‎پەیامی سەرۆک بارزانی لە سی و دووەمین ساڵیادی دەرچوونی گۆڤاری گوڵان

بەناوی خوای مەزن و دلۆڤان

بەڕێزان سەرنووسەر و كارمەندانی ستافی گۆڤاری گوڵان،

بەبۆنەی سی و دووەمین ساڵیادی دەرچوونی گۆڤاری گوڵان گەرمترین پیرۆزبایی ئاراستەی سەرنووسەر و تەواوی كارمەندانی گۆڤاری گوڵان و خوێنەرانتان دەكەم.

گۆڤاری گوڵان هەر لە سەرەتای دامەزراندنیەوە، ڕێچكەیەكی جیاوازی لەناو ڕۆژنامەگەریی كوردیدا پیادەكردووە و، بەردەوام مینبەرێكی گرنگ بووە بۆ كۆكردنەوەی بیروبۆچوونی جیاوازی دەستەبژێرانی ناوخۆی كوردستان و عێراق و دەرەوە، هەمووكات هەوڵیداوە لەسەر بنەمای پاپەندبوون بە پڕانسیپە نەتەوەیی و نیشتمانیەكان و ڕێزگرتن لەكۆی نەتەوەو ئایینە جیاوازەكانی كوردستان، گیانی لێبوردەیی و پێكەوەژیان قووڵتر بكاتەوە.

سوپاسی هەوڵ و ماندووبوونتان دەكەم، هیوادارم هەردەم پابەندی پڕەنسیپەكانی بیری نەتەوەیی و نیشتمانی بن و، لە ئاست داخوازیی خەڵك و گۆڕانكارییەكانی سەردەم بن و هیوای سەركەوتن و بەردەوامیتان بۆ دەخوازین.

مسعود بارزانی

22ی نیسانی 2026

د.زیره‌ك زێباری باس له‌ دیارنه‌مانی 36 فرۆكه‌ی عێراق ده‌كات

ئه‌ندامێكی لێژنه‌ی په‌یوه‌ندیه‌كانی ده‌ره‌وه‌ی ئه‌نجومه‌نی نوێنه‌رانی عێراق ئاماژه‌ به‌وه‌ ده‌كات، كه‌ چه‌ند فرۆكه‌یه‌كی عێراق دیار نه‌ماون ئه‌مه‌ش بوه‌ته‌وه‌ جێگای پرسیار و نیگه‌رانی زۆری لای كارمه‌ندانی ده‌سته‌ی فرۆكه‌وانی مه‌ده‌نی عێراق دروستكردووه‌.

ده‌نگی نارازی له‌ناو فرۆكه‌خانه‌ی به‌غدا دروست بووه‌ به‌تایبه‌ت له‌سه‌ر دیارنه‌مانی 36 فرۆكه‌ ئەو فڕۆکانە لە کاتی هەڵگیرسانی جەنگی ئیسرائیل و ئەمەریکا دژی ئێران لە ئەرکدا بوون، بەڵام دوای جەنگ نەگەڕاونەتەوە بۆ فڕۆکەخانەکانی عێراق و چارەنووسیان نادیارە لە کاردانەوەی ئەم دۆخەدا، محەممەد شیاع سوودانی، سەرۆک وەزیرانی عێراق هاتە سەر هێڵ و لە بەیاننامەیەکدا بڕیاری دا بە پێکهێنانی لیژنەیەکی باڵا بۆ هەڵماڵینی گەندەڵییەکانی هێڵی ئاسمانی عێراقی.

د.زیره‌ك زێباری ئه‌ندامی لێژنه‌ی په‌یوه‌ندیه‌كانی ده‌ره‌وه‌ی ئه‌نجومه‌نی نوێنه‌رانی عێراق بۆ زاگرۆس گوتی: “ئێمه‌ وه‌ك فراكسیۆنی پارتی بایكۆتی كۆبوونه‌وه‌ی په‌رله‌مانی عێراقمان كردووه‌ نازانین چۆن ئه‌و پرسه‌ و به‌چ شێوه‌یه‌ك چاره‌سه‌ر ده‌كرێت چونكه‌ ده‌بێت لێژنه‌ی دروست بكرێت به‌ڵام پێشووتر لێژنه‌یه‌ك دروستكراوه‌ لیژنەکە بە سەرۆکایەتی سەرۆکی دەستەی دەستپاکی و ئەندامییەتی سەرۆکی دیوانی چاودێری دارایی و سەرۆکی چاودێری کەیسە تایبەتەکان دەبێت، ئەرکی سەرەکییان لێکۆڵینەوە دەبێت لە سەرجەم ئەو گومان و گەندەڵییانەی لە نێو کۆمپانیاکەدا بوونیان هەیە.

