دوای درێژکردنەوەی ئاگربەستی نێوان ئەمهریکا و ئێران لەلایەن دۆناڵد ترامپەوە، نرخی زێڕ بەرز بووەوە، لەبەرامبەردا نەوت پاشەکشەی کرد و نرخی دابەزی.
ئەمڕۆ چوارشەممە ٢٢ی نیسانی ٢٠٢٦، دوای درێژکردنەوەی ئاگربەست لەلایەن دۆناڵد ترامپ، سەرۆکی ئەمهریکا، نرخی نەوت دابەزی و لەبەرامبەردا نرخی زێڕ بەرز بووەوە، ئەوەش بووە هۆی کەمبوونەوەی هەڵاوسان.
ئاژانسی (رۆیتەرز) بڵاوی كردووەتەوە، نرخی زێڕ لە مامەڵەی خێرادا بە بڕی 0.9% بەرز بووەوە، بەمەش نرخەكەی بۆ هەر ئۆنسەیەك گەیشتە 4755.11 دۆلار، لەكاتێكدا دوێنێ سێشەممە نزمترین ئاستی تۆمار كرد هەر لە 13ی مانگەوە تا دوێنێ.
لە پێشهاتێكی سیاسیی نوێی كاریگەر بەسەر بازاڕەوە، سەرۆكی ئەمهریكا بڕیاری دا بە درێژكردنەوەی ئاگربەست تا كاتێكی نادیار لەگەڵ ئێران، ئەوەش بە ئامانجی پێدانی دەرفەتی زیاتر بە دانوستان و گفتوگۆی ئاشتیی نێوان هەردوو لا، كاتێ بەر لە چەند كاتژمێرێك لە كۆتاییهاتنی وادەی ئاگربەست بڕیارەكەی راگەیاند، بەبێ جەختكردنەوەیەكی روون و ئاشكرا لەلایەن ئێران و ئیسرائیل سەبارەت بە رەزامەندیدانیان بۆ درێژكردنەوەی ئاگربەستەكە.
توێژەران رایدەگەیەنن ئەم درێژكردنەوەی ئاگربەستە گرژییەكان خاو دەكاتەوە. لای خۆیەوە ئیدوارد میر، لە دامەزراوەی ماریكس ئاماژەی بۆ ئەوە كرد، بازاڕەكان دۆخێكی نیمچە سەقامگیریان بەخۆوە دیت، ئەوەش لە دەرەنجامی پاشەكشەی ئەگەری هەڵچوون و پێكدادانەكان، هۆشدارییشی دا لەوەی شەڕ دەست پێبكاتەوە، ئەوا نرخی دۆلار و نەوت و سوو بەرز دەبنەوە، ئەمەش بێگومان فشار دەكەنە سەر نرخی زێڕ.
لە بازاڕەكانی وزەشدا، نەوت پاشەكشەی كردووە، لەكاتێكدا پشكەكان بەرز بوونەتەوە و نرخی دۆلار دابەزیوە، ئەمەش هۆكار بووە بۆ جووڵە لە كانزا گرانبەهان.
ئاژانسەكە تیشكی خستووەتە سەر ئەوەی كە نەوت هۆكارێكی كاریگەرە بۆ سەر هەڵاوسان بەهۆی تێچووی گواستنەوە و بەرهەمهێنان.
لای خۆیەوە بانكی (ستاندارد چارتەرد) ئاماژەی بۆ ئەوە كردووە، ئەو جووڵەیەی ئێستای زێڕ پەیوەستە بە پێشكەوتنەكانی ئاگربەست و پێداویستییەكانی سیولە لە بازاڕەكان.
هەر لەو چوارچێوەیەدا، كیفن وارش، بەربژێری سەرۆكایەتیی ئەنجومەنی یەدەگی فیدڕاڵیی ئەمریكا دەڵێت، هیچ پابەندبوونێكی پێشكەش بە سەرۆك ترامپ نەكردووە سەبارەت بە دابەزینی سوو. جەختیشی لەسەر سەربەخۆیی بڕیارەكانی بانكی ناوەندی كردووەتەوە.
سەبارەت بۆ گۆڕانكاریی لە كانزاكانی دیكە، نرخی زیو بە بڕی 1.5% بەرز بووەتەوە و گەیشتووەتە 77.84 دۆلار بۆ هەر ئۆنسێك. پلاتین بە رێژەی 1.5% و هەر ئۆنسەی گەیشتووەتە 2067.25 دۆلار، لەكاتێكدا بلادیۆم بە رێژەی 1.8% بەرز بووەتەوە و نرخی گەیشتووەتە 1560.31 دۆلار.
