاتی ئەو مانگە بکات، لەبەرامبەریشدا وەزارەتی دارایی هەرێمی کوردستان بۆ نەهێشتنی هیچ بیانویەک ئامادەبوو ئەو بڕە داهاتە پێش وادەی خۆی ڕەوانە بکات.

سەرەڕای هەموو ئەو ڕێوشوێن و ڕێکارانە وەزارەتی دارایی حکومەتی فیدراڵ لە کۆی بڕی ( ٩٧٠،٧٤١،٥١٤،٩١٤ ) نۆسەدو حەفتا ملیارو حەوت سەدو چل و یەک ملیۆن و پێنج سەدو چواردە هەزارو نۆسەدو چواردە دینار، لەکاتی کۆتایهاتنی دەوامی فەڕمی بانکی ناوەندی عێراق و لە کاتژمێر سێ ی دوانیوەڕۆ بڕی تەنها ( ٨٩٠،٥٠٢،٠٠٠،٠٠٠ ) هەشت سەدو نەوەد ملیارو پێنج سەدو دوو ملیۆن دینار لەلایەن وەزارەتی دارایی حکومەتی فیدراڵەوە گەیشتۆتە سەر هەژماری بانکی وەزارەتمان لە لقی هەولێری بانکی ناوەندی عێراق، بەوەش دەردەکەوێت کە وەزارەتی دارایی حکومەتی فیدراڵ زیاتر لە ( ٨٠،٠٠٠،٠٠٠،٠٠٠ ) هەشتا ملیار دینار کەمتری لەکۆی تەمویلی مووچەی مانگی ئایاری فەرمانبەران و مووچەخۆرانی هەرێمی کوردستان ناردووە.

سەرەڕای نەبونی دەوامی فەرمی و پشوو لە عێراق و هەرێمی کوردستان لەپێناو هەرچی زوو دابەشکردنی مووچەی فەرمانبەران و مووچەخۆرانی هەرێمی کوردستان، وەزارەتی دارایی سەرجەم بانک و گەنجینەو بەڕێوبەرایەتیەکانی ڕاسپاردووە کە دوای وەرگرتنی پارەکە بەشێوەی کاش لەلقی هەولێری بانکی ناوەندی عێراق و گواستنەوە بۆ بانکە ئەهلیەکانی ناو پرۆژەی هەژماری من و پارێزگاو ئیدارە سەربەخۆکان هەر ئەمڕۆ دوای نیوەڕۆ دەست بەدابەشکردنی مووچە دەکرێت.

دوای ڕاگەیاندنی لیستی مووچە کە هەر ئەمڕۆ بڵاو دەکرێتەوە و دەست بە دابەش کردنی مووچە دەکرێت، لە ڕۆژانی جەژنیشدا دابەشکردنی مووچە لەدوای کاتژمێر ( ١٠ ) ی بەیانیەوە بەشێوەی کاش و لە ڕێگای هەژماری من بەردەوام دەبێت.

بەهۆی ئەوەی گواستنەوەی پارە لە هەولێرەوە بۆ پارێزگاو ئیدارە سەربەخۆکان و شارو قەزاکان پێویستی باکەتە، بۆیە داوا لە سەرجەم ئەو مووچەخۆرانە دەکەین کە لە خشتەی مووچەدا مووچەکانیان دەکەوێتە ئەمرۆ کە بەشێوەی کاش مووچە وەردەگرن لەکاتژمێر پێنجی ئێوارە بەدواوە سەردانی بانکەکان بکەن و ئەو مووچەخۆرانەشی لە ڕێی هەژماری منەوە مووچە وەردەگرن لە کاتژمێر سێ بەدواوە دەتوانن سەردانی ئامێرەکانی ڕاکێشانی پارە ( ATM ) ەکان بکەن و مووچەکانیان ڕابکێشن، هەر فەرمانبەرو مووچەخۆرێکیش نەتوانێت لەماوەی ئەو سێ ڕۆژە مووچەکەی وەربگرێت دەتوانێت سەرەتای هەفتەی داهاتوو لەگەڵ دەستپێکردنەوەی دەوام مووچەکەی وەربگرێت.