ئه‌وه‌شی خسته‌روو: ئه‌م رووداوه‌ به‌خراپ له‌سه‌ر عێراق ده‌شكێته‌وه‌ چونكه‌ له‌ ئاستی ده‌ره‌وه‌ متمانه‌ی فرۆكه‌وانی مه‌ده‌نی عێراق ده‌كه‌وێته‌ ژێر پرسیاره‌وه‌.

پەیامی سەرۆك بارزانی بۆ ڕۆژی ڕۆژنامەگەریی كوردی

سەرۆك بارزانی لە ڕۆژی ڕۆژنامەگەریی كوردی رایگەیاند، لەویادەدا هیوای سەركەوتن بۆ هەموو ڕۆژنامەنووس و میدیاكارە خۆشەویستەكانی كوردستان دەخوازم و پشتیوانی لە ئەرك و ڕۆڵی گرنگی ڕۆژنامەنووسانی كوردستان دەكەم.

بەناوی خودای بەخشندە و میهرەبان

بەبۆنەی ڕۆژی ڕۆژنامەگەریی كوردی و سەد و بیست و هەشتەمین ساڵیادی دەرچوونی یەكەم ڕۆژنامەی (كوردستان) لە لایەن میر میقداد مەدحەت بەدرخان كە هاوكات ساڵیادی دامەزراندنی سەندیكای ڕۆژنامەنووسانی كوردستانە، پیرۆزباییەكی گەرم لە ڕۆژنامەنووس و میدیاكارانی كوردستان و ئەندامانی سەندیكای ڕۆژنامەنووسانی كوردستان دەكەم.

لەویادەدا هیوای سەركەوتن بۆ هەموو ڕۆژنامەنووس و میدیاكارە خۆشەویستەكانی كوردستان دەخوازم و پشتیوانی لە ئەرك و ڕۆڵی گرنگی ڕۆژنامەنووسانی كوردستان دەكەم بۆ بەرگریكردن لە دۆزی ڕەوای گەلەكەمان و قووڵتركردنی فەرهەنگی ئاشتیخوازی و پێكەوەژیان و هەروەها پاراستنی بەها بەرزەكانی كۆمەڵگای كوردستان.

مسعود بارزانی 22ی نیسانی 2026

مامۆستایان و فەرمانبەران لەبارەی كارتی بانكیی مووچە ئاگادار دەكرێنەوە

سەدان مامۆستا و فەرمانبەری خوێندنی کوردی لە کەرکووک ئاگادار دەکرێنەوە بچنە بانک و كارتی (هەژماری من) وەربگرنەوە.

بەڕێوەبەرایەتیی خوێندنی کوردی لە کەرکووک بڵاوی كردەوە، بەسەدان مامۆستا و فەرمانبەر كارتی (هەژماری من)یان تەواو بووە و سبەی پێنجشەممە، 20ی نیسان دەتوانن لە بانكی چەمچەماڵ كارتەكانیان وەربگرنەوە.

خوێندنی کوردی لە کەرکووک ئاشکراشی کردووە، پێداویستییەکانی بۆ وەرگرتنەوەی كارتی بانكی بریتیین لە کارتی نیشتمانی و ژمارەی مۆبایل، ئەو ژمارەیەی کە هەژمارە بانکییەکەی لەسەر تۆمار کراوە.

ئاماژە بەوەش دراوە، دەیان مامۆستایان و فەرمانبەران و مامۆستایانی گرێبەست، کارتەکانیان ئامادەیە.