تێبینی/ لە پێناو ئەوەی بەرە جەژنانەو تا سەرجەم مووچەخۆران بتوانن شایستەکانیان لەکاتی خۆیدا وەربگرن و هیچ مووچە خۆرێک بێبەش نەبێت لەوەرگرتن و دواکەوتنی مووچەکەی، وەک وەزارەتی دارایی بڕیارماندا ئەو کورتهێنانەی بۆ مووچە دروست بووە لەڕێی وەرگرتنی قەرزەوە پڕ بکەینەوە.

هاوپێچ نوسراوی ژمارە ( ٥٤٧٧،٤،٧ ).

ڕاگەیاندنی وەزارەتی دارایی و ئابووری ٢٦ ی ئایاری ٢٠٢٦

خشتەی مووچەی مانگی ئایار بڵاوکرایەوە

وەزارەتی دارایی خشتەی مووچەی مانگی ئایاری فەرمانبەران و مووچەخۆرانی هەرێمی کوردستان بڵاوکردەوە .

بەپێی خشتەکە ، ڕۆژی سێ شەممە ڕێکەوتی ( ٢٦ ئایاری ٢٠٢٦ ) دەست بەدابەشکردنی مووچەی مانگی ئایاری فەرمانبەران و مووچەخۆرانی هەرێمی کوردستان دەکرێت و ڕۆژی پێنج شەممە ( ٢٨ ی ئایاری ٢٠٢٦ ) کۆتایی بەدابەشکردنی مووچە دێت.

تێبینی؛ ئەو مووچەخۆرانەی بەپێی خشتەکە ئەمڕۆ سێ شەممە مووچە وەردەگرن، لەدوای کاتژمێر پێنجی ئێوارە سەردانی بانکەکان بکەن بەمەبەستی وەرگرتنی مووچەکانیان.

هاوکات لەڕۆژانی جەژنیشیدا دابەشکردنی مووچە لە کاتژمێر ١٠ ی بەیانی بەدواوە لە بانکەکان بەردەوام دەبێت بە پێی خشتەی ڕاگەیەنراو.

ڕاگەیاندنی وەزارەتی دارایی و ئابووری ٢٦ ی ئایاری ٢٠٢٦

سام ئاڵتمان: ژیریی دەستکرد نەبووەتە هۆی بێکاری لە جیهاندا

سام ئاڵتمان، بەڕێوەبەری جێبەجێکاری کۆمپانیای (OpenAI)، ئەمڕۆ سێشەممە، 26ـی ئایاری 2026، ڕایگەیاند، کە گەشەسەندنی خێرای ژیریی دەستکرد و بەکارهێنانی، نابێتە هۆی دروستبوونی “بێکاری” لەسەر ئاستی جیهان، ئاماژەی بەوەش کرد کە ئەم تەکنۆلۆژیایە وەک ئەوەی لە سەرەتادا مەترسی لێ دەکرا، جێگەی ژمارەیەکی زۆری فەرمانبەرانی کارگێڕی نەگرتووەتەوە.

ئاڵتمان لە میانی پێشکەشکردنی گوتارێکدا لە کۆنفرانسی “بانکی کۆمۆنوێڵسی ئوسترالی” لە شاری سیدنی، دانی بەوەدا نا کە لە سەرەتادا خۆیشی نیگەران بووە لە کاریگەرییەکانی ژیریی دەستکرد لەسەر ڕێژەی دامەزراندن لە جیهاندا.

ئاڵتمان ڕوونیکردەوە، ئەو و بەرپرسانی کۆمپانیاکەی، کاتێک لە ساڵی 2022دا (ChatGPT)یان ڕاگەیاند، پێشبینییە تەکنۆلۆژییەکانیان تا ڕادەیەکی زۆر ڕاست بوو، بەڵام سەبارەت بە کاریگەرییە کۆمەڵایەتی و ئابوورییەکان بە تەواوی هەڵە بوون.