ترەمپ : بژاردەی گەمارۆدانی ئابوری كاریگەری زیاترە لە سەربازی

لە چاوپێکەوتنێکدا لەگەڵ کەناڵی “فۆکس نیوز” کە بەرەبەیانی ئەمڕۆ پێنجشەممە (23ـی نیسانی 2026) بڵاوکرایەوە، ترەمپ تیشکی خستە سەر دوایین پەرەسەندنەکانی نێوان واشنتن و تاران. ناوبراو ئەو دەنگۆیانەی ڕەتکردەوە کە باس لە دیاریکردنی کاتێکی کورت (3 تا 5 ڕۆژ) دەکەن بۆ کۆتاییهاتنی ئاگربەست و ڕایگەیاند: “ئاگربەستەکە بۆ ماوەیەکی نادیار درێژکراوەتەوە؛ ئێمە هیچ چوارچێوەیەکی کاتیمان نییە و پێویست بە پەلەپەل ناکات.”

دۆناڵد ترەمپ، سەرۆکی ویلایەتە یەکگرتووەکانی ئەمریکا، ڕایگەیاند کە وڵاتەکەی لە ژێر هیچ فشارێکی کاتیدا نییە بۆ واژۆکردنی ڕێککەوتن لەگەڵ کۆماری ئیسلامی ئێران و جەختی کردەوە کە ستراتیژی گەمارۆدانی ئابووری کاریگەرییەکی زۆرزیاتری هەیە وەک لە بژاردەی سەربازی و بۆردومانکردن.

سەبارەت بە گرێدانی ئەم پرسە بە هەڵبژاردنەکانی نیوەی خولی کۆنگرێسەوە، ترەمپ گوتی: “ئەو قسانەی دەگوترێن دوورن لە ڕاستی؛ تاکە ئامانجی من گەیشتنە بە ڕێککەوتنێکی شکۆمەندانە و باش بۆ گەلی ئەمریکا.”

لە بەشێکی دیکەی قسەکانیدا، سەرۆکی ئەمریکا ئاماژەی بە ئاڵۆزییەکانی گەرووی هورمز و دەستبەسەرداگرتنی چەند کەشتییەک لەلایەن ئێرانەوە کرد و گوتی: “ئەوانە کەشتیی ئەمریکی نەبوون، بەڵام ئێمە لە نزیکەوە چاودێری دۆخەکە دەکەن.” ترەمپ پەیامێکی ڕاستەوخۆی ئاراستەی دەسەڵاتدارانی تاران کرد و ڕایگەیاند: “ئێران ساڵانێکی زۆرە ڕووبەڕووی بۆردومان بووەتەوە و لێی ناترسێت، بەڵام ئەوەی بەڕاستی لێی دەترسن و ڕقیان لێیەتی، گەمارۆ و ئابلۆقەی ئابوورییە، چونکە کاریگەرییەکی کوشندەی هەیە.”

لەلایەکی دیکەوە، کارۆڵاین لیڤیت، گوتەبێژی کۆشکی سپی، مەرجە سەرەکییەکانی وڵاتەکەی بۆ کۆتاییهێنان بە جەنگ ڕاگەیاند. لیڤیت ئاماژەی بەوە کرد کە پێویستە وەک مەرجێکی بنەڕەتی، ئێران ڕازی بێت بە ڕادەستکردنی تەواوی “یۆرانیۆمی پیتێنراو” بە ویلایەتە یەکگرتووەکان.

گوتەبێژی کۆشکی سپی سەبارەت بە دەستبەسەرداگرتنی کەشتییە نێودەوڵەتییەکان لەلایەن ئێرانەوە گوتی: “ئەمە وەک پێشێلکردنی ئاگربەست ئەژمار ناکرێت، چونکە کەشتییەکان ئەمریکی یان ئیسرائیلی نەبوون.” ناوبراو لە کۆتایی لێدوانەکەیدا ڕەخنەی توندی لە هەڵسوکەوتە دەریاییەکانی تاران گرت و گوتی: “ئەوەی ئێرانییەکان لە گەرووی هورمز دەیکەن کۆنترۆڵکردن نییە، بەڵکو تەنیا چەتەیی دەریاییە.”