لە چاوپێکەوتنێکدا لەگەڵ مات کۆمین، بەڕێوەبەری جێبەجێکاری بانکی کۆمۆنوێڵسی ئوسترالی، ئاڵتمان گوتی: “من دڵخۆشم کە لەم بابەتەدا هەڵە بووم. پێم وابوو کاریگەرییەکە لەسەر سڕینەوەی کارەکانی فەرمانبەرانی کارگێڕی ئاستی سەرەتایی تا ئێستا زۆر زیاتر دەبێت لەوەی کە لە واقیعدا ڕوویداوە.”

هەرچەندە ئاڵتمان لەم لێدوانەیدا هیچ ئامارێکی تایبەت بە بەکارخستن و بێکاری نەخستەڕوو، بەڵام پێشتر چەندین جار باسی لە ئەگەری کەمکردنەوەی هەلی کار لەسەر ئاستی کەرتە جیاوازەکان کردبوو بەهۆی پێشکەوتنی ژیریی دەستکردەوە.

ئەم لێدوانانەی ئاڵتمان لە کاتێکدایە کە ژمارەیەکی زیادبوو لە کۆمپانیا زەبەلاحەکانی جیهان، وەک (HSBC، Amazon، Standard Chartered، و CBA) ڕایانگەیاندووە کە ژیریی دەستکرد لە هەندێک لە بەشەکانیاندا جێگەی پێویستی بە هێزی مرۆیی گرتووەتەوە.

لە لایەکی دیکەوە، ئاژانسی ڕۆیتەرز هەفتەی ڕابردوو لە زاری سەرچاوەیەکی ئاگادارەوە بڵاویکردەوە، کە کۆمپانیای (OpenAI) خۆی ئامادە دەکات بۆ پێشکەشکردنی داواکارییەکی نهێنی بەمەبەستی خستنەڕووی پشکەکانی بۆ یەکەمجار لە بۆرسەی ئەمریکادا (IPO) لە هەفتەکانی داهاتوودا. هەروەها ڕۆیتەرز لە مانگی تشرینی یەکەمدا ئاماژەی بەوە دابوو کە کۆمپانیاکە چاوی لەوەیە بەهای بازاڕییەکەی بگاتە 1 تریلیۆن دۆلار و بڕی 60 ملیار دۆلار وەک وەبەرهێنان کۆبکاتەوە.

‎نرخی نەوت دووبارە پاشەکشەی کرد

ئەمڕۆ چوارشەممە، ٢٧ـی ئایاری ٢٠٢٦، لەگەڵ بەردەوامیی مامەڵەکان لە بازاڕەکانی وزەدا، نرخی نەوت ئەو بەرزبوونەوە کاتییەی دوێنێی جێهێشت و دووبارە ڕووی لە دابەزین کردەوە.

​بەپێی دواین نوێکردنەوەکانی بازاڕ، نرخی هەر بەرمیلێک نەوتی خاوی برێنت گەیشتووەتە 97.41 دۆلار، کە بەراورد بە ئامارەکانی دوێنێ (99.15 دۆلار) بە بڕی 1.74 دۆلار دابەزیوە. هاوكات، نرخی هەر بەرمیلێک نەوتی خاوی سووکی تەکساسی ئەمریکیش ڕووی لە پاشەکشە کرد و گەیشتە 91.34 دۆلار، کە ئەمەش بەراورد بە کاتی پێشوو (92.65 دۆلار) دابەزینێکی 1.31 دۆلاری نیشان دەدات.

ئەم شەپۆلە نوێیەی دابەزینی نرخەکان نیشانەی ئەوەیە کە بازاڕەکان هێشتا لە نێوان ترس و ئومێدی پێشهاتە سیاسییەکانی نێوان واشنتن و تاراندا دێن و دەچن. سەرەڕای ئەو گرژییە کاتییانەی کە جارجارە سەرهەڵدەدەنەوە، بەڵام وەبەرهێنەران هێشتا چاوەڕوانی ئاسۆیەکی ڕوونتر دەکەن بۆ دۆخی گەرووی هورمز و سەقامگیربوونی دابینکردنی وزە لەسەر ئاستی جیهاندا.