‎پلەکانی گەرما بەرز دەبنەوە

کەشی پێشبینیکراوی ٤٨ کاتژمێری داهاتووی ناوچەکانی هەرێمی کوردستان گۆڕانکاری بەخۆوە دەبینێت، بە شێوەیەک ئەمڕۆ پلەکانی گەرما ڕوو لە بەرزبوونەوە دەکەن و بۆ سبەی هەینیش ئەگەری بارانبارین لە چەند ناوچەیەکی جیاجیا هەیە.

​بۆ ئەمڕۆ پێنجشەممە ٢٣-٠٤-٢٠٢٦، پێشبینی دەکرێت ئاسمان بە گشتی ساماڵ و پەڵە هەور بێت و لە هەندێک شوێن بۆ نیمچە هەور بگۆڕێت. پلەکانی گەرما بەراورد بە تۆمارکراوەکانی دوێنێ بە نزیکەی ١ تا ٢ پلە بەرزتر دەبنەوە. خێرایی با لە نێوان ١٠ بۆ ٢٠ کم/ک دەبێت و مەودای بینینیش لە نێوان ٨ بۆ ١٠ کم دەبێت.

​هاوکات بۆ سبەی هەینی ٢٤-٠٤-٢٠٢٦، ئاسمان لە پەڵە هەور و نیمچە هەورەوە دەگۆڕێت بۆ هەوری تەواو. لە کاتەکانی نیوەڕۆدا شەپۆلێکی بارانبارین ناوچەکانی ڕۆژهەڵات و باکووری هەرێم دەگرێتەوە کە بە شێوەی گەواڵە بارانی بەهاری و هەورە تریشقە دەبێت، بەتایبەت لە ناوچە شاخاوییەکان ڕێژەی بارانەکە زیاتر دەبێت و تا کاتەکانی ئێوارە لە ناوچە جیاجیاکان بەردەوامی دەبێت.

​بەرزترین پلەکانی گەرمای پێشبینیکراو بۆ ئەمڕۆ و سبەی بەم شێوەیە دەبێت: هەولێر ٢٤ پلە، سلێمانی ٢٣ بۆ ٢٤ پلە، دهۆک ٢٣ بۆ ٢٥ پلە، هەڵەبجە ٢٤ پلە، گەرمیان ٢٦ پلە، زاخۆ ٢٤ بۆ ٢٥ پلە، پیرمام ١٩ بۆ ٢٠ پلە، سۆران ٢١ پلە، چەمچەماڵ ٢٣ بۆ ٢٤ پلە، و حاجی ئۆمەران ١٤ بۆ ١٥ پلەی سیلیزی دەبێت.

ڕەنگی نوێی یەکپۆشی قوتابیان راگەیەندرا

وەزارەتی پەروەردەی حکوومەتی هەرێمی کوردستان بڕیاری دا گۆڕانکاری لە شێواز و رەنگی جلوبەرگی قوتابییان بکات و وەزیری پەروەردەش رایگەیاند، ئیتر لە ساڵی نوێی خوێندن، یەکپۆشی لە ناوەندەکانی خوێندن پەیڕەو دەکرێت، بڕیارەکە بۆ رێگریکردنە لە قۆرخکاری و سووککردنی بارگرانییە لەسەر شانی دایک و باوکان.

ئەمڕۆ پێنجشەممە، ئالان حەمەسەعید، وەزیری پەروەردەی حکوومەتی هەرێمی کوردستان لە كۆنگرەیەكی رۆژنامەوانیدا رایگەیاند، بۆ ساڵی خوێندنی 2026 ــ 2027 شێواز و رەنگی جلوبەرگی قوتابییان لە باخچەی ساوایانەوە تاوەکوو قۆناغی 12ـی ئامادەیی دەگۆرێت.

رەنگەکان بەگوێرەی قۆناغەکانی خوێندن بەم شێوەیە دیاریکراون:

– باخچەی ساوایان: تیشێرتی نارنجی و پانتۆڵی نیلی.

– قۆناخی 1 تاوەکوو 6ـی بنەڕەتی: تیشێرتی مارۆنی و پانتۆڵ یان تەنوورەی نیلی.

– قۆناخی 7 تاوەکوو 9ـی بنەڕەتی: تیشێرتی نیلی و پانتۆڵ یان تەنوورەی رەساسی.

– قۆناخی 10 تاوەکو 12ـی ئامادەیی: تیشێرتی رەساسی و پانتۆڵ یان تەنوورەی رەش.

هەروەها کوالیتی جلوبەرگەکانیش دیاریکراوە، بە جۆرێک دەبێت رێژەی لۆکە لە تیشێرتەکاندا لە 70% کەمتر نەبێت، ئەمەش بۆ پاراستنی تەندروستی و دابینکردنی کوالیتییەکی بەرز بۆ قوتابیان.

سەبارەت بە پارچەکانی جلوبەرگەکانیش، تەنیا 3 پارچە (پانتۆڵ، تیشێرتی قۆڵکورت و تیشێرتی قۆڵدرێژ) وەک یەکپۆشی دیاریکراون. وەزارەتی پەروەردە بۆ کەمکردنەوەی تێچوو، قەمسەڵە و جلوبەرگی وەرزشی لە ناو پڕۆسەی یەکپۆشی دەرهێناوە.

یادی ڕۆژنامەگەری؛ لە شکۆی ‘کوردستان’ەوە بۆ زیندانە تەسکەکان

محمد عەبدوڵا عومەر

٢٢ی نیسان ئەو ڕۆژەی ١٢٨ ساڵ بەر لە ئێستا، میقداد مەدحەت بەدرخان لە غەریبیدا مۆمی ڕۆژنامەگەریی کوردی داگیرساند. بڕیار بوو ئەم یادە ببێتە جەژنی ئازادی و دەنگە جیاوازەکان، بەڵام مەخابن ئەمساڵ لە کاتێکدا بەرەو ئەو یادە دەچین، کە کایەی ئازادی لە هەرێمی کوردستان لە هەموو کات زیاتر بەرتەسک بووەتەوە.ئەو ڕاستییەی ناتوانرێت پەردەپۆش بکرێت ئێمە لە کاتێکدا یادی دەرچوونی یەکەم ژمارەی ڕۆژنامەی “کوردستان” دەکەینەوە، کە ژینگەی کارکردنی ڕۆژنامەوانی لە هەرێمەکەماندا دوچاری پاشەکشەیەکی مەترسیدار بووەتەوە: بەرتەسکبوونەوەی فەزا گشتییەکە: ئەو شوێنەی بڕیار بوو ببێتە پەناگەی قەڵەمە ئازادەکان، ئێستا بووەتە گۆڕەپانی ململانێی سیاسی و ترساندنی ئەو دەنگانەی کە نایانەوێت تەنها “چەپڵەوێن” بن.
یاسا و واقیع:سەرەڕای بوونی یاسای کاری ڕۆژنامەگەری، بەڵام پەنابردن بۆ یاساکانی تری وەک “خراپ بەکارهێنانی ئامێرەکانی پەیوەندیکردن” بۆ سزادانی ڕۆژنامەنووسان، نیشانەیەکی ڕوونی ئەو بەرتەسکبوونەوەیەیە.
*زیندان و قەڵەم :یادی ئەمساڵ غەمگینە، چونکە هێشتا قەڵەم هەن لە پشت شیشەکانی زینداندان و خێزانەکانیان چاوەڕێی گەڕانەوەیانن، تەنها لەبەر ئەوەی ویستوویانە وەک چاوی سێیەمی کۆمەڵگە ڕاستییەکان بگوازنەوە.

ڕۆژنامەگەری تەنها پیشەیەک نییە، بەڵکو پێوەری دیموکراسی و زیندوێتی نەتەوەیە. بەرتەسککردنەوەی مەودای ئازادییەکان و دروستکردنی ترس لە دڵی نووسەراندا، تەنها بێدەنگکردنی کەسێک نییە، بەڵکو کوشتنی هیوایە بۆ گەیشتن بە کۆمەڵگەیەکی تەندروست.
با یادی ٢٢ی نیسان تەنها نانی شیرینی و پیرۆزبایی فەرمی نەبێت، با ببێتە وێستگەیەک بۆ پێداچوونەوە؛ چونکە هیچ دەسەڵاتێک بە بێدەنگکردنی ڕەخنەگران بەهێز نەبووە، بەڵکو هێز لەوەدایە گوێ بۆ دەنگە ناڕازییەکان بگیرێت و فەزایەک بخوڵقێنرێت کە تێیدا هیچ قەڵەمێک لە نووسین نەترسێت.
ئازادیی ڕادەربڕین، ئەو هەوایەیە کە دیموکراسی تێیدا هەناسە دەدات؛ کاتێک فەزاکە بەرتەسک دەبێتەوە، نەک تەنها ڕۆژنامەگەری، بەڵکو هەموو کۆمەڵگە تووشی خنکان دەبێت

پەرلەمانی تەنکە و تارمایی

ئەحمەد جەلال ئەحمەد

کاتێک قوفڵی دەرگای یاسادانان لە گیرفانی دوو بازرگانی چەکداردا بێت، بینای پەرلەمانیش دەبێتە وێرانەیەک کە تەنها جاڵجاڵۆکەکان تێیدا حوکم دەکەن! ئەگەر ئەمڕۆ بچیتە بەردەم پەرلەمانی هەرێمی کوردستان، دەبینیت دەرگاکانی هێندە بە داخراوی ماونەتەوە کە ژەنگیان هێناوە و کورسییەکانی ناو هۆڵەکەش بە تەواوی بە تەونی جاڵجاڵۆکە داپۆشراون . ئەم دەزگایە لە دوای هەڵبژاردنەکانەوە بە تەواوی پەکخراوە و بووەتە خانوویەکی چۆڵ و تارمایی، تەنها لەبەر ئەوەی دوو بنەماڵە مافیاییەکە ناتوانن لەسەر دابەشکردنی کێکی داهات و پۆستەکانی کابینەی نوێ ڕێک بکەون . ئەم فەنتەڵۆسانەی دەسەڵات، بە ئەنقەست پەرلەمانیان ئیفلیج کردووە بۆ ئەوەی هیچ دەنگێکی ناڕازی و چاودێرییەک بەسەر قاچاخچێتیی دەروازەکان و دزینی نەوتەوە نەمێنێت، و بڕیارەکان تەنها لەناو دیوەخانە شەخسییەکانی خۆیاندا بدرێن .
گەورەترین جۆری گەندەڵی ئەوە نییە کە دزێک پارەت لێ ببات، بەڵکو ئەوەیە کە کۆمەڵێک نوێنەری بێکار بە پارەی سکی برسیی میللەتەکەیان قەڵەو ببن! لە کاتێکدا فەرمانبەر و مامۆستای داماو بۆ وەرگرتنی چارەکە مووچەیەک دەبێت لەسەر شەقامەکان بپاڕێتەوە یان مانگ بگرێت، ئەم منداڵە لوسکە و پەرلەمانتارانە لەناو ڤێلا قایمەکانیاندا دانیشتوون و لە زۆرخۆری و بێکاریدا کێشیان زیاد دەکات. ئەوان مانگانە ملیۆنان دینار مووچەی خەیاڵی، دەرماڵەی پاسەوان و ئۆتۆمبێلی گرانبەها وەردەگرن بەبێ ئەوەی یەک پەنجە بجوڵێنن یان یەک دانیشتن ئەنجام بدەن . ئەم کەسانە یاسادانەر نین، بەڵکو کۆمەڵێک مشەخۆری گوێڕایەڵن کە تەنها ئەرکیان ئەوەیە لە ماڵەوە چاوەڕێ بکەن تا خاڵۆژن و پورەکانی سەرکردایەتیی حیزبەکانیان لەسەر مێزی قومار ڕێک دەکەون، و پارەی بێدەنگیی خۆیان لەسەر حیسابی سکی برسیی منداڵی ئێوە وەردەگرن.
کوشتنی دیموکراسی بە گوللە ناکرێت، بەڵکو بە کڕینی بێدەنگیی نوێنەرەکان و داخستنی هۆڵەکانی گفتوگۆیە. (وەک چۆن بیرمەند و شۆڕشگێڕ، ڤلادیمێر لینین زۆر بەوردی لەسەر پەرلەمانە درۆینەکان دەڵێت: “چەوساوەکان تەنها چەند ساڵ جارێک مۆڵەتی ئەوەیان پێ دەدرێت کە بڕیار بدەن کام نوێنەری چینی چەوسێنەر لە پەرلەماندا نوێنەرایەتییان بکات و دواتر سەرکوتیان بکات.”) ئەمڕۆ لە کوردستاندا، پارتی و یەکێتی ڕێک ئەم یارییە قێزەونە دەکەن؛ ئەوان نەک هەر پەرلەمانیان پەکخستووە، بەڵکو بێشەرمانە هەڕەشەی هەڵوەشاندنەوەی دەکەن و دەیانەوێت هەڵبژاردنێکی تر بکەنەوە، تەنها لەبەر ئەوەی ژمارەی کورسییەکانیان بە دڵی خۆیان دەرنەچووە بۆ ئەوەی بە ئاسانی وڵات تاڵان بکەن . ئەوان دەرگای پەرلەمانیان بە ژەنگاوی هێشتووەتەوە، تا دەرگای کۆمپانیا سێبەرەکانیان بە کراوەیی و بریقەداری بمێنێتەوە!
مانەوەی دەزگایەک کە تەنها بۆ بەرهەمهێنانی مشەخۆر دروست بووبێت، گەورەترین سوکایەتییە بە ئارەقەی ناوچەوانی کرێکارێکی هەژار! ئەی ئەو زۆرینە بێدەنگەی کە باجی ئەم قەیرانە دەدەن، تف بکەنە ڕووی ئەو پەرلەمانتارە قەڵەو و بێکارانەی کە نانی ئێوەیان قوت داوە. هاوار بکەن و ئەو تەونی جاڵجاڵۆکانە بپچڕێنن کە ئەم دەسەڵاتە بەسەر کەرامەتی ئێوەدا کێشاویەتی. ئەگەر پەرلەمانێک تەنها بۆ ئەوە دروست بووبێت کە پارەی میللەت بەسەر کۆمەڵێک دەمڕاستی حیزبیدا دابەش بکات لە کاتێکدا دەرگاکانی ژەنگیان هێناوە، ئەوا کاتی ئەوەیە بە گڕی توڕەیی ئێوە ئەو دەرگایانە لە ڕەگەوە هەڵبکێشرێن و ئەم شانۆگەرییە بۆ هەمیشە دابخرێت!

لامین؛ ئێمە دەگەڕێینەوە و سەردەکەوین

لامین یاماڵ پیش ڕووبەڕووبونەوەی ئەتلەتیکۆ مەدریدئاماژەی بەوە کرد کە هەموو تەرکیزی لەسەر یارییەکەیە و نایەوێت ئاوڕ بۆ دواوە بداتەوە، چونکە ئامانجی سەرەکی تیپەکە تەنها سەرکەوتنە.

ئەو دووپاتی کردەوە کە کاتێک یارییەکان بەو شێوەیە ناڕۆن کە ئەو دەیەوێت، هەوڵ دەدات بە هەموو توانایەکییەوە هاوکاری هاوڕێکانی بکات و پاڵپشتی تیپەکە بێت، چونکە لە کۆتاییدا تەنها بەرژەوەندی گشتی یانەکە بۆ ئەو گرنگە و هیچ شتێکی تر بێزاری ناکات.

ئەم یاریزانە لاوە باسی لەوەش کرد کە چۆن مامەڵە لەگەڵ هەستی بێئومێدیدا دەکات و ڕایگەیاند کە هەمیشە هەوڵ دەدات تەرکیزی لەسەر باشترین ئاستی خۆی بێت، تەنانەت ئەگەر گۆڵیش تۆمار نەکات.

لامین یامال جەختی لەوە کردەوە کە هاندەرانی بەرشەلۆنە شایەنی باشترینن ئاماژەی بەوەش کرد کە سەرەڕای تەمەنە بچووکەکەی، خەون بە بردنەوەی گەورەترین نازناوەکانەوە دەبینێت، لەوانەش نازناوی مۆندیال و چامپیۆنزلیگ، کە بە ئامانجی سەرەکی خۆی دایان دەنێت